1 San Juan 2

1Hermanos, ixre' ri ix inche'l tak valc'ual, nitz'ib'aj-el nojiel re' chiva, chi quire' man nti'an ta chic pecado. Pero xa c'o jun chivach ri c'o pecado rub'anun, c'o Jun ri xtich'o' cha ri Katata' Dios chi ni'an perdonar ri ru-pecado. Y ri Jun re' ja ri Jesucristo, ri can choj. 2Jaja' xcon kuma chi ni'an perdonar ri ka-pecados. Y man jo'c ta ruma ri ka-pecados ojre' xcon; jaja' xcon je' cuma quinojiel ri vinak ri ic'o choch-ulief. 3Y xa ojre' naka'an ri nu'ej ri ru-mandamientos ri Dios, can k'alaj chi kata'n chic roch jaja'. 4Y xa c'o jun ri ni'e'n: Inre' vata'n roch ri Dios, nicha', pero man nu'on ta ri nu'ej ri ru-mandamientos ri Dios, ri ni'e'n quire' xa nutz'ak tzij, y ri ketzij man c'o ta riq'uin. 5Pero jun ri nu'on ri nu'ej ri Dios, can ketzij chi c'o ri ru-amor ri Dios riq'uin. Y xa quire' naka'an, kata'n chi jo'c jun kab'anun riq'uin ri Dios. 6Y xa c'o jun ni'e'n chi jo'c jun rub'anun riq'uin ri Jesucristo, can tuc'uaj jun c'aslien inche'l ri c'aslien ri xuc'uaj jaja'. 7Hermanos, inre' man nitz'ib'aj ta c'a jun c'ac'ac' mandamiento chiva. Ruma ri mandamiento re', xa ojier yan tiempo c'o, y jare' ri xyo'x chiva na'ay, y re' xa ja ri xivaxaj antok xinimaj ri Jesucristo. 8Pero ni'ej je' chi ri mandamiento re' can c'ac'ac' chivach ixre'. Riq'uin ri Jesucristo xk'alajin ri mandamiento re' y quire' je' iviq'uin ixre'. Ruma ri k'aku'n xa ya nak'ax y ya nik'alajin-pa ri ketzij sakil. 9Pero xa c'o jun ri ni'e'n chi c'o pa sakil, y xa itziel nutz'at jun ru-hermano, k'alaj chi c'a c'o pa k'aku'n. 10Y ri jun ri nrajo' ri ru-hermano, can c'o c'a pa sakil, y man jun c'a xtib'ano cha chi nitzak. 11Pero jun ri itziel nutz'at jun ru-hermano, xa c'a pa k'aku'n c'o-ve, y pa k'aku'n c'a ni'in-ve. Man rata'n ta pache' b'anak-ve, ruma ja ri k'aku'n b'anayuon muoy cha. 12Ixre' ri ix inche'l tak valc'ual, nitz'ib'aj nojiel re' chiva, ruma riq'uin ri xu'on ri Jesucristo, x'an perdonar ri i-pecados. 13Nitz'ib'aj nojiel re' chiva ixre' tata'j, ruma ivata'n chic roch ri Cristo ri can c'o-ve antok c'a maja' c'o ri roch-ulief. Nitz'ib'aj nojiel re' chiva ixre' c'ajola', ruma can ix-ch'aconak chic chirij ri itziel. Nitz'ib'aj nojiel re' chiva ixre' ri ix inche'l tak valc'ual, ruma ivata'n chic roch ri Katata' Dios. 14Ixre' tata'j, nitz'ib'aj c'a chiva ruma ivata'n chic roch ri Cristo ri can c'o-ve antok c'a maja' c'o ri roch-ulief. Ixre' c'ajola', nitz'ib'aj c'a chiva ruma c'o ivuchuk'a', y ri ruch'ab'al ri Dios c'o riq'uin ivánima, y can ix-ch'aconak chic chirij ri itziel. 15Y chiva ixvonojiel ni'ej: Man ti'a ivánima chirij ri roch-ulief, ni chirij ri kax ri ic'o choch. Ruma xa jun ni'a ránima chirij ri roch-ulief, k'alaj chi manak ri ru-amor ri Katata' Dios riq'uin. 16Ruma nojiel ri c'o choch-ulief, xa ja ri itziel ri nurayij ri ka-cuerpo, ri itziel tak kax ri nca'katz'at ri nca'karayij, y ri altíra nakana-ki' ruma ri c'o kiq'uin, xa man richin ta ri Katata' Dios, xa richin ri roch-ulief. 17Y ri roch-ulief xa xtak'ax, y xca'q'uis nojiel ri itziel tak kax ri nca'rayix. Pero ri nu'on ri nrajo' ri Dios, can xtic'ujie' riq'uin ri c'aslien richin nojiel tiempo. 18Ixre' ri ix inche'l tak valc'ual, ojc'o chic chupan ri ruq'uisb'al tiempo. Y ixre' ivaxan chic chi xtipa ri anticristo, ri itziel xtutz'at ri Cristo y xtu'on chi jaja' ri Cristo. Y vacame iq'uiy ri quire' niqui'an. Y mare' kata'n chic chi ojc'o chupan ri ruq'uisb'al tiempo. 19Ijeje' xa'c'ujie' kiq'uin, pero man junan ta cánima kiq'uin; ruma xa ta junan cánima kiq'uin, can ta ic'o-pa kiq'uin. Xa'iel-el kiq'uin, richin chi xk'alajin chi man junan ta cánima kiq'uin. 20Pero ixre' yo'n chiva ri Espíritu Santo ruma ri Cristo, y rumare' ivata'n chic ri ketzij. 21Nitz'ib'aj-el nojiel re' chiva, pero man ruma ta chi man ivata'n ta ri ketzij, xa ruma ivata'n chic ri ketzij, y ivata'n je' chi ri tz'akon tak tzij man riq'uin ta ri ketzij patanak-ve. 22¿Y chica ri aj-tz'akoy-tzij? Ja ri ni'e'n chi ri Jesús man ja ta ri Cristo. Jun ri ni'e'n quire', ja ri anticristo. Can nu'ej chi ri Dios man ketzij ta, y quire' je' nu'ej chirij ri Ruc'ajuol ri Dios. 23Xa chica-na ri ni'e'n chi ri Ruc'ajuol ri Dios man ketzij ta, ri Dios man c'o ta riq'uin. Pero ri ni'e'n chi ri Ruc'ajuol ri Dios can ketzij, can c'o ri Dios riq'uin. 24Rumare' ixre', can tic'ujie' riq'uin ivánima ri tzij ri ivaxan-pa antok xinimaj ri Cristo. Y xa ri tzij re' c'o riq'uin ivánima, can siempre jo'c jun xti'an riq'uin ri Ruc'ajuol ri Dios y riq'uin ri Dios je'. 25Y ri Jesucristo ranun prometer chi c'o xtuya' chika. Ri ranun prometer jaja', ja chi xtuya' ri c'aslien ri man niq'uis ta. 26Inre' xintz'ib'aj-el nojiel re' chiva, xa cuma ri vinak ri nicajo' nquixqui'an engañar. 27Pero ixre' ja ri Espíritu Santo c'o riq'uin ivánima, ri yo'n chiva ruma ri Jesucristo. Y rumare' man nic'atzin ta chi c'o chic jun ri nquixrutijuoj, ruma ri Espíritu Santo nuc'ut chivach nojiel. Y ri nuc'ut jaja' chivach can ketzij. Jaja' man nuc'ut ta ri man ketzij ta. Tinimaj ri nuc'ut jaja'; can siempre jo'c jun tib'ana' riq'uin ri Jesucristo. 28Y vacame ixre' ri ix inche'l tak valc'ual, can siempre jo'c jun tib'ana' riq'uin ri Jesucristo, chi quire' can cukul ta apa kac'u'x riq'uin antok xtipa chic jun b'ay, y man xkuq'uix ta choch antok xtalka ri k'ij re'. 29Y ixre' ivata'n chi ri Jesucristo can choj-ve. Rumare' ivata'n je' chi chica-na ri ruc'uan jun c'aslien choj, can alaxnak chic jun b'ay y rumare' ralc'ual chic ri Dios.

will be added

X\