1 San Pedro 3

1Ixre' ixoki', can quixniman chica ri ivachajil, chi quire' ri man quiniman ta ri ruch'ab'al ri Dios, can xtiquinimaj ruma ri ic'aslien ixre'. Y man nic'atzin ta chi nitzijos chica. 2Xa riq'uin niquitz'at chi ivuc'uan jun c'aslien sak y respetuosa, niquinimaj ri Jesucristo. 3Ixre' tivaka-ivi', pero man riq'uin ta kax ri i-b'anun cha oro, ni riq'uin utzulaj tak tziak, ni man tiya' adornos chirij ri ive' jo'c chi quixtz'iet cuma ri vinak. 4Xa titija' ik'ij chi ja ri ivánima otz choch ri Dios, y riq'uin jun utzulaj no'j y tic'utu' chi c'o uxlanien riq'uin ivánima. Ruma xa ixre' nti'an quire', re' man xtiq'uis ta; y choch ri Dios jare' ri más c'o rakalien. 5Ruma ojier can, quire' je' xquivak-qui' ri santas ixoki' ri xquiya' cánima riq'uin ri Dios y xa'niman je' chica ri cachajil. 6Inche'l xu'on ri Sara, jaja' xniman cha ri Abraham ri rachajil y xu'ej vajaf cha. Y ixre' ixoki', xa nti'an ri otz y man ntixi'ij ta ivi' nquixb'aka choch jun sufrimiento, can xquixuoc inche'l ral ri Sara. 7Ixre' je' achi'a', otz ino'j tib'ana' quiq'uin ri ivaxjayil. Tib'ana' chica chi quikalien, ruma ijeje' man junan ta quichuk'a' iviq'uin y ruma je' junan xtiyo'x chiva ri utzulaj c'aslien ri man niq'uis ta, ri xtusipaj ri Dios chiva ruma nquixrajo'. Quire' tib'ana' quiq'uin chi quire' ri iv-oraciones, man jun kax nik'ato quichin. 8Y pa ruq'uisb'al ni'ej chiva chi'ixvonojiel chi junan ivánima tib'ana'. Xa c'o jun chivach ri nu'on sufrir, can tina' je' ixre' ri nuna' ri jun riq'uin ránima. Tivajo-ivi' y can ivach'alal-ivi' tib'ana', tijoyovaj ivach y otz tib'ana' quiq'uin quinojiel. 9Y antok ni'an jun itziel kax chiva, man ti'an ruc'axiel. Y antok ni'e'x jun tzij pakon chiva, man ti'ej je' ruc'axiel. Xa tic'utuj cha ri Dios chi tub'ana' bendecir ri nib'ano quire' chiva, ruma ri Dios xixrayuoj chi nuya' ru-bendición chiva. 10Ruma quire' nu'ej chupan ri ruch'ab'al ri Dios ri tz'ib'an can: Xa c'o jun nrajo' niquicuot pa ruc'aslien, y nrajo' je' nirila' ja'al tak k'ij, tuk'ila' ri rak' chi nu'ej tzij ri man i-otz ta, ni man tucusaj je' ri ruchi' chi nu'ej tzij chi nca'ru'on maña. 11Tuya' can ri itziel tak kax, xa jo'c ri otz tub'ana'. Tucanuj ri c'aslien ri nuya' paz y chupan re' ti'a-ve. 12Ruma ri Ajaf nitzu'n-pa pa quive' ri choj quic'aslien, y nra'xaj-pa ri qui-oración. Pero ri nca'b'ano itziel tak kax, man otz ta nca'rutz'at-pa. Quire' nu'ej chupan ri ruch'ab'al ri Dios ri tz'ib'an can. 13¿C'o came jun xtib'ano itziel chiva, xa ixre' ja ri otz nti'an? 14Pero xa ruma ivuc'uan jun choj c'aslien nti'an sufrir, can ja'al quixquicuot. Rumare', man tixi'ij-ivi' chiquivach ri nca'b'ano itziel chiva. Y man timalij-ka ic'u'x. 15Xa tiya' ruk'ij ri Dios ri Ivajaf riq'uin ivánima, ruma jaja' can Santo. Can nic'atzin chi siempre ix-preparados chi quire' nti'ej karruma ivoyo'ien ri esperanza ri xtuya' ri Dios chiva. Chica-na ri nic'utun re' chiva, can ti'ej cha, pero man quixch'olin antok ntitzijuoj cha y tib'ana' respetar. 16Tib'ana' ri otz chi quire' man jun chica nuna' ri ijaluon y ri ivánima. Y xa ruma iniman ri Cristo c'o jun ri itziel nich'o' chivij y numol-pa tzij chivij chi ixre' man otz ta ri ic'aslien, ri nib'ano quire' chiva ruyuon xtiq'uix, ruma ri ic'aslien xa otz. 17Ruma xa Dios nrajo' chi ixre' nti'an sufrir ruma nti'an ri otz, can otz. Más otz nti'an sufrir ruma ri otz nti'an, que choch ruma itziel tak kax ri nti'an. 18Ruma ri Cristo xu'on je' sufrir, y mesque jaja' can choj ri ruc'aslien, xcon kuma ojre' ri man choj ta kac'aslien. Jaja' jo'c jun b'ay xcon ruma ka-pecados, chi quire' nkojuoc richin ri Dios. Pero mesque jaja' xcon, ri ru-espíritu can c'as-ve. 19Y ri ru-espíritu xb'aka quiq'uin ri espíritus ri i-tz'apal y c'o ri xb'arutzijuoj chica. 20Ri espíritus ri i-tz'apal, ja ri man xa'niman ta cha ri Dios ojier can, antok ri Noé xu'on ri nem arca ri inche'l barco. Ri Dios can q'uiy tiempo xa'royo'iej, pero xa man iq'uiy ta xa'colotaj. Ri xa'uoc chupan ri barco jo'c i-ocho (vakxaki'). Ri Dios ja ri ya' xucusaj chi xa'colotaj, ruma ri arca paro' ri ya' xc'ujie-ve. 21Y quire' je' nu'on ri ya' chika ojre' vacame. Antok nkoj'an bautizar, ri ya' nuc'ut chi xojcolotaj, pero man richin ta nuch'aj ri ka-cuerpo. Ri ya' nuc'ut chi ojre' nakajo' naka'an ri otz choch ri Dios. Y ri ka-pecados nca'iel-el ruma ri Jesucristo xcon y xc'astaj-pa chiquicajol ri quiminaki'. 22Ri Jesucristo x'a chicaj, y vacame c'o pa ru-derecha ri Dios. Can pa ruk'a' jaja' ic'o-ve ri ángeles, y pa ruk'a' je' jaja' ic'o-ve ri autoridades, y quinojiel ri c'o qui-poder ic'o pa ruk'a' jaja'.

will be added

X\