1 San Juan 5

1Quinojiel ri nca'niman chi ri Jesús jare' ri Cristo, can i-alaxnak chic jun b'ay y i-ralc'ual chic ri Dios. Y xa ojre' nakajo' ri Dios, can nakajo' je' ri Ruc'ajuol. 2Y riq'uin re' kata'n; xa can nakajo' ri Dios y naka'an ri nu'ej ri ru-mandamientos, can nca'kajo' je' ri ralc'ual. 3Y xa nakajo' ri Dios, nca'ka'an ri nu'ej. Y ri nu'ej chika, man ta nakana' chi cuesta naka'an. 4Ojre' ri oj-alaxnak chic jun b'ay, nkuch'acuon chirij ri itziel tak kax ri ic'o choch-ulief. Can nkuch'acuon ruma kacukub'an kac'u'x riq'uin ri Jesucristo. 5¿Chica c'a nich'acuon chirij ri itziel tak kax ri ic'o choch-ulief? Ja ri nunimaj chi ri Jesús Ruc'ajuol ri Dios. 6Ri Jesucristo xpa vave' choch-ulief, cha ya' x'an bautizar, xcon choch cruz y x'in ri ruquiq'uiel. Man jo'c ta x'an bautizar, xa can x'in je' ri ruquiq'uiel. Y ri ni'e'n re' chakavach ja ri Espíritu Santo ruma can jo'c ri ketzij nu'ej. 7Ruma chicaj, iyoxe' ri nca'e'n ri ketzij: Ri Dios ri Katata', ri Jesucristo mismo ri ni'e'x Ch'ab'al cha y ri Espíritu Santo. Y ri iyoxe' re' xa jun oc. 8Y vave' je' choch-ulief, iyoxe' ri nca'e'n richin ri Jesucristo: Ri Espíritu Santo, ri ya' chi x'an bautizar, y ri ruquiq'uiel. Ri iyoxe' re' junan ri niqui'ej chakavach. 9Ojre' nakanimaj ri niqui'ej ri vinak chika. Y xa quire', más otz kanimaj ri nu'ej ri Dios chika. Y ri Dios nu'ej chika chi ri Jesucristo jare' ri Ruc'ajuol. 10Ri niniman richin ri Ruc'ajuol ri Dios, ja ri ránima ni'e'n cha chi ketzij ri nu'ej ri Dios chirij ri Ruc'ajuol. Pero ri man nunimaj ta, xa xu'on chi ri Dios man ketzij ta ri nu'ej, ruma man nunimaj ta ri nu'ej chirij ri Ruc'ajuol. 11Y jare' ri nu'ej ri Dios, chi ruyo'n chic ri c'aslien ri man niq'uis ta chika, y riq'uin ri Ruc'ajuol c'o-ve ri c'aslien re'. 12Ri c'o chic ri Ruc'ajuol ri Dios riq'uin ránima, c'o chic riq'uin ri c'aslien ri man niq'uis ta. Pero ri man c'o ta ri Ruc'ajuol ri Dios riq'uin ránima, man c'o ta riq'uin ri c'aslien ri man niq'uis ta. 13Nitz'ib'aj nojiel re' chiva ixre' ri iniman chic ri Ruc'ajuol ri Dios, chi ntina'iej chi c'o chic iviq'uin ri c'aslien ri man niq'uis ta y chi más tinimaj ri Ruc'ajuol ri Dios. 14Y ojre' cukul kac'u'x riq'uin ri Dios chi antok c'o nakac'utuj cha, y xa ja ri nrajo' jaja' ri nakac'utuj, jaja' can nkojra'xaj. 15Y ruma kata'n chi ri Dios nra'xaj ri nakac'utuj cha, kata'n je' chi nuya-pa ri nakac'utuj cha. 16Xa c'o jun hermano xatz'at nu'on pecado, y ri pecado ri nu'on man richin ta chi nicon, tac'utuj cha ri Dios chi tic'asie'. Re' jo'c xa ri ru-pecado man nu'on ta cha chi nicon. Ruma c'o pecado can richin chi nicon, y re' man ni'ej ta chiva chi tic'utuj cha ri Dios. 17Nojiel ri man choj ta ri nca'ka'an, can pecado. Pero c'o pecado ri man richin ta chi nkucon. 18Y ojre' kata'n chi chica-na ri alaxnak chic jun b'ay, man nu'on ta chic ri pecado, ruma ri Ruc'ajuol ri Dios can nuchajij, y ri itziel man nutz'om ta. 19Kata'n je' chi oj richin chic ri Dios. Pero quinojiel ri vinak ri man quiniman ta ri Dios, can ic'o pa ruk'a' ri itziel. 20Y kata'n je' chi ya xalka-ka ri Ruc'ajuol ri Dios choch-ulief. Jaja' xuya' kano'j chi xkatamaj roch ri ketzij Dios. Y vacame jo'c jun kab'anun riq'uin ri Dios ruma ri Jesucristo ri Ruc'ajuol. Jaja' can ketzij Dios, y riq'uin jaja' patanak-ve ri c'aslien ri man niq'uis ta. 21Ixre' ri ix inche'l tak valc'ual, man c'a qui'inimaj ri ídolos. Amén.

will be added

X\