1 Corintios 5

1Can alanak rub'ixic ri b'anatajnak chicajol, ruma c'o jun ruc'amun-ka ri ruyajtie'. Pero ni xa ta chiquicajol ri vinak ri man cata'n ta roch ri Dios man niqui'an ta re'. 2¡Y c'a ntina' chi ix nima'k tak vinak! Más otz quixb'isuon y quixuok' y tivalasaj-el chicajol ri chica xb'ano quire'. 3Inre' man inc'o ta apa iviq'uin, pero ri nu-espíritu can c'o-apa iviq'uin. Y rumare' inre' ya xin'an juzgar ri jun ri quire' rub'anun. 4Y pa rub'e' ri Kajaf Jesucristo, antok xtimol-ivi', y ri nu-espíritu can xtic'ujie-apa iviq'uin, ri Kajaf Jesucristo can xtuya' poder pan ik'a', 5y tivalasaj-el chicajol, tijach pa ruk'a' ri Satanás chi quire' xtu'on sufrir chi xtuya' can ri itziel rub'anun, pero man xti'a ta pa k'ak', xa xticolotaj ri ru-espíritu chupan ri k'ij antok ri Ajaf Jesús xtipa chic. 6Man otz ta chi ixre' ntina' chi ix nima'k tak vinak. Ixre' ivata'n chi antok ntiya' lugar cha ri pecado, can cha'nin niq'uiyir chicajol. Can inche'l nu'on ri levadura, xa riq'uin jub'a' nuquiraj-ri' chupan nojiel ri harina mub'an. 7Rumare' tivalasaj-el nojiel ri pecado ri c'o chicajol, chi quire' nquixuoc inche'l jun c'ac'ac' harina mub'an ri manak levadura riq'uin. Ixre' xa sak chic ri ic'aslien, ruma ri Cristo xcon choch cruz. Antok jaja' xquimisas, x'an cha inche'l ni'an chica ri alaj tak ovejas ri nca'quimisas pa tak namak'ej Pascua. 8Kab'ana' c'a ri kanamak'ej Pascua ri can ketzij. Man nakac'ux ta simíta ri c'o levadura riq'uin. Kab'ana' cuenta-ki' choch ri pecado. Kaya' can nojiel itziel tak kax ri nca'ka'an. Y can ketzij ta nojiel ri naka'an y ri naka'ej, man ta riq'uin ca'ye' kapalaj. 9Chupan ri carta ri xintak-el iviq'uin, xin'ej-el chiva chi man tivuc'uaj-ivi' quiq'uin ri niquicanuj-qui' chi niqui'an pecado. 10Y antok inre' xin'ej quire', man xich'o' ta chiquij ri man i-c'ulan ta ri man quiniman ta ri Jesucristo, ri niquicanuj-qui' chi niqui'an pecado. Man xich'o' ta je' chiquij ri man quiniman ta ri Jesucristo ri nicajo' chi nojiel kax quiq'uin ta ijeje' c'o-ve, ri nca'lak', y ri niquiya' je' quik'ij ri ídolos. Man chiquij ta ri vinak re' xich'o-ve, ruma xa man nakajo' ta nkojc'ujie' quiq'uin ri vinak quire', nic'atzin chi kojiel-el vave' choch-ulief. 11Ri xinvajo' xin'ej chiva ixre' chupan ri carta re', ja chi man tivuc'uaj-ivi' quiq'uin ri man i-c'ulan ta ri niqui'ej chi i-hermanos ri niquicanuj-qui' chi niqui'an pecado. Quire' je' quiq'uin ri nicajo' chi nojiel ta kax quiq'uin ta ijeje' c'o-ve, ri nca'yo'n quik'ij ri ídolos, ri itziel nca'ch'o' chiquij nic'aj chic, ri nca'k'ab'ar, y ri nca'lak'. Xa ijeje' niqui'ej chi i-hermanos pero xa niqui'an ri pecados ri inche'l re', ixre' ni xa ta quixva' quiq'uin. 12Pero ri vinak ri man quiniman ta ri Cristo, man pa nuk'a' ta inre' c'o-ve chi ni'an juzgar ri chica quib'anun pa quic'aslien. Xa ja ri hermanos ri niqui'an pecados nic'atzin chi nqui'tz'at, ruma ijeje' chicajol ic'o-ve. 13Ri vinak ri man quiniman ta y man chicajol ta ic'o-ve, ja ri Dios xtib'ano juzgar quichin. Pero ri hermano re' ri c'o chicajol y nu'on pecado, tivalasaj-el chicajol.

will be added

X\