1 Thessalonians 4

1Hermanos, antok xojc'ujie' iviq'uin, xka'ej chiva ri chica c'aslien ri nika choch ri Dios, y jare' tib'ana'. Y vacame naka'ej y naka'an rogar chiva pa rub'e' ri Ajaf Jesús chi man timalij nti'an ri otz. Y man jo'c ta naka'an rogar chiva, xa naka'ej chiva chi tib'ana' más y más ri nika choch ri Dios. 2Ixre' can ja'al ivata'n ri instrucciones ri xka'ej chiva. Y xka'ej re' chiva, ruma quire' nu'ej ri Ajaf Jesús. 3Ri Dios nrajo' chi can sak tic'ujie' ri ic'aslien choch. Jaja' man nrajo' ta chi nti'an inche'l niqui'an ri vinak ri niquicanuj-qui' chi niqui'an pecado. 4Ixre' achi'a', tivatamaj quixc'ujie' otz quiq'uin ri ivaxjayil y qui'b'ana' respetar. 5Man ti'an inche'l niqui'an ri vinak ri man cata'n ta roch ri Dios. Ruma ijeje' xa ja ri nurayij ri qui-cuerpo ri niqui'an. 6Man taka'an maña cha jun hermano chi nkojc'ujie' riq'uin ri raxjayil. Ruma xa naka'an jun ch'o'j quire', ri Ajaf xtuya' ri castigo pa kave'. Jare' xka'ej chiva antok xojc'ujie' iviq'uin. 7Ri Dios man xojrayuoj ta chi nakuc'uaj jun tz'il c'aslien. Jaja' xojrayuoj chi nakuc'uaj jun c'aslien sak. 8Y xa c'o jun chicajol ri man nrajo' ta nu'on ri xka'ej chiva, man katzij ta ojre' o rutzij ta jun chic vinak ri man nrajo' ta nra'xaj. Xa ja ri ruch'ab'al ri Dios ri man nrajo' ta nra'xaj, ri Dios ri ruyo'n-pa ri Ru-Espíritu Santo chika. 9Pero ri Dios xuc'ut yan chivach ixre' hermanos chi tivajo-ivi', rumare' man chic nic'atzin ta chi nitz'ib'aj chiva, 10ruma ixre' altíra nqui'vajo' quinojiel ri hermanos ri ic'o nojiel lugar richin ri Macedonia. Pero naka'an rogar chiva chi más tib'ana' quire'. 11Y man ti'an je' ch'u'j-ch'u'j, xa ticanuj ri nic'atzin chiva y quixsamaj inche'l xka'ej chiva antok xojc'ujie' iviq'uin. 12Chi quire' ri vinak ri man quiniman ta ri ruch'ab'al ri Jesucristo nquixqui'an respetar, y quire' man jun xtu'on falta chivach. 13Hermanos, ojre' nakajo' chi ixre' ntivatamaj ri chica xti'an chica ri xquinimaj-el ri Jesucristo ri ya xa'con-el, chi quire' man nquixb'isuon ta inche'l niqui'an ri vinak ri manak esperanza quiq'uin. 14Ruma ojre' ri nakanimaj chi ri Jesucristo xcon y xc'astaj-el, nakanimaj chi ri Dios quire' xtu'on quiq'uin ri ya xa'con-el ri xquinimaj-el ri Jesucristo antok xa'c'asie' ri choch-ulief. Ri Dios can xca'ruc'asuoj-el. 15Y re' naka'ej chiva ruma quire' xu'ej ri Ajaf, chi konojiel ri kaniman jaja' can xkojuc'uax chicaj. Y xa ojre' c'a ojc'as antok jaja' xtipa chic jun b'ay, man nku'a ta na'ay chiquivach ri i-quiminak chic el. 16Ruma ri Ajaf antok xtipa chicaj, cof xtich'o-pa, y jun arcángel xtich'o-pa, y xtik'ajan-pa ri ru-trompeta ri Dios. Y na'ay xca'c'astaj-pa ri quiminaki' ri xquinimaj-el ri Cristo. 17Y después ojre' ri c'a ojc'as can, xkujic'-el chicaj junan quiq'uin ijeje', chupan ri mukul, chi xtakac'ulu' ri Ajaf. Y xkojc'ujie' riq'uin jaja' richin nojiel tiempo. 18Rumare' tiya' ruchuk'a' ivánima chib'il-ivi' riq'uin ri tzij re'.

will be added

X\