1 Corintios 2

1Hermanos, antok xib'aka iviq'uin, man xincusaj ta ri no'j richin ri roch-ulief chi xintzijuoj ri ruch'ab'al ri Dios chiva, ni man xincusaj ta je' ja'al tak tzij. 2Ruma inre' xin'ej pa vánima, chi jo'c ri Jesucristo y ri rucamic choch ri cruz ri xintzijuoj chiva. 3Y antok xic'ujie' iviq'uin, xinna' chi manak vuchuk'a'. Xa altíra xinxi'ij-vi', can xinna' chi inche'l man nquitiquir ta ni'an ri samaj inche'l nrajo' ri Dios. Y rumare' hasta xib'arb'uot. 4Y antok xintzijuoj ri ruch'ab'al ri Dios chiva, man xincusaj ta quino'j vinak, ni man xincusaj ta utzulaj tak tzij, xa can ja ri Espíritu Santo y ri ru-poder ri Dios ri xto'n vichin. 5Chi quire' ri icukb'al c'u'x nic'ujie' riq'uin ri ru-poder ri Dios y man riq'uin ta ri quino'j ri vinak. 6Mesque quire', ojre' can c'o-ve no'j nakac'ut chiquivach ri hermanos ri i-q'uiynak chic chupan ri quic'aslien choch ri Dios. Pero ri nakac'ut chiquivach man richin ta ri roch-ulief, ni man quichin ta ri gobernadores ri ic'o choch-ulief, ri c'o jun k'ij ri xa nca'q'uis. 7Ri no'j ri nakac'ut ojre', ja ri runo'j ri Dios ri man k'alaj ta ranun-pa. Ri Dios c'a maja' tu'on ri roch-ulief antok xu'on yan pensar chi nkojb'ac'ujie' chicaj riq'uin jaja' y nic'ujie' kak'ij riq'uin. 8Ri gobernadores choch-ulief man xcatamaj ta ri ranun-pa pensar ri Dios. Ruma xa ta xcatamaj, man ta xquiquimisaj choch cruz ri Cristo ri Ajaf ri c'o ruk'ij. 9Can inche'l ri nu'ej chupan ri ruch'ab'al ri Dios ri tz'ib'an can: Kax ri man jun tz'atayuon, ni c'axayuon, ni man jun b'anayuon pensar, jare' ri ranun preparar ri Dios chi nuya' chica ri nca'jo'n richin. Quire' nu'ej ri tz'ib'an can. 10Pero ja ri Dios x'e'n chika por medio ri Espíritu Santo. Ruma ri Espíritu Santo can rata'n nojiel; rata'n hasta ri namalaj tak kax ri nca'ru'on pensar ri Dios. 11¿C'o came jun vinak rata'n ri chica nu'on pensar jun chic vinak? Jo'c ri ru-espíritu jaja' ta'mayuon ri chica nu'on pensar. Y quire' mismo man jun ta'mayuon ri chica nu'on pensar ri Dios, jo'c ri Ru-Espíritu jaja'. 12Y ojre' ja ri Espíritu re' ri yo'n chika, ri patanak riq'uin ri Dios, y man ja ta ri espíritu richin ri roch-ulief, chi nakatamaj nojiel ri chica nuya-pa ri Dios chika. 13Y antok nkutzijuon, man nakacusaj ta tzij c'utun cuma vinak. Xa ja ri tzij ri patanak riq'uin ri Espíritu Santo ri nca'kacusaj, chi naka'ej ri nca'ruc'ut jaja' chakavach. 14Ri vinak ri manak ri Ru-Espíritu ri Dios quiq'uin, man niquic'an ta ri patanak riq'uin ri Espíritu re'. Ruma chiquivach ijeje' man jun nic'atzin-ve, y man ni'ka ta pa quive' (man niqui'an ta entender). Ruma jo'c ri c'o ri Ru-Espíritu ri Dios quiq'uin, ni'ka pa quive' (niqui'an entender) y cata'n chi c'o rakalien ri patanak riq'uin ri Espíritu re'. 15Ojre' ri oj-uc'uan ruma ri Espíritu Santo nkojtiquir naka'ej ri chica c'o rakalien y ri chica man jun rakalien. Pero man jun xti'e'n chika chi man otz ta ri naka'an. 16Ruma ¿c'o came jun vinak ri rata'n ri chica nu'on pensar ri Ajaf Dios? ¿O c'o came jun ri nitiquir nu'ej cha ri Dios ri chica otz chi nu'on? Pero ojre' c'o chic runo'j ri Cristo kiq'uin.

will be added

X\