1 Corintios 6

1¿Karruma ixre' antok c'o jun chivach ri c'o chica nu'on chiva, chiquivach ri autoridades ri man quiniman ta ri Cristo nquix'a-ve, y man nquix'a ta chiquivach ri santos hermanos? 2¿Man ivata'n ta c'a chi xtalka ri k'ij antok konojiel ojre' ri santos ralc'ual ri Dios xca'ka'an juzgar ri vinak? Y xa quire', ¿man nquixtiquir ta came nti'an arreglar ch'ute'k tak kax ri nca'b'anataj chicajol? 3¿Man ivata'n ta c'a chi xtalka ri k'ij antok ojre' xca'ka'an je' juzgar ri ángeles? Y xa quire', ¿karruma man nkojtiquir ta naka'an arreglar ri ayoval ri nca'b'anataj chikacajol chupan ri kac'aslien choch-ulief? 4Rumare', xa c'o ri chica nti'an juzgar vave' ri choch-ulief, ¿qui'iya' came ri manak-oc quikalien chupan ri iglesia chi niqui'an arreglar? 5Ni'ej quire' chiva chi quixq'uix. ¿Man jun came hermano chicajol ri c'o runo'j chi nca'ru'on arreglar ri hermanos ri c'o ayoval chiquivach? 6Pero pa ruc'axiel chi quire' ta ib'anun, xa man quire' ta nti'an, ruma jun hermano xa pa tribunal nrayuoj-ve jun chic hermano chi nu'on arreglar ri ayoval, y ri achi'a' ri pache' ni'ka-ve xa man quiniman ta ri Cristo. 7Can man otz ta chi c'o ayoval chicajol. ¿Man más ta came otz nticoch' ri ni'an chiva? ¿Man más ta c'a otz chi ixre' nticoch' xa c'o ri chica nalak'ax chiva? 8Pero ixre' xa man quire' ta nti'an. Pa ruc'axiel re', xa ixre' ri nquixb'ano ri itziel no'j y ri alak'. Y xa chica mismo ri hermanos nti'an-ve quire'. 9¿Man ivata'n ta c'a chi ri vinak ri man otz ta quic'aslien choch ri Dios, man xca'uoc ta pa ru-reino jaja'? Man ti'an engañar-ivi'; ri man i-c'ulan ta ri niquicanuj-qui' chi niqui'an pecado, ri niquiya' quik'ij ri ídolos, ri i-c'ulan ri niquic'uaj-qui' riq'uin jun chic, ri achi'a' ri man nca'cajo' ta chic ixoki' y xa quiq'uin chic achi'a' nca'c'ujie-ve, 10ri nca'b'ano alak', ri nicajo' chi nojiel kax quiq'uin ta ijeje' c'o-ve, ri nca'k'ab'ar, ri itziel nca'ch'o' chiquij nic'aj chic, y ri can nca'quitz'om ri vinak richin chi niquimaj can kax chica, man xca'uoc ta pa ru-reino ri Dios. 11Y ic'o chivach ixre' ri xa'b'ano ri pecados ri ya xin'ej. Pero vacame sak chic ri ivánima, ix richin chic ri Dios, y xiel chi man jun chic i-pecado choch jaja', re' ruma ri xu'on ri Ajaf Jesús y ruma ri Ru-Espíritu ri Ka-Dios. 12Nojiel xa otz chi ni'an, pero man nojiel ta nuc'ul chi ni'an. Nojiel xa otz chi ni'an, pero man nivajo' ta ni'a vánima chirij chica-na kax, ruma man nivajo' ta chi nquika pa ruk'a'. 13Y can ketzij ri ni'e'x chi ri vay richin ri kapan y ri kapan richin ri vay. Pero xtalka ri k'ij chi ri Dios xtu'on chica ri kapan y ri vay chi xca'q'uis. Mare' ri ka-cuerpo man otz ta nic'ujie' riq'uin jun chic y xa man oj-c'ulan ta riq'uin. Ri ka-cuerpo can richin ri Ajaf Dios y jaja' can richin ri ka-cuerpo. 14Y inche'l xu'on ri Dios cha ri Ajaf Jesús chi xc'astaj-el chiquicajol ri quiminaki', quire' je' xtu'on chika ojre'. Xkojruc'asuoj riq'uin ri ru-poder. 15¿Man ivata'n ta c'a chi ri i-cuerpo can ruk'a-rakan ri Cristo? ¿Otz came chi nquixiel-el riq'uin jaja' y nquixuoc ruk'a-rakan jun ramera? Man otz ta. 16¿O man ivata'n ta c'a chi xa jun nuc'uaj-ri' riq'uin jun ramera, xa jun cuerpo nu'on riq'uin? Inche'l nu'ej chupan ri ruch'ab'al ri Dios ri tz'ib'an can: Ri ache y ri ixok xa jun cuerpo xtiqui'an ri ica'ye'. Quire' ri tz'ib'an can. 17Pero ri c'o riq'uin ri Ajaf, xa jun espíritu rub'anun riq'uin jaja'. 18Man ticanuj-ivi' chi nti'an pecado. Ruma nic'aj chic pecado nu'on ri ache, c'o juviera ri ru-cuerpo, pero ri nucanuj jun ixok chi nu'on pecado riq'uin, can chirij mismo ri ru-cuerpo nu'on pecar. 19¿Man ivata'n ta c'a chi ri i-cuerpo can ru-templo ri Espíritu Santo? Jaja' patanak riq'uin ri Dios, y pa tak ivánima c'o-ve. Y rumare' ri i-cuerpo man ivichin ta ixre'. 20Ri Dios q'uiy xuya' chi xixrulok'. Rumare' ri i-cuerpo y ri iv-espíritu can ticusaj chi ntiya' ruk'ij ri Dios, ri can i-richin chic jaja'.

will be added

X\