1 Corintios 4

1Rumare' ixre' nic'atzin chi nkojitz'at chi ojre' xa jo'c oj rusamajiel ri Cristo, y yo'n pa kak'a' chi nakatzijuoj ri c'o pan aval riq'uin ri Dios ojier can tiempo. 2Ruma ri aj-samajiel ri i-yo'n paro' jun samaj ruma ri Dios, can nic'atzin chi niqui'an nojiel ri samaj ri inche'l nrajo' jaja'. 3Pero inre' ni'ej, xa otz o man otz ta nitz'iet ri nusamaj, man jun chica xtinna' inre'. Y xa c'o jun juez richin ri roch-ulief nu'on juzgar ri nusamaj, man jun chica je' xtinna'. Hasta inre' man nquitiquir ta ni'ej xa otz o man otz ta ni'an cha ri samaj. 4Inre' nina' chi otz nub'anun cha ri samaj. Pero man ruma ta re' nquitiquir ni'ej chi nojiel ri nub'anun, can otz. Ja ri Ajaf ri xti'e'n xa otz xin'an cha o xa man otz ta. 5Rumare' man ti'an juzgar vacame ri chica nqui'tz'at. Más otz tivoyo'iej ri k'ij antok xtipa chic jun b'ay ri Ajaf Jesús. Jaja' xca'ralasaj-pa pa sakil nojiel ri i-kab'anun ri man nca'k'alajin ta, y xtu'ej ri ic'o riq'uin kánima. Y entonces ri Dios xtuya' kak'ij chikajunal. 6Mare' hermanos, xincusaj-ka-vi' y xincusaj ri Apolos richin ejemplo, ruma nivajo' chi ni'ka pan ive' otz (nti'an entender otz) ri i-tz'ib'an can chupan ri ruch'ab'al ri Dios. Man jun tib'ano chi c'o más ruk'ij y nukasaj quik'ij ri nic'aj chic. 7Ixre' ri ntina' chi c'o altíra ik'ij, ¿chica x'e'n chiva chi ja ixre' ri más c'o ik'ij? ¿C'o came jun kax ri c'o iviq'uin ixre' ri man ja ta ri Dios ya'yuon-pa chiva? Y xa quire', man jun nic'atzin chi iyuon ixre' nti'an-ka chi altíra ik'ij. 8Ixre' ntina' chi man jun chic kax más xtivajo' ruma c'o chic nojiel kax iviq'uin. Can ix b'ayuon chic ntina'. Can ix reyes chic ntina' y ojre' man nkojc'atzin ta chic chiva. ¡Ja'al ta xa ta quire', chi quire' ojre' je' naka'an gobernar iviq'uin! 9Inre' ni'ej chi ri Dios rub'anun chika ojre' ri apóstoles chi manak-oc kak'ij chiquivach quinojiel. Xa oj inche'l achi'a' ri e'n chic chica chi nca'quimisas. Ruma nca'ca'y chikij ri ángeles y ri vinak vave' choch-ulief. 10Chivach ixre', ojre' can oj-nacanak ruma naka'an ri rusamaj ri Cristo, y ixre' can altíra ino'j iviluon riq'uin ri Cristo. Chivach ixre', ojre' manak kachuk'a', y ixre' can altíra ivuchuk'a'. Ojre' can man jun kak'ij, y ixre' can altíra ik'ij. 11Ojre' nakak'asaj vi'jal, nichakej kachi', manak katziak, nkojch'ay, y manak kachuoch. 12Ojre' can nkojcuos ruma altíra nkusamaj chi nakach'ec kavay. Y antok ic'o ri itziel niqui'ej chika, ojre' can nakac'utuj ri ru-bendición ri Dios pa quive'. Y antok c'o pakon tak kax ri niqui'an ri vinak chika, ojre' can nakacoch'. 13Antok itziel nca'ch'o' chikij, ojre' ja ri otz ri naka'ej. Can b'anun chika xa oj inche'l mies y xa oj inche'l tz'il chiquivach quinojiel. 14Ri nitz'ib'aj chiva, man richin ta chi niya' iq'uix. Xa richin nquixch'olij, ruma ixre' can ix inche'l valc'ual y altíra nquixvajo'. 15Inre' ri xitzijuon ri evangelio chiva na'ay. Ixre' xinimaj ri Cristo Jesús ruma ri xintzijuoj chiva, y rumare' inre' xinuoc inche'l itata'. Y mesque ic'o ta diez (lajuj) mil ri nca'tijuon ivichin chirij ri Cristo, jo'c inre' ri inche'l itata'. 16Y rumare' nic'utuj favor chiva chi tivuc'uaj jun c'aslien otz, inche'l ri nuc'aslien inre'. 17Rumare' xintak-el ri Timoteo iviq'uin, ri altíra nivajo' y vata'n chi can ruyo'n ránima riq'uin ri Ajaf, y rumare' can inche'l valc'ual nina'. Jaja' ri xtinatan chiva ri chica c'aslien vuc'uan y quire' ri nic'ut chiquivach quinojiel ri iglesias ri ic'o diferentes lugares. 18Ic'o chicajol ri can c'o quik'ij niquina-qui' y rumare' niqui'ej chi inre' man nivajo' ta chic nquinalka iviq'uin chi nquixb'atz'ata'. 19Pero inre' ya nquinalka iviq'uin, xa quire' nrajo' ri Ajaf. Y antok xquinalka, man ja ta ri quitzij ri xtinva'xaj. Ri nivajo' nivatamaj a ver xa ketzij chi c'o ri ru-poder ri Dios quiq'uin. 20Ruma ri ru-reino ri Dios man jo'c ta tzij, sino can c'o ri ru-poder. 21Antok inre' xquinalka iviq'uin, ¿chica ntivajo' ixre' chi ni'an chiva? ¿Ntivajo' chi cof xquinalch'o' chiva, o ntivajo' chi riq'uin amor y akal-oc xquich'o' chiva?

will be added

X\