1 Corintios 8

1Y vacame nivajo' nquich'o' chirij ri ic'utun-pa chuva, chirij ri nca'yo'x chiquivach ri ídolos. Konojiel kata'n chirij re'; pero antok ojre' c'o q'uiy kata'n, jare' nib'ano chika chi oj nima'k nakana-ki'. Pero xa ojre' nakajo-ki', can nu'on chika chi konojiel niq'uiy kac'aslien choch ri Dios. 2Ri nuna' chi can nojiel kax rata'n chic ruma c'o runo'j, man jun kax rata'n. Xa tutijuoj-ri' más, ruma nic'atzin chi nratamaj más. 3Pero xa jun nrajo' ri Dios, ri Dios can rata'n roch jaja'. 4Vacame nivajo' nquitzijuon chirij ri te'j ri niyo'x chiquivach ri ídolos. Kata'n chi jun ídolo man jun rakalien, ruma jo'c jun Dios c'o. 5Y kata'n je' chi ic'o vinak ri nca'e'n chi ic'o nic'aj chic dioses. Ic'o iq'uiy dioses y ic'o iq'uiy ajaf vave' choch-ulief y chicaj, nca'cha'. 6Pero ojre' kata'n chi jo'c jun Dios c'o, y jaja' ri Katata'. Riq'uin jaja' patanak-ve nojiel, y nrajo' chi ojre' nakaya' ruk'ij. Kata'n chi jo'c jun Ajaf c'o, y re' ja ri Jesucristo. Ruma jaja' c'o nojiel kax, y ruma jaja' c'o kac'aslien. 7Pero man quinojiel ta hermanos cata'n chi ri ídolos xa man jun kax nca'tiquir niqui'an. Ic'o ri antok maja' tiquinimaj ri Dios, xquiya' quik'ij ri ídolos; rumare' vacame antok niquitej ri ch'ac, can niquina' inque xa yo'n chic chiquivach ri ídolos, y ri quijaluon y ri cánima nu'ej chica chi pecado ri niqui'an. Quire' niqui'an pensar ruma maja' ti'ka pa quive' otz (tiqui'an entender otz) ri ruch'ab'al ri Dios. 8Can ketzij, man ja ta ri nakatej-ka ri nib'ano chika chi más otz nkojka choch ri Dios. Xa nakatej ri te'j ri yo'n chiquivach ri ídolos, man xtu'on ta chika chi más otz nkojka choch ri Dios, y xa man nakatej ta, man xtu'on ta chika chi man oj otz ta choch ri Dios. 9Pero kab'ana' cuenta-ki', ruma xa xtakatej y xkojrutz'at jun ri c'a maja' ti'ka paro' otz (tu'on entender otz) ri ruch'ab'al ri Dios, naka'an cha chi nitzak. 10Ojre' kata'n chi man jun kax nu'on chika xa nakatej. Pero xa jun ri maja' ti'ka paro' otz (tu'on entender otz) ri ruch'ab'al ri Dios, nkojrutz'at chi ojc'o chupan jun lugar ri pache' ic'o-ve ídolos y nkojrutz'at chi nakatej ri yo'n chiquivach ri ídolos re', jaja' can xtu'on pensar xtutej je', mesque ri rujaluon y ri ránima nu'ej chi man otz ta. 11Ojre' kata'n chi man jun kax nu'on chika xa nakatej ri yo'n chiquivach ri ídolos, pero xa rumare', c'o jun hermano ri maja' ti'ka paro' otz (tu'on entender otz) ri ruch'ab'al ri Dios nitzak; xa quire' naka'an cha, man otz ta, ruma ri Cristo xcon je' ruma ri jun re'. 12Y xa ojre' quire' naka'an, can nca'kasoc ri quijaluon y ri cánima ri hermanos ri maja' ti'ka pa quive' otz (tiqui'an entender otz) ri ruch'ab'al ri Dios. Y xa quire' naka'an, can cha ri Cristo naka'an-ve ri pecado re'. 13Rumare' xa ruma ri ch'ac nitej, nitzak can jun hermano, man nitej ta chic ch'ac. Inre' man nivajo' ta chi vuma inre' nitzak jun hermano.

will be added

X\