1 San Pedro 5

1Vacame c'o c'a ri nivajo' ni'ej chica ri ancianos quichin ri iglesias, inre' in jun je' anciano. Y inre' xintz'at ri Cristo antok xu'on sufrir. Y antok xtalka ri k'ij chi xtik'alajin ruk'ij ri Cristo, konojiel ojre' xkuc'ujie' riq'uin. 2Ixre' ancianos quichin ri iglesias, qui'ichajij c'a ri hermanos. Ruma ijeje' iru-ovejas ri Dios, y ja ri Dios je' ri xyo'n ri samaj re' chiva. Qui'ichajij c'a, pero man jo'c ta ruma ni'e'x chiva, xa tib'ana' riq'uin i-voluntad, ni man ruma ta jo'c ntivajo' ntich'ec q'uiy miera. Xa qui'ichajij ri hermanos riq'uin nojiel ivánima. 3Pero man ruma ta je' chi ixre' ri nquixchajin quichin, man ti'an inche'l ix cajaf, ni man tak'ax ruve' nti'an chica. Xa tivuc'uaj jun choj c'aslien chiquivach, chi quire' ijeje' niquitamaj niquic'uaj jun choj c'aslien inche'l ixre'. 4Y xa ixre' otz xti'an chiquivach y otz xqui'chajij, can xtiyo'x chiva jun premio, jun corona ri man xtiq'uis ta; y can xti'an chiva chi c'o ik'ij. Re' xtiyo'x chiva antok xtipa chic ri Cristo, ri Namalaj Pastor. 5Y ixre' je' alab'o, tinimaj quitzij ri ancianos richin ri iglesia; y chi'ixvonojiel quixniman-ka chib'il-ivi' y co'l-oc tib'ana'. Ruma chupan ri ruch'ab'al ri Dios ri tz'ib'an can, nu'ej: Ri Dios itziel nca'rutz'at y man nca'ruc'ul ta ri niquina-qui' chi i-nima'k. Pero ri co'l-oc niquina', jaja' nuya' ri ru-favor pa quive'. 6Rumare', co'l-oc tib'ana' choch ri Dios, ruma jaja' c'o namalaj ru-poder. Co'l-oc tib'ana' choch, chi quire' jaja' xtu'on nima'k chiva antok xtalka ri tiempo. 7Y tiya' pa ruk'a' ri Dios nojiel ri pena ri c'o iviq'uin, ruma jaja' nuya' ri nic'atzin chiva. 8Can tib'ana' pensar otz ri chica nti'an y can quixc'asie'. Ruma ri diablo, ri ka-enemigo, can nu'on inche'l nu'on jun león (coj) antok nuya' vielta chi nucanuj chica nuc'ux. 9Y man tiya' lugar cha chi nquixruch'ec; man quixtzak pa ruk'a' y cof quixc'ujie' chupan ri icukb'al c'u'x. Ruma ivata'n chi man jo'c ta ixre' ri ntik'asaj sufrimiento, xa quire' je' ri nic'aj chic hermanos ri ic'o choch-ulief. 10Y vave' choch-ulief man q'uiy ta tiempo ri xti'an sufrir. Y antok ya xik'asaj ri sufrimiento re', ri Dios ri c'o nojiel roch favor riq'uin y oj-rayuon chic konojiel ri jun chic kab'anun riq'uin ri Jesucristo, richin chi nku'a pache' c'o-ve jaja' richin xa jun tiempo, jaja' mismo xtichojmin ri ic'aslien, xtu'on c'a chiva chi q'uiy ri nquixcovin nticoch', xtuya' c'a ivuchuk'a' y xtu'on chi cof nquixpi'ie'. 11Jaja' can c'o-ve ruk'ij y c'o ru-poder chi nu'on gobernar richin nojiel tiempo. Amén. 12Inre' vata'n chi ri hermano Silvano can otz y riq'uin nojiel ránima nu'on rusamaj ri Dios. Rumare' inre' xinc'utuj c'a favor cha jaja' chi tuc'uaj chiva va carta va, ri man nem ta xin'an-el cha. Chupan va carta va xin'ej-el chiva chi ketzij ri ru-favor ri Dios ri choj-iq'uin icukub'an ic'u'x. Y rumare' man tiya' can. 13Ri iglesia ri c'o pa tanamet Babilonia, ri cho'n ruma ri Dios inche'l xixrucha' ixre', nutak-el jun saludo chiva. Ri Marcos ri inche'l valc'ual, nutak-el je' jun saludo chiva. 14Tib'ana' saludar-ivi' chib'il-ivi' y titz'ub'aj ichi' pa rub'e' ri Ajaf Dios, chi nik'alajin chi ntivajo-ivi'. Y tic'ujie' c'a ri paz riq'uin ivánima chi'ixvonojiel, ri ix richin chic ri Jesucristo. Amén.

will be added

X\