1 San Juan 3

1Can titz'ata' chi ri Katata' Dios can altíra nkojrajo', rumare' kab'inan chi oj ralc'ual jaja'. Ruma c'a re' ri vinak ri man quiniman ta ri Dios, man cata'n ta chi oj ralc'ual chic ri Dios, ruma ijeje' man cata'n ta roch ri Dios. 2Hermanos ri altíra nquixvajo', vacame oj ralc'ual chic ri Dios; pero maja' tik'alajin otz ri chica xkojtzu'n chila chicaj. Pero kata'n chi antok xtipa chic jun b'ay ri Jesucristo, can xkojuoc inche'l jaja', ruma xtakatz'at che'l mero titzu'n jaja'. 3Y quinojiel ri quiyo'ien re', quitz'amuon chi niqui'an sak cha ri quic'aslien, ruma ri Jesucristo can sak-ve. 4Quinojiel ri niqui'an pecado, man niquinimaj ta ri nu'ej ri ru-ley ri Dios. Ruma can pecado-ve antok man ninimax ta ri ru-ley ri Dios. 5Y ixre' ivata'n chi ri Jesucristo xalka vave' choch-ulief chi xralasaj-el ri ka-pecados, y jaja' man jun ru-pecado. 6Y quinojiel ri nca'c'ujie' riq'uin ri Cristo, man niqui'an ta chic ri pecado. Pero ri nic'aj ri c'a niqui'an pecado, can k'alaj chi man quitz'atuon ta ni man cata'n ta roch jaja'. 7Ixre' ri ix inche'l tak valc'ual, man jun c'a tib'ano engañar ivichin. Ri ruc'uan jun choj c'aslien, can choj inche'l ri Jesucristo ri can choj-ve. 8Pero ri nika choch nu'on ri pecado, xa can richin ri diablo. Ruma ri diablo, can pa rutz'ucb'al rutz'amuon-pa chi nu'on pecado. Y rumare' xalka-ka vave' choch-ulief ri Ruc'ajuol ri Dios, chi xu'on destruir ri rusamaj ri diablo. 9Jun ri can ralc'ual chic ri Dios man nu'on ta chic ri pecado, ruma ri Dios xuya' jun c'aslien cha ri can inche'l ri ruc'aslien jaja'. Y mare' nu'on c'a cha chi man nu'on ta chic pecado. 10Can k'alaj ri chica i-ralc'ual ri Dios, y k'alaj je' ri chica i-ralc'ual ri diablo. Ri man ruc'uan ta jun c'aslien choj y man nca'rajo' ta ri hermanos, jare' ri man richin ta ri Dios. 11Ruma ja tzij re' ri xivaxaj antok xinimaj ri Jesucristo, ri nu'ej chi kajo-ki'. 12Y man taka'an inche'l xu'on ri Caín ojier can. Jaja' can richin ri itziel y xuquimisaj ri ruchak'. ¿Y karruma xuquimisaj? Ruma ri ruchak' ja ri otz xu'on, y jaja' ja ri man otz ta ri xu'on. 13Hermanos, xa itziel nquixquitz'at ri vinak ri man quiniman ta ri Dios, man c'a quixchapataj. 14Ojre' kata'n chi oj-alanak chic pa chupan ri camic y chi xojak'ax chupan ri c'aslien, ruma nca'kajo' ri hermanos. Pero ri man nrajo' ta ri ru-hermano, can quiminak choch ri Dios. 15Chica-na ri itziel nutz'at jun ru-hermano, can junan riq'uin jun quimisaniel. Y ixre' ivata'n chi man jun c'a quimisaniel ri c'o ri c'aslien ri man niq'uis ta riq'uin. 16Ri Jesucristo can xuya' rutzij chi xcon kuma ojre'. Y riq'uin re' xuc'ut chakavach chi ojre' nic'atzin nakac'ut riq'uin ri naka'an chi nca'kajo' ri nic'aj chic, kaya' katzij chi nkucon pa qui-cuenta ri ka-hermanos. 17Xa c'o jun ri c'o nojiel riq'uin y nutz'at jun hermano manak ruvay, o manak rutziak, y man nu'ej ta ri ránima chi nuto', can k'alaj chi manak ru-amor ri Dios riq'uin. 18Ixre' ri ix inche'l tak valc'ual, man takajo' jun jo'c riq'uin ri kachi'. Xa can ca'kato' y ketzij. 19Y xa nca'kajo' quinojiel, can kata'n chi oj richin ri ketzij, y kata'n je' chi otz ri kánima choch ri Dios. 20Y xa nuna' ri kánima chi i-kab'anun itziel tak kax, ri Dios más nem choch ri kánima y jaja' rata'n nojiel. 21Hermanos ri altíra nquixvajo', xa nuna' ri kánima chi manak ka-pecado choch ri Dios, man nakaxi'ij ta ki' choch. 22Antok naka'an orar, jaja' nuya' chika nojiel ri nakac'utuj cha, ruma nca'ka'an ri ru-mandamientos y nca'ka'an je' ri nca'ka choch. 23Y ri ru-mandamiento jaja', ja chi kanimaj ri Jesucristo ri Ruc'ajuol, y kajo-ki' inche'l ri ranun mandar chika. 24Ri nib'ano ri nu'ej ri ru-mandamientos, xa jun chic rub'anun riq'uin ri Dios, y ri Dios c'o riq'uin ránima. Y ojre' kata'n chi c'o riq'uin kánima, ruma c'o ri Espíritu Santo ri ruyo'n chika.

will be added

X\