1 Corintios 9

1¿Man in apóstol ta came? ¿Man in libre ta came? ¿Man nutz'atuon ta came roch ri Kajaf Jesús? ¿Man ixre' ta came ri nu-obra choch ri Ajaf? 2Xa chiquivach nic'aj chic inre' man in apóstol ta, chivach ixre' can in apóstol-ve. Ruma antok inre' xintzijuoj ri ruch'ab'al ri Ajaf Jesús chiva, ixre' can xinimaj. Jare' nic'utu chi k'alaj chi inre' in jun ru-apóstol ri Ajaf. 3Y ni'ej chica ri nca'b'ano acusar vichin: 4¿Acaso manak ka-derecho chi nkutzuk y chi niyo'x kaya'? 5¿Man otz ta came naka'an je' inche'l ri Pedro y ri nic'aj chic apóstoles? Ijeje' i-c'ulan quiq'uin hermanas y nca'quich'ilaj antok niquib'ana' rusamaj ri Dios. Y quire' je' niqui'an ri i-ruchak' ri Kajaf Jesús. 6¿O jo'c inre' y ri Bernabé manak derecho chi man nkusamaj ta? 7¿C'o came jun soldado xa ja ri ru-miera jaja' ri nucusaj richin nutzuk-ka-ri'? ¿O c'o came jun ache ri nutic uva y ni xa ta jun roch nutej? ¿O c'o came jun ri nca'ruchajij ravaj y man nukun ta jub'a' qui-liecha? 8¿Ri ni'ej chiva nuno'j came inre'? ¿Man quire' ta came nu'ej je' chupan ri ru-ley ri Moisés? 9Ri ru-ley ri Moisés ri tz'ib'an can, nu'ej: Antok ri tuora nuxak' ruve' ri trigo, man tiyo'x ruk'asal chirutza'n. Quire' nu'ej ri ley. ¿Quire' xu'ej ri Dios ruma jo'c came nujoyovaj quivach ri tuora? 10Jaja' xu'ej quire' ruma nrajo' chi ojre' ri oj rusamajiel kojtzuk. Inche'l nu'on jun ache ri nisamaj pan avan, jaja' can nroyo'iej ri k'ij antok c'o ri xtuya-pa ri rutico'n. Y quire' je' ri nucajij ri trigo, can nroyo'iej chi c'o ri nuch'ec can chirij. 11Y xa ojre' xkatic riq'uin ivánima ri ruch'ab'al ri Dios, y rumare' q'uiy bendición iviluon; ¿man otz ta came chi ixre' nkojito' riq'uin ri nic'atzin chika vave' choch-ulief? 12Ruma, xa ic'o nic'aj chic rusamajiel ri Dios ri qui'e'n chiva chi qui'ito' y ixre' can i-ito'n-ve, ¿man más ta came rakalien chi nkojito' ojre'? Y mesque quire', ojre' man kac'utun ta chiva chi kojito', ruma nakajo' chi ri ru-evangelio ri Cristo ni'a rutzijoxic. Rumare' ojre' kacach'uon nojiel. 13¿Man ivata'n ta c'a chi ri nca'samaj pa ru-templo ri Dios niquitej ri niyo'x can? Y antok ri vinak niquiya' can jun chicop o jun chic kax richin chi ri sacerdotes niquiya' choch ri Dios choch ri altar, ri sacerdotes re' can niquic'an-el jub'a' chi niquitej. 14Y quire' je' ru'e'n can ri Ajaf, chi ri nca'tzijuon ri evangelio, can chirij ri samaj re' niquich'ec ri quivay. 15Pero inre' man jun kax nuc'utun chiva, y nitz'ib'aj re' chiva vacame man ruma ta nivajo' chi nquinivilij. Más otz nquicon que choch ni'an quire'. Inre' altíra nquiquicuot ruma man jun kax ri nuc'utun chiva, y man nivajo' ta c'a chi c'o jun ri nalasan-el ri deseo re' viq'uin. 16Y inre' man niya' ta ka nuk'ij ruma nitzijuoj ri evangelio; ruma ja ri Dios b'iyuon chuva chi ni'an ri samaj re', y can juye' noch xa man xtin'an ta. 17Xa ta inre' ri xicanun ri samaj, can c'o ta vajal nic'utuj chiva ruma ri samaj ri ni'an chicajol, pero man quire' ta. Ja ri Dios ri xcanun vichin y xuya' ri samaj chuva, rumare' ni'an. 18¿Y c'o came nich'ec ruma ni'an ri samaj re'? Ri nich'ec ja ri nquiquicuot pa vánima, ruma man jun vajal nic'utuj ruma nitzijuoj ri ru-evangelio ri Cristo, mesque otz chi nic'utuj. 19Inre' in libre chiquivach quinojiel. Inre' pa vánima xalax-ve chi ni'an inche'l jun esclavo quichin quinojiel, chi quire' ic'o ta más ri niquinimaj ri Cristo. 20Antok nquic'ujie' chiquicajol ri nuvanakil israelitas, can in israelita ni'an, ruma nivajo' chi nca'nch'ec. Ijeje' ic'o pa ruk'a' ri ley, y inre' man inc'o ta chic pa ruk'a' ri ley. Pero antok nquic'ujie' chiquicajol, ni'an inche'l inc'o pa ruk'a' ri ley, ruma nivajo' chi niquinimaj ri Cristo. 21Y antok nquic'ujie' chiquicajol ri vinak ri man israelitas ta, ri man ic'o ta pa ruk'a' ri ley, can man in israelita ta ni'an. Quire' ni'an ruma nivajo' chi nca'nch'ec. Pero man nimastaj ta je' ri ru-ley ri Dios antok nquic'ujie' chiquicajol ri vinak re', xa can ni'an ri nu'ej ri ley ri xuc'am-pa ri Cristo. 22Y antok nquic'ujie' chiquicajol ri maja' ti'ka pa quive' otz (tiqui'an entender otz) ri ruch'ab'al ri Dios, inre' ni'an inche'l niqui'an ijeje' richin chi nca'nch'ec. Can quiq'uin quinojiel ni'an quire', chi quire' ic'o nca'colotaj. 23Ni'an nojiel re' ruma ri evangelio, chi quire' ri bendiciones ri nuc'am-pa, can ta konojiel nikil. 24¿Man ivata'n ta c'a, chi ri niqui'an carrera, quinojiel niquitej quik'ij chi nca'a anin, pero jo'c jun nich'acuon? Rumare' titija' ik'ij chi quire' ntich'ec ri nrajo' nuya' ri Dios chiva. 25Ri nca'uoc chupan jun carrera, can altíra niqui'an cuenta-qui', man niqui'an ta ri man otz ta nu'on cha ri qui-cuerpo. Quire' niqui'an, y ri niquich'ec xa jun corona ri niq'uis paro'. Pero ri nakach'ec ojre', jun corona ri man niq'uis ta paro'. 26Rumare' inre' nitej nuk'ij chi nqui'in anin y man ni'an ta inche'l nu'on jun ri man rata'n ta pache' ni'ka-ve. Ni man ni'an ta inche'l nu'on jun antok nuch'ey-ri' riq'uin jun chic, y antok nuya' jub'ic-k'a', xa cha cak'iek' nuya-ve. 27Rumare' man niya' ta lugar chi ja ri nu-cuerpo nich'aco vichin, xa can ni'an cha chi inre' ri in rajaf y chi quirunimaj. Ruma xa inre' ri xitzijuon ri ruch'ab'al ri Dios chica iq'uiy vinak, juye' noch xa manak yan chic xtiyo'x chuva ri chica nuya' ri Dios.

will be added

X\