1 Thessalonians 3

1Ruma altíra xixkajo', man xkacoch' ta chic chi nakajo' nakana'iej ri chica ib'anun. Rumare' xka'ej chi otz nkojc'ujie' can kayuon pa tanamet Atenas, 2y xkatak-el ri hermano Timoteo chi xixb'arutz'ata'. Jaja' jun je' ru-siervo ri Dios y nisamaj kiq'uin chi nutzijuoj ri ru-evangelio ri Cristo. Y xkatak-el chi ni'ruya' más ivuchuk'a' y nu'on je' chiva chi más ticukub'a' ic'u'x riq'uin ri Jesucristo, 3chi quire' man jun chivach xtumalij ruc'u'x chupan ri sufrimientos y nuya' ta can ri Jesucristo. Ruma ixre' ivata'n chi pa kac'aslien ojre' ri kaniman chic ri Jesucristo, can nic'atzin chi nakak'asaj q'uiy sufrimientos. 4Talka pan ive' chi antok xojc'ujie' iviq'uin, xka'ej chiva chi can nca'pa sufrimientos pa kac'aslien. Y can ivata'n otz chi inche'l xka'ej can chiva, can quire' xb'anataj. 5Y ruma man xincoch' ta chic chi nivajo' nina'iej ri chica ib'anun, rumare' xintak-el ri Timoteo iviq'uin, chi nuna'iej-pa ri chica ib'anun, xa c'a icukub'an ic'u'x riq'uin ri Jesucristo. Ruma xin'ej-ka chi ri diablo ya xu'on chiva chi xiya' can ri Jesucristo, y xa man jun xc'atzin ri samaj ri xka'an chicajol. 6Pero vacame xa niquicuot ri kánima ruma ya xkaxaj ri chica ib'anun. Ruma ya xtzalaj-pa ri Timoteo. Jaja' xalru'ej chika chi can icukub'an ic'u'x riq'uin ri Jesucristo, y ntivajo' je' ivi'. Xalru'ej je' chika chi ixre' c'a nkojinataj y can nkojivajo'. Y xalru'ej je' chi man jo'c ta ojre' ri nakarayij nquixkatz'at, xa quire' je' ntirayij ixre'. 7Y rumare' hermanos, ojre' can xojquicuot ruma xkaxaj chi ixre' icukub'an ic'u'x riq'uin ri Jesucristo. Y mesque ojc'o chupan ri sufrimiento y c'o nu'on falta chakavach, xojru'on consolar. 8Y ruma ixre' cof ixc'o riq'uin ri Ajaf Jesucristo, can xuya' jun c'ac'ac' kac'aslien xkana' antok xkaxaj re'. 9¿Chica ta modo naka'an chi nakaya' tiox b'a' cha ri Dios ivuma ixre'? Ruma xi'an chika chi niquicuot kánima choch ri Ka-Dios. 10Can pak'ij chi chak'a' nakac'utuj cha ri Dios chi xkojtiquir ta nakatz'at kavach iviq'uin. Chi quire' xtakac'ut más chivach ri ruch'ab'al ri Dios ri nic'atzin pan ic'aslien ixre' ri icukub'an ic'u'x riq'uin ri Jesucristo. 11Rumare' nakajo' chi ri Katata' Dios y ri Kajaf Jesucristo xtu'on chika chi xkojtiquir xkub'aka iviq'uin. 12Ojre' can altíra nquixkajo'. Y quire' je' nakajo' chi más tivajo-ivi' ixre', y qui'ivajo' je' quinojiel ri nic'aj chic vinak ri man quiniman ta ri Jesucristo. Y nakajo' chi ri Ajaf xtu'on chiva chi más nti'an quire'. 13Chi quire' can ta ntiya' más ivuchuk'a' riq'uin ri Jesucristo, y can siempre sak nic'ujie' ri ic'aslien choch ri Katata' Dios, chi quire' man jun kax itziel nilitaj chivij antok ri Kajaf Jesucristo xtipa chic jun b'ay junan quiq'uin quinojiel ri santos ralc'ual.

will be added

X\