1 San Pedro 2

1Mare' tiya' can nojiel itziel tak kax; man chic ti'an maña chica ri vinak, man chic ti'an ca'ye' ipalaj, man itziel titz'at jun chic ruma otz c'o, ni itziel quixch'o' chiquij nic'aj. 2Ixre' tib'ana' inche'l niqui'an ri ac'ola' ri c'aja' ca'alax, can nicajo' nca'tz'uman, y riq'uin re' nca'q'uiy. Y quire' je' ixre', can tirayij ntivaxaj y nti'an leer ri ruch'ab'al ri Dios ri can ketzij. Chi quire' niq'uiy ri ic'aslien choch ri Dios y nquixcolotaj. 3Ruma ixre' ivata'n chic chi ri Ajaf can otz runo'j iviq'uin. 4Can más quixjiel-apa riq'uin ri Jesucristo, ruma jaja' inche'l jun ab'aj ri c'o ruc'aslien. Jaja' man xajo'x ta cuma ri achi'a', pero choch ri Dios, ri Jesucristo can cho'n-ve y altíra rakalien. 5Y ruma ixc'o riq'uin ri Jesucristo, ixre' je' ix inche'l ab'aj ri c'o quic'aslien, rumare' tiya' lugar cha ri Dios chi nquixrucusaj chi nquixuoc rachuoch ri Espíritu Santo. Y ix santos sacerdotes richin chi ntiya' ri ic'aslien choch ri Dios, y jaja' can xtika choch, ruma can pa rub'e' ri Jesucristo nti'an-ve. 6Ruma chupan ri ruch'ab'al ri Dios ri tz'ib'an can, nu'ej: Inre' xtinya' jun Ab'aj pa tanamet Sion. Y ri Ab'aj re' can cho'n-ve. Can altíra rakalien y can xtic'atzin chi quire' man nitzak ta ri jay. Pero ri xtiquinimaj, man xca'q'uixb'ax ta. Quire' nu'ej ri tz'ib'an can. 7Rumare' chivach ixre' ri iniman rub'e', jaja' altíra ja'al ntitz'at. Pero ri vinak ri man nicajo' ta niquinimaj, niqui'an inche'l nu'ej chupan ri ruch'ab'al ri Dios ri tz'ib'an can: Ri Ab'aj ri man xka ta chiquivach ri achi'a' ri i-b'anoy-jay, xa jare' ri xyo'x ri lugar ri más nic'atzin chi quire' ri jay man nitzak ta. 8Y chupan ri ruch'ab'al ri Dios ri tz'ib'an can, nu'ej je' chirij ri Ab'aj re': Ic'o ri xtiquitupij cakan choch ri Ab'aj y xca'tzak paro'. Quire' nu'ej ri tz'ib'an can. Xtiquitupij cakan choch ri Ab'aj, ruma man niquinimaj ta ri ruch'ab'al ri Dios; quire' xtiqui'an ruma quire' ranun-pa pensar ri Dios chiquij. 9Pero ixre' ri iniman ri Dios, ix jun tanamet ri ix-cho'n ruma ri Dios, ix ru-sacerdotes ri Namalaj Dios ri Ka-Rey, ix jun santa nación je', y can ix rutanamit ri Dios. Y quire' rub'anun jaja' chiva, chi quire' ntichol chi jaja' can otz iviq'uin. Y jaja' ri xalasan-pa ivichin chupan ri k'aku'n y xixruya' chupan ri namalaj sakil riq'uin jaja'. 10Chupan ri tiempo ri xak'ax can, man ix rutanamit ta ri Dios. Pero vacame, can ix rutanamit chic ri Dios. Y chupan je' ri tiempo ri xak'ax can, man rujoyovan ta ivach. Pero vacame ri Dios can nujoyovaj ivach. 11Ixre' hermanos ri altíra nquixvajo', nic'utuj jun favor chiva. Ruma ixre' can ix richin chicaj y man richin ta nojiel tiempo ixc'o choch-ulief, rumare' man tiya' lugar chi nti'an ri itziel tak kax ri ntirayij. Ruma ri itziel tak kax ri ntirayij nca'b'ano ayoval riq'uin ri ivánima. 12Rumare' tivuc'uaj jun c'aslien otz chiquivach ri vinak ri man cata'n ta roch ri Dios. Mesque ijeje' nca'quimol-pa tzij chivij chi ixre' man otz ta ri ic'aslien, pero ruma niquitz'at chi otz ri ic'aslien, can xtiquiya' ruk'ij ri Dios antok xtalka ri k'ij chi jaja' xtu'on juzgar. 13Y ixvonojiel, quixniman chica quinojiel ri nca'b'ano gobernar, ruma quire' nrajo' ri Ajaf. Quixniman cha ri rey, ruma jaja' ri c'o más ru-autoridad. 14Quixniman je' chica ri nic'aj chic ri nca'b'ano gobernar, ruma ijeje' ri i-ruyo'n ri rey chi nca'qui'an castigar ri vinak ri c'o itziel tak kax nca'qui'an. Y i-yo'n je' chi niquiya' quik'ij ri vinak ri niqui'an ri otz. 15Ri Dios nrajo' chi ixre' siempre ja ri otz ri tib'ana', chi quire' ri vinak ri man jun kax cata'n y man otz ta canun pensar, man jun chica xca'tiquir xtiqui'ej chivij. 16Ixre' ketzij chi ix libre. Can tib'ana' chi ix libre, pero man richin ta chi nti'an ri itziel tak kax. Man ti'an quire'. Ruma xa ix ru-esclavos chic ri Dios, richin chi nti'an ri nrajo' jaja'. 17Qui'b'ana' respetar quinojiel vinak. Qui'ivajo' ri hermanos. Tixi'ij-ivi' choch ri Dios. Tib'ana' respetar ri rey. 18Y ixre' siervos, can co'l tib'ana' y quixniman chica ri ivajaf. Xa otz quino'j iviq'uin, can quixniman chica; xa itziel quino'j iviq'uin, can quixniman je' chica. 19Ruma xa ni'an chiva chi nti'an sufrir y xa man jun ich'o'j ib'anun, y ixre' nticoch' nojiel re' ruma ivata'n chi ri Dios c'o iviq'uin y nquixrutz'at-pa, jaja' can nika choch chi quire' nti'an. 20Pero xa nquixch'ay ruma i-pecado, man jun otz nuc'am-pa chiva, mesque nticoch' nojiel. Pero xa nti'an sufrir ruma ri utzulaj tak kax ri nti'an y can nticoch', ri Dios can nika choch ri nti'an. 21Quire' nrajo' ri Dios chiva; jaja' xixrayuoj chi nti'an inche'l xu'on ri Cristo. Jaja' xu'on sufrir kuma, y riq'uin re' xuc'ut can chakavach chi kacach'o' antok naka'an sufrir. 22Ri Jesucristo man jun b'ay xu'on pecado. Ni man jun b'ay je' xu'ej jun tzij chi xu'on maña cha jun vinak. 23Antok xa'e'x pakon tak tzij cha cuma ri vinak, man xu'ej ta ruc'axiel chica. Y antok c'o ri chica x'an cha, man jun b'ay xu'ej ta chica chi nu'on ruc'axiel chica. Xa pa ruk'a' ri Dios xuya-ve nojiel ri xqui'an ri vinak cha. Ruma ri Dios can pa ruchojmil nu'on juzgar. 24Y ja ri Cristo ri xuc'uan ri ka-pecados choch cruz chi quire' ojre' nakaya' can ri itziel tak kax, y nakuc'uaj jun choj c'aslien. Jaja' ri xsocotaj y xcon choch cruz chi quire' ojre' nic'ujie' jun otz kac'aslien. 25Ruma ixre' antes xi'an inche'l ovejas ri i-sachnak. Pero vacame xa xtzalaj chic pa ri ivánima riq'uin ri Cristo. Y jaja' nkuru'on cuenta y nuchajij ri kánima.

will be added

X\