1 Corintios 16

1Y vacame nivajo' nquich'o' chirij ri ofrenda ri ntimol quichin ri santos hermanos. Tib'ana' inche'l ri nu'e'n chica ri iglesias ri ic'o Galacia. 2Ri na'ay k'ij richin nojiel semana, ixre' tiyaca' yan apa ri jane' (jaro') nquixtiquir ntiya', según ri ntich'ec. Quire' tib'ana' richin quire' antok inre' xquinalka, manak chic ofrenda xtimol. 3Y antok xquinalka, ixre' ri xquix'e'n ri chica xca'c'uan ri iv-ofrenda. Tib'ana-el qui-cartas chi quire' k'alaj chi ijeje' ri xa'icha-el ruma ivata'n quivach, y ijeje' ri xca'ntak-el inre', chi nca'a Jerusalén. 4Y xa nic'atzin chi nqui'a inre' je', can nqui'a, y ijeje' xca'a viq'uin. 5Inre' nivajo' nquinak'ax na'ay Macedonia y c'ajare' xquib'aka iviq'uin ixre'. 6Nub'anun pensar chi antok xquinalka, nquilayuj-el b'a' iviq'uin, o xtink'asaj ri tiempo richin tief iviq'uin. Y antok xquiniel-el iviq'uin, nivajo' chi nquinito-el riq'uin ri nic'atzin chuva richin ri nub'iey ri chica-na lugar xqui'a-ve. 7Vacame, man nivajo' ta yan nquib'aka iviq'uin, ruma man nivajo' ta chi jutz'it-oc tiempo nquic'ujie' iviq'uin. Inre' can nivajo' nquilayuj-el b'a' iviq'uin, vi xa nu'on permitir ri Ajaf. 8Pero inre' c'a nivajo' nquic'ujie' Efeso, c'a tak'ax-na ri namak'ej Pentecostés. 9Ruma ri vave' Efeso, ri Dios rujakuon jun nem puerta chinoch chi ni'an ri rusamaj y c'o q'uiy otz nuc'am-pa ri samaj re'. Pero iq'uiy quiyoval chuvij. 10Xa xtalka ri Timoteo iviq'uin, can ja'al tib'ana' recibir. Jaja' rusamaj ri Ajaf nu'on, inche'l ni'an inre'. Rumare' otz titz'ata', chi quire' otz xtuna' chicajol. 11Man ta xti'an cha chi man jun rakalien. Y antok xtiel-pa iviq'uin, tiya-pa ri nic'atzin cha richin ri rub'iey, chi quire' can ta c'o paz riq'uin antok xtitzalaj-pa, ruma inre' xtinvoyo'iej-apa quiq'uin ri hermanos. 12Y chirij ri hermano Apolos, ni'ej chiva chi altíra xin'an rogar choch chi ti'a quiq'uin ri hermanos ri nca'a iviq'uin. Pero man xrajo' ta ni'a vacame; xa xti'a antok xtirajo'. 13Hermanos, tib'ana' cuenta ri ic'aslien y can ticukub'a' ic'u'x riq'uin ri Dios siempre. Man quixtzalaj chivij, y man tixi'ij-ivi'; xa can cof quixc'ujie' y ticusaj ri poder ri ruyo'n ri Dios chiva. 14Y nojiel ri nti'an, can riq'uin amor tib'ana'. 15Hermanos, ixre' ivata'n chi ri Estéfanas y ri ru-familia, ijeje' ri na'ay xquinimaj ri Cristo chire' chupan ri lugar Acaya, y ijeje' can riq'uin nojiel cánima nca'qui'an servir ri santos hermanos. 16Y ni'an rogar chiva chi quixniman chica ijeje', chica je' quinojiel ri inche'l ijeje', ri nca'to'n y niqui'an rusamaj ri Dios. 17Inre' altíra nquiquicuot quiq'uin ri Estéfanas, ri Fortunato y ri Acaico, ri xi'tak-pa viq'uin, ruma ijeje' quib'anun chuva inche'l can ixc'o-pa viq'uin nina'. 18Ruma ijeje' xalquiya' ruchuk'a' ri nu-espíritu, y quire' je' mismo xina' ixre'. Ruma c'a re', can qui'iya' pa cuenta ijeje' y ri nic'aj chic ri can inche'l ijeje'. 19Ri iglesias ri ic'o Asia niquitak-el jun saludo chiva. Y quire' je' ri Aquila y ri Priscila y ri iglesia ri c'o pa cachuoch niquitak-el q'uiy saludo chiva pa rub'e' ri Ajaf. 20Quinojiel c'a ri hermanos niquitak-el jun saludo chiva. Tib'ana' saludar-ivi' chib'il-ivi' y titz'ub'aj ichi' pa rub'e' ri Ajaf Dios. 21Inre' Pablo riq'uin nuk'a' nitz'ib'aj-el va saludo va. 22Y xa c'o jun ri man nrajo' ta ri Ajaf Jesucristo, tika ri castigo paro'. Ri Ajaf xa ya nipa chic. 23Ja ta ri ru-favor ri Ajaf Jesucristo tic'ujie' iviq'uin. 24Inre' altíra nquixvajo' ixvonojiel, ruma oj konojiel xa oj richin chic ri Cristo Jesús. Amén.

will be added

X\