1 Corintios 7

1Vacame nivajo' nquich'o' chirij ri ic'utun-pa chuva chupan ri carta ri xitak-pa chuva. Y inre' ni'ej: Más otz man tic'ulie' ri ala'. 2Pero ruma ic'o ri niquicanuj-qui' chi niqui'an pecado, rumare' más otz chi quinojiel alab'o tic'ujie' quixjayil y quinojiel xtani' tic'ujie' cachajil. 3Y nic'atzin chi ri ache nujach-ri' pa ruk'a' ri ixok y ri ixok nujach-ri' pa ruk'a' ri ache. 4Ri ixok man rajaf ta ka ri ru-cuerpo, ruma can richin ri rachajil. Y quire' je' ri ache, man rajaf ta ka ri ru-cuerpo, xa can richin ri raxjayil. 5Rumare' man tu'on negar-ri' ri ixok choch ri rachajil, y quire' je' ri ache man tu'on negar-ri' choch ri raxjayil. Pero xa ijeje' nicajo' niqui'an orar más; otz niqui'ej chiquib'il-qui' chi man nca'var ta junan jun jane' (jaro') k'ij. Pero man otz ta chi q'uiy tiempo niqui'an quire', ruma xa man niquicoch' ta más, ri Satanás xca'ru'on tentar. 6Y ri xin'ej, jo'c xin'ej xa nicajo' niqui'an quire', pero man ni'an ta mandar chi can quire' tiquib'ana'. 7Inre' ni'ej, más ta otz xa ta quinojiel niqui'an inche'l inre', niquicoch' nca'c'ujie' quiyuon y man ta nca'c'ulie'. Pero chikajunal man junan ta ri don ri ruyo'n-pa ri Dios chika, y rumare' jun-ve ri jun y jun-ve chic ri jun. 8Inre' ni'ej chica ri man i-c'ulan ta, más otz man tiquicanuj quixjayil o man ticajo' cachajil. Y quire' je' ni'ej chica ri malca'n-ixoki', más otz man ta ca'c'ulie' chic. Más otz quire' ca'c'ujie', inche'l nub'anun inre'. 9Pero xa man nca'tiquir ta nca'c'ujie' quiyuon, can ca'c'ulie'. Ruma más otz nca'c'ulie' que choch chi nca'c'at ruma ri niquirayij. 10Chica ri i-c'ulan ni'ej, pero man nutzij ta inre' ri ni'ej chica. Xa ja ri Ajaf ri ni'e'n: Chi ri ixoki' i-c'ulan man tiquijach-qui' quiq'uin ri cachajil. 11Pero xa c'o jun ixok nujach-ri' riq'uin ri rachajil, man ti'a riq'uin jun chic ache. Y xa man nrajo' ta nic'ujie' ruyuon, tiquic'ama' chic qui' riq'uin ri rachajil. Y quire' je' ri ache, man tujach-ri' riq'uin ri raxjayil. 12Y chica ri nic'aj ni'ej, pero re' inre' nqui'e'n; man ja ta ri Ajaf: Xa c'o jun hermano c'ulan, y ri raxjayil man runiman ta, y ri raxjayil can nrajo' nic'ujie' riq'uin; man tujach-ri' riq'uin ri raxjayil. 13Y xa ja ri ixok ri xunimaj ri Cristo y ri ache man runiman ta, pero ri ache nrajo' nic'ujie' riq'uin; ri ixok man tujach-ri' riq'uin ri rachajil. 14Ruma xa jun ache man runiman ta ri Cristo y ri raxjayil runiman, y ri ache nrajo' nic'ujie' riq'uin ri raxjayil; c'o che'l naka'ej chi ri ache re' can richin chic ri Dios rub'anun. Y xa ja ri ixok ri man runiman ta y ri rachajil runiman, y ri ixok nrajo' nic'ujie' riq'uin ri rachajil, c'o che'l je' naka'ej chi ri ixok re' can richin chic ri Dios rub'anun. Xa man ta quire', ri calc'ual i-tz'il ta choch ri Dios, vacame ri calc'ual can i-richin ri Dios quib'anun. 15Pero xa jun ri man runiman ta nrajo' nujach-ri' riq'uin ri jun ri runiman, tiquijacha-qui', ruma man jun ximiyuon quichin. Ruma ri Dios xojrayuoj chi nic'ujie' ri paz riq'uin kánima. 16¿Chica avata'n atre' ri at raxjayil ri ache, xa avuma atre' xticolotaj ri avachajil? ¿Y chica avata'n atre' ri at rachajil ri ixok, xa avuma atre' xticolotaj ri avaxjayil? 17Pero chi'ijunal quixc'ujie' inche'l xuya' ri Dios chiva. Y chi'ijunal quixc'ujie' inche'l ib'anun-pa antok maja' quixayox ruma ri Dios. Inre' quire' ni'ej chica quinojiel ri iglesias ri ic'o nojiel lugar. 18¿Ic'o chivach ixre' ri b'anun ri circuncisión chica antok ri Dios xa'rayuoj chi xa'uoc ralc'ual? Quire' ca'c'ujie'. ¿Ic'o je' chivach ixre' ri man b'anun ta ri circuncisión chica antok ri Dios xa'rayuoj chi xa'uoc ralc'ual? Quire' ca'c'ujie'. 19Ruma man jun chica nu'on xa b'anun ri circuncisión chika o xa man b'anun ta. Ri nic'atzin, ja chi naka'an ri ru-mandamientos ri Dios. 20Chikajunal kojc'ujie' c'a inche'l kab'anun antok xojayox ruma ri Dios. 21¿Ic'o chivach ixre' xa i-esclavos antok ri Dios xa'rayuoj chi xa'uoc ralc'ual? Xa quire', man ca'b'isuon. Pero xa nca'tiquir nca'c'ujie' libre, más otz. 22Ixre' ri ix esclavos antok xixayox ruma ri Ajaf, vacame ix libre chic, ruma ix richin chic ri Ajaf Jesucristo. Y ixre' ri ix libre antok xixayox ruma jaja', vacame man ix libre ta chic, ruma ix esclavos chic richin ri Jesucristo. 23Jaja' ya xixrulok' y q'uiy rajal xutoj ivuma. Rumare' man chic quixc'ujie' chuxie' ri niquic'ut ri vinak. 24Hermanos, chikajunal inche'l kab'anun antok xojayox ruma ri Dios, can quire' c'a kojc'ujie' chupan ri c'ac'ac' c'aslien riq'uin ri Dios. 25Y vacame nivajo' nquich'o' jub'a' chirij ri ic'utun-pa chuva, ri chica nti'an quiq'uin ri xtani' y ri alab'o. Ri Ajaf man jun xu'ej chiquij ijeje'. Pero ri xtin'ej, can c'o-ve rakalien y can c'o che'l ntinimaj, ruma inre' ja ri Ajaf xjoyovan noch y mare' ni'an ri nrajo' jaja'. 26Inre' ni'an pensar chi ruma altíra cuesta ri tiempo ri ojc'o, más otz kojc'ujie' inche'l kab'anun. 27Rumare' ri c'o chic raxjayil, tic'ujie' riq'uin. Y ri manak raxjayil, man tu'on preocupar-ri' chi nic'ulie'. 28Pero xa jun ala' nic'ulie', man pecado ta nu'on. Y quire' je' mismo ri xtan, xa nic'ulie', man pecado ta nu'on. Pero ri nca'c'ulie' niqui'an sufrir chupan ri quic'aslien. Y inre' man nivajo' ta chi ixre' nti'an sufrir. 29Pero ri nivajo' ni'ej chiva hermanos, chi xa man q'uiy ta chic tiempo ojc'o vave' choch-ulief. Rumare' ri c'o quixjayil, tiquib'ana' chi inche'l xa manak quixjayil. 30Y ri nca'uok', inche'l xa man nca'uok' ta; y ri nca'quicuot, inche'l xa man nca'quicuot ta; y ri nca'lak'o, inche'l xa man quichin ta. 31Y quire' je' ri nca'cusan ri kax ri c'o choch-ulief, inche'l xa man ijeje' ta nca'cusan. Ruma nojiel ri nakatz'at ri c'o choch-ulief xa nca'q'uis. 32Inre' nivajo' chi ixre' man ta ni'a ivánima chirij ri c'o choch-ulief. Ri ala' más nu'on pensar ri chica nrajo' ri Ajaf y nutej ruk'ij nu'on ri nika choch ri Ajaf. 33Pero ri ache nu'on pensar ri rusamaj ri c'o choch-ulief y nutej ruk'ij nu'on ri chica nika choch ri raxjayil. 34Y quire' je' ri xtan, man junan ta riq'uin jun ixok. Ruma jun xtan más nu'on pensar ri chica nrajo' ri Ajaf, y can nujach ri ránima y ri ru-cuerpo pa rusamaj ri Ajaf. Pero ri ixok nu'on pensar ri rusamaj ri c'o choch-ulief, y nutej ruk'ij nu'on ri chica nika choch ri rachajil. 35Ri ni'ej chiva xa richin chi nquixto', y man richin ta chi nquixk'at. Inre' nivajo' chi ixre' ntivuc'uaj jun c'aslien otz y man jun ta ntuoc chupan, richin quire' man jun nik'ato ivichin chi nti'an ri nrajo' ri Ajaf. 36Pero xa c'o jun tata'j nuna' chi man otz ta chi ri rumi'al c'o chic rujuna' y man c'ulan ta, y nutz'at chi man otz ta ri rub'anun ruma man ruyo'n ta lugar cha ri rumi'al chi nic'ulie', tuya' lugar cha chi nic'ulie', ruma man pecado ta nu'on xa nuya-el chi nic'ulie'. 37Pero xa c'o jun ri man nuya' ta ri rumi'al chi nic'ulie', man jun ninimo chi quire' nu'on, y nu'ej pa ránima chi tic'ujie' ri rumi'al chi man jun choj-iq'uin nic'ulie-ve, ri tata'j re' otz ri nu'on. 38Ri tata'j ri nuya' ri rumi'al chi nic'ulie', otz ri nu'on. Pero ri tata'j ri man nuya' ta ri rumi'al chi nic'ulie', más otz nu'on choch ri jun ri nuya-el ri rumi'al chi nic'ulie'. 39Jun ixok c'ulan, can ximil riq'uin ri rachajil y manak che'l nujach-ri' riq'uin ri rachajil antok xa c'a c'as. Ri ley ri xuya' ri Dios can quire' nu'ej. Pero xa nicon-el ri rachajil, otz nic'ulie' riq'uin jun chic, xa quire' nrajo' jaja'. Pero tic'ulie' riq'uin jun ri runiman chic ri Ajaf. 40Pero inre' ni'ej chi jun malca'n-ixok más otz man ta nic'ulie' chic jun b'ay; ruma xa nic'ujie' ruyuon, más xtiquicuot pa ruc'aslien. Y inre' ni'an pensar chi quire' je' nrajo' ri Ru-Espíritu ri Dios ri c'o viq'uin.

will be added

X\