1 San Pedro 1

1Inre' Pedro, in ru-apóstol ri Jesucristo, nitak-el va carta va chiva ixre' ri man ixc'o ta chupan ri ka-nación, xa iquiran-ivi' chupan ri lugares Ponto, Galacia, Capadocia, Asia y Bitinia. 2Ri Katata' Dios xixrucha', ruma quire' ranun-pa pensar chivij. Y ja ri Espíritu Santo ri xalasan-el ri itziel tak kax ri c'o pan ic'aslien, chi quire' nquixniman cha ri Jesucristo, y quire' sak nu'on ri ic'aslien. Ruma ja ri ruquiq'uiel ri Jesucristo ri x'in antok xcon, jare' ri nich'ajo-el ri i-pecado. Y can niq'uiy ta más riq'uin ivánima ri favor y ri paz ri nuya' ri Dios. 3Kaya' ruk'ij ri Dios, ri Rutata' ri Kajaf Jesucristo. Jaja' altíra xujoyovaj kavach, rumare' xutak-pa ri Ruc'ajuol chi xcon y xc'astaj-pa chiquicajol ri quiminaki', chi quire' xuya' jun c'ac'ac' kac'aslien ri nu'on chika chi kayo'ien jun c'aslic esperanza. 4Y ri Dios xtuya' chika ri ka-herencia ri ruyacuon chicaj. Ri xtuya' ri Dios chika chicaj man xtik'ay ta, man xtu'on ta tz'il, ni man xtu'on ta je' inche'l ri cotz'e'j ri xa nichakej-ka. 5Y ixre' ix-chajin ruma ri ru-poder ri Dios, ruma icukub'an ic'u'x riq'uin jaja'. Quire' rub'anun ri Dios chiva ruma nrajo' chi ntuoc ivichin ri salvación (colotajic) ri b'anun chic preparar jaja'. Y re' can xtik'alajin antok xtalka ri ruq'uisb'al k'ij. 6Y jare' ri nib'ano chi niquicuot ri ivánima, mesque c'o k'ij nquixb'isuon ruma nquixtojtob'ax riq'uin q'uiy roch sufrimientos. 7Y re' can nic'atzin, chi quire' nik'alajin xa ketzij icukub'an ic'u'x riq'uin ri Dios o manak. Nic'atzin chi nquixtojtob'ax inche'l ni'an cha ri oro. Ri oro nik'asas pa k'ak' chi quire' nitz'iet xa ketzij chi oro. Ri cukb'al c'u'x más rakalien choch ri oro, ruma ri oro xa niq'uis. Y antok nquixtojtob'ax y nticoch' nojiel, xti'e'x chiva chi otz ri xi'an. Y xtic'ujie' c'a ik'ij, antok xtipa chic ri Jesucristo. 8Y mesque ixre' man jun b'ay itz'atuon ri Jesucristo, can ntivajo'; y mesque man ntitz'at ta vacame, iyo'n je' ivánima riq'uin y rumare' altíra nquixquicuot; y ri ntina' riq'uin ivánima can nem, y man ntivil ta tzij chi nti'ej. 9Y ruma icukub'an ic'u'x riq'uin, can xtiyo'x chiva ri salvación (colotajic). 10Ri profetas ri xa'c'ujie' ojier can tiempo, can c'o xqui'ej can chirij ri favor ri xtuya' ri Dios chiva ixre' ri ixc'o chupan ri tiempo vacame. Ijeje' xquitej quik'ij chi xcajo' ta xquina'iej más chirij ri salvación (colotajic) ri nakatzijuoj ojre' vacame. 11Can ta xcajo' xquina'iej más chirij ri xu'ej ri Espíritu Santo richin ri Cristo chica. Ruma ri Espíritu Santo ri c'o riq'uin cánima xu'ej chica chi ri Cristo can xtu'on sufrir, y antok ruk'asan chic ri sufrimiento re', xtic'ujie' ruk'ij. Pero man xk'alajin ta ri chica tiempo y ri chica vinak ri Cristo, y ijeje' jare' ri xcajo' ta xquina'iej. 12Pero ri Dios xu'ej chica ri achi'a' re', chi nojiel ri xqui'ej chirij ri Cristo, man chupan ta qui-tiempo ijeje' ri xtib'anataj-ve, xa c'aja' chupan ri ka-tiempo ojre' xb'anataj-ve. Y jare' ri xtzijos chiva ixre', y ja ri Espíritu Santo ri takuon-pa chicaj xto'n quichin chi xqui'ej ri evangelio. Y hasta ri ángeles nicajo' niquitz'at ta nojiel re'. 13Rumare' ixre', tib'ana' pensar otz ri chica nti'an y ticusaj ri ino'j chi nti'an cuenta-ivi'. Y riq'uin nojiel ivánima je' tivoyo'iej ri favor ri xtuya' ri Dios chiva antok xtipa chic ri Jesucristo. 14Can tic'utu' chi ketzij ix ralc'ual chic ri Dios, can quixniman cha. Man ti'an ri itziel tak kax ri nqui'rayij, inche'l ri xi'an antok man jun ivata'n chirij ri Jesucristo. 15Pa ruc'axiel re', quixuoc inche'l ri Dios ri xayuon ivichin. Jaja' can Santo. Ixre' je' quixuoc santos riq'uin nojiel ri nti'an chupan ri ic'aslien. 16Can tib'ana' inche'l nu'ej ri ruch'ab'al ri Dios ri tz'ib'an can: Quixuoc santos chupan ri ic'aslien, ruma inre' can in Santo, nicha' ri Dios. Quire' ri tz'ib'an can. 17Y xa ixre' ja ri Katata' Dios ri ntivayuoj chi nquixruto', ri man nutz'at ta che'l titzu'n jun vinak chi nu'on juzgar, can tixi'ij c'a ivi' nti'an pecado choch, nojiel k'ij ri xquixc'ujie-el choch ri ulief. Ruma xa otz ri ib'anun, o man otz ta ri ib'anun, ja ruc'axiel xtuya' chiva. 18Ixre' ivata'n chi xixcuol-pa chupan ri c'aslien ri xa man jun rakalien ri c'utun can chivach ruma ri ivate't-imama'. Y antok xixcolotaj-pa choch ri itziel tak kax re', man riq'uin ta jun kax ri niq'uis inche'l ri oro o ri plata, 19xa riq'uin ri santo ruquiq'uiel ri Cristo xixcolotaj-pa. Jaja' inche'l jun alaj oveja ri man jun ruyab'il y can sak ri niyo'x choch ri Dios. 20Antok c'a maja' c'o ri roch-ulief, ri Dios can ya ranun pensar chi nutak-pa ri Cristo, pero xa c'a pa ruq'uisb'al tak k'ij richin ri tiempo xalka. Y ruma ri Dios altíra nkojrajo', rumare' xutak-pa ri Cristo. 21Y ruma iniman ri Cristo, can iniman je' ri Dios. Ruma ja ri Dios xb'ano cha ri Cristo chi xc'astaj-pa chiquicajol ri quiminaki', y jaja' je' ri xb'ano chi c'o je' ruk'ij ri Cristo. Quire' xu'on ruma nrajo' chi nticukub'a' ic'u'x riq'uin jaja' y ntivoyo'iej ri xtuya' chiva. 22Can ja ri Espíritu Santo ri xsamaj riq'uin ivánima antok xivaxaj ri ketzij y xixniman cha, y rumare' vacame sak ri ivánima. Y re' nu'on chiva chi ketzij nqui'vajo' ri nic'aj chic hermanos y man riq'uin ta ca'ye' ipalaj. Xa riq'uin nojiel ivánima tivajo-ivi' y riq'uin sak ivánima je'. 23Ruma ixre' c'o jun c'ac'ac' ic'aslien. Y ri c'aslien re' man niq'uis ta inche'l ri c'aslien vave' choch-ulief. Ri c'ac'ac' ic'aslien, jare' ri xivil antok xinimaj ri ruch'ab'al ri Dios, ri ch'ab'al re' ri xtic'ujie' richin nojiel tiempo y nuya' c'aslien. 24Ruma chupan ri ruch'ab'al ri Dios ri tz'ib'an can, nu'ej: Ri c'aslien vave' choch-ulief, xa inche'l ri k'ayis, ruma ri k'ayis nichakej-ka. Y quire' je' jun vinak ri altíra ruk'ij; ri ruk'ij xtu'on inche'l nu'on ri ruse'j ri k'ayis. Ruma ri ruse'j ri k'ayis xa cha'nin nitzak-ka. 25Pero ri ruch'ab'al ri Ajaf Dios can xtic'ujie' richin nojiel tiempo. Y ri ch'ab'al re' ja ri evangelio ri xtzijos chiva.

will be added

X\