1 Corintios 3

1Hermanos, antok xic'ujie' iviq'uin, manak che'l xich'o' chiva inche'l chica ri i-uc'uan ruma ri Espíritu Santo. Sino xich'o' chiva inche'l chica ri vinak ri xa ja ri niquirayij ri niqui'an, xa c'a ix inche'l ac'ola'. 2Jo'c ri tzij ri man cuesta ta ri xin'ej chiva, ruma maja' ti'ka pan ive' (ti'an entender) ri nivajo' nic'ut chivach. Ixre' ix inche'l ac'ola' ri c'a nca'tz'uman y maja' nca'tiquir niquic'ux vay. C'a quire' ib'anun ixre'. 3Ixre' xa ja ri ntirayij, xa jare' ri nti'an; man otz ta ntitz'at jun ri otz c'o; c'o ayoval chicajol; y ri ic'aslien xa junan c'a riq'uin ri quic'aslien ri vinak ri manak ri Espíritu Santo quiq'uin. 4Ruma ic'o ri nca'e'n: Inre' in richin ri Pablo, y ic'o ri nca'e'n: Inre' in richin ri Apolos. ¿Man k'alaj ta came chi ja ri ntirayij ixre' ri nti'an? 5¿Chica came ri Apolos, y chica came ri Pablo? Ijeje' i-rusamajiel ri Dios. Ri Ajaf Dios xucha' ri Apolos y xucha' je' ri Pablo chi xquitzijuoj ri ruch'ab'al chiva, y rumare' xinimaj. 6Inre' xintic ri ruch'ab'al ri Dios riq'uin ivánima. Ri Apolos xu'on inche'l xuya'j ri ch'ab'al re'. Pero ja ri Dios ri xb'ano chi xq'uiy pa tak ic'aslien. 7Ruma c'a re' ri xtico y ri inche'l xya'n ri ch'ab'al re', man jun quikalien, ruma ja ri Dios ri xb'ano chi xq'uiy ri ruch'ab'al riq'uin ivánima. 8Y ri nitico y ri inche'l nuya'j ri ruch'ab'al ri Dios, can junan, mesque chiquijunal xtiyo'x ruc'axiel chica ruma ri samaj ri xqui'an. 9Ruma ojre' oj rusamajiel ri Dios, y ixre' ix inche'l rulief ri Dios ri nisamaj choch. Ixre' je' ix inche'l jun jay ri nu'on ri Dios. 10Y inre' xa ruma ri ru-favor ri Dios antok xinuoc inche'l jun utzulaj b'anoy-jay. Y antok xintzijuoj ri ruch'ab'al ri Dios chiva, can inche'l xinya-ka ri ab'aj richin ri cimiento. Pero man ja ta inre' nquipab'an ri jay. Xa nic'aj chic ri xca'pab'an ri jay. Y quinojiel ri xca'samaj chi niquipab'a' ri jay, can tiquitz'ata' otz chi quire' ja'al rub'anic niqui'an cha. 11Ruma man jun chic nicovin xtiyo'n jun chic cimiento paro' ri c'o, y re' ja ri Jesucristo. 12Y paro' ri cimiento re', ic'o ri xtiquicusaj oro chi niqui'an ri jay; ic'o ri xtiquicusaj plata; y ic'o ri xca'quicusaj nic'aj chic ab'aj ri can altíra quikalien. Y ic'o nic'aj chic xa chie', q'uin y k'ayis xtiquicusaj. 13Pero xtalka ri k'ij antok xtik'alajin-pa ri kasamaj chikajunal xa otz o man otz ta, ruma xtitojtob'ax cha k'ak'. 14Y xa ri jay ri xkapab'a' paro' ri cimiento xtucoch' ri k'ak' y man xtic'at ta, chika ojre' xtiyo'x ruc'axiel ruma ri samaj ri xka'an. 15Pero xa xtic'at ri jay ri xkapab'a', man jun ruc'axiel xtiyo'x chika. Ojre' xkojcolotaj, pero ri samaj ri xka'an xa xtic'at. 16¿Man ivata'n ta c'a chi ix ru-templo ri Dios? ¿Man ivata'n ta c'a chi ri Ru-Espíritu ri Dios c'o iviq'uin? 17Xa c'o jun ri nuvulij ri ru-templo ri Dios, ri Dios xtuya' nem castigo paro'. Ruma ri ru-templo ri Dios can santo, y ri templo re' ixre'. 18Man ti'an engañar-ivi', xa c'o jun chicajol ri nuna' chi c'o q'uiy runo'j choch-ulief, tub'ana' chi man jun oc rata'n, chi quire' niril ri ketzij no'j. 19Ri no'j richin ri roch-ulief xa man jun rakalien choch ri Dios, inche'l nu'ej chupan ri ruch'ab'al ri tz'ib'an can: Ri Dios nca'rutz'om ri vinak ri altíra quino'j, y can ja mismo ri quino'j nca'tzako quichin. 20Y nu'ej je': Ri Ajaf rata'n ri chica niqui'an pensar ri vinak ri c'o quino'j, rata'n chi xa man jun rakalien. Quire' ri tz'ib'an can. 21Mare' man ti'an chi jo'c jun ri c'o ruk'ij chivach, ruma nojiel xa can ivichin ixre'. 22Ivichin ixre' ri Pablo, ri Apolos, ri Pedro, ri roch-ulief, ri c'aslien, ri camic, ri ntitz'at vacame y ri chakavach-apa. Can nojiel ivichin ixre'. 23Y ixre' ix richin ri Cristo, y ri Cristo richin ri Dios.

will be added

X\