1 Corintios 14

1Can katija' kak'ij chi nca'kajo' ri vinak riq'uin nojiel kánima. Y karayij je' riq'uin nojiel kánima ri dones ri nuya' ri Espíritu Santo chika. Pero ri más karayij, ja chi ri Espíritu Santo nu'on chika chi naka'an profetizar. 2Ruma ri nich'o' jun chic ch'ab'al ri ruyo'n ri Espíritu Santo cha, xa cha ri Dios nich'o-ve y man chica ta ri vinak. Ri nu'ej, ja ri Espíritu Santo ri ni'e'n cha, pero re' man jun nib'ano entender. 3Pero ri nu'ej ri ni'e'x cha ruma ri Dios, can nu'on chica nic'aj chic chi niq'uiy quic'aslien choch ri Dios, y chi nic'ujie' je' ruchuk'a' cánima, y chi nca'ru'on consolar. 4Ri nich'o' nic'aj chic ch'ab'al ri ruyo'n ri Espíritu Santo cha, ruyuon niq'uiy ruc'aslien. Pero ri nu'ej ri ni'e'x cha ruma ri Dios, y nu'ej cha ri iglesia, can nu'on chi niq'uiy quic'aslien choch ri Dios. 5Ri nirayij inre', ja ta chi ixvonojiel nquixch'o' nic'aj chic ch'ab'al, pero ri más nivajo', ja chi ri Espíritu Santo nu'on ta chiva chi nquixtiquir nti'ej ri ni'e'x chiva ruma ri Dios. Ri nca'ch'o' nic'aj chic ch'ab'al, otz ri niqui'an; pero más otz niqui'an ri niqui'ej ri ni'e'x chica ruma ri Dios. Pero xa c'o jun ri nich'o' jun chic ch'ab'al, y nu'ej je' chica nu'ej, ri iglesia niq'uiy quic'aslien choch ri Dios. 6Ruma xa ta inre' nquib'aka iviq'uin ixre' hermanos, y jun chic ch'ab'al nquib'ach'o' iviq'uin, man jun xtic'atzin ri xtin'ej, ruma man xti'ka ta pan ive' (man xti'an ta entender). Pero xa pan ich'ab'al ixre' nquich'o-ve y ni'ej ri ni'e'x chuva ruma ri Dios, ixre' can xti'ka pan ive' (xti'an entender). Y quire' je' xa nquixtijuoj, c'o ntivatamaj; o xa ni'ej chiva ri x'e'x chuva ruma ri Dios; o xa nic'ut ri ruch'ab'al ri Dios, nojiel re' c'o xtic'atzin chiva. 7Ri kaxpe' ri nca'k'ojomax inche'l ri flauta o ri arpa, xa man otz ta nik'ojomax, ¿k'alaj came ri b'ix ri nik'ojomax-pa cha ri flauta o ri arpa? 8Y xa ri nixupun ri trompeta chi nca'rumol ri soldados chi nca'a pa guerra, jo'c nuxupuj ri trompeta y man ja ta ri rukul nu'on cha, ¿niquimol came qui' ri soldados? 9Quire' ixre' xa man nquixch'o' ta jun ch'ab'al ri ni'ka pa quive' (niqui'an entender) ri vinak; antok nquixch'o', man xti'ka ta pa quive' (man xtiqui'an ta entender), xa cha ri cak'iek' xquixch'o-ve. 10Q'uiy roch ch'ab'al ri nca'cusas vave' choch-ulief, y quinojiel ch'ab'al can c'o-ve ri niqui'ej. 11Pero xa c'o jun vinak ri man vata'n ta ruch'ab'al, y jaja' nrajo' nich'o' viq'uin y inre' xa man ni'ka ta pano' (man ni'an ta entender) ri nu'ej chuva, choch jaja' xa man in ruvanakil ta, ruma man ni'ka ta pano' (man ni'an ta entender) ri nu'ej. Y quire' je' jaja' chinoch inre'. 12Quire' ixre'; xa altíra nca'irayij ri dones ri nuya' ri Espíritu Santo, can otz, pero tirayij chi ri dones ri nuya' ri Espíritu Santo nu'on cha ri iglesia chi niq'uiy ri quic'aslien choch ri Dios. 13Rumare' xa jun nich'o' jun chic ch'ab'al, tuc'utuj cha ri Dios chi nitiquir nu'ej chica nu'ej ri ch'ab'al re'. 14Ruma xa inre' ni'an orar jun chic ch'ab'al, xa ja ri nu-espíritu nu'on orar; pero inre' man jun ni'ka pano' (ni'an entender). 15Y xa quire', ¿chica came otz ri ni'an? Ri nub'anun pensar ni'an antok ni'an orar, can nicusaj nu-espíritu y nuno'j je' chi ni'ka pano' (ni'an entender) ri ni'ej. Y quire' je' ni'an antok nquib'ixan, nicusaj nu-espíritu y nuno'j. 16Ruma xa atre' jo'c riq'uin av-espíritu naya' tiox b'a' cha ri Dios, ¿che'l xtiqui'ej Amén ri nca'c'axan avichin? ruma man xi'ka ta pa quive' (man xqui'an ta entender). 17Ri tiox b'a' ri xaya' jun chic ch'ab'al, altíra otz, pero ri xa'c'axan avichin man jun xi'ka pa quive' (xqui'an entender) chi niq'uiy ta jub'a' quic'aslien choch ri Dios. 18Inre' niya' tiox b'a' cha ri Dios ruma ri Espíritu Santo rusipan chuva chi nquich'o' nic'aj chic ch'ab'al, más que chivach ixvonojiel ixre'. 19Pero antok inre' nquib'aka pan iglesia, prefiero ni'ej vu'uo' tzij riq'uin nuno'j, chi nic'ut, que choch ni'ej ta diez (lajuj) mil tzij chica y xa man ni'ka ta pa quive' (man niqui'an ta entender), ruma xa jun chic ch'ab'al nquich'o-ve. 20Hermanos, man ti'an pensar inche'l ac'ola', can tib'ana' pensar otz. Pero otz nti'an inche'l ri xulu', ri man cata'n ta niqui'an pecado. 21Chupan ri ruch'ab'al ri Dios ri tz'ib'an can, nu'ej: Inre' xquich'o' jun-ve chic ch'ab'al y xca'ncusaj nic'aj chic vinak ri man junan ta nca'ch'o' quiq'uin ri israelitas, chi xquich'o' chica ri israelitas. Pero mesque quire' xtin'an, ijeje' man xticajo' ta xtica'xaj ri xtin'ej chica. Quire' nu'ej ri Ajaf. 22Y mare' antok ri Dios nu'on chika chi nkuch'o' nic'aj chic ch'ab'al, re' richin señal, pero man chiquivach ta ri quiniman chic ri Dios, xa chiquivach ri man quiniman ta ri Dios. Pero antok ojre' naka'ej ri ni'e'x chika ruma ri Dios, re' jun señal kichin ojre'; man quichin ta ri man quiniman ta ri Dios. 23Xa ta imaluon-ivi' ri ni'e'x iglesia chiva y ixvonojiel nquixch'o' nic'aj chic ch'ab'al, y jare' antok nca'b'aka iviq'uin ri man q'uiy ta cata'n chirij ri ruch'ab'al ri Dios, o nca'b'aka ri man quiniman ta ri Dios, ¿man came niqui'ej ta chiva chi ix ch'u'j? 24Pero xa ta ixvonojiel nti'ej ri ni'e'x chiva ruma ri Dios, antok ntuoc jun iviq'uin ri man runiman ta ri ruch'ab'al ri Cristo o ntuoc jun ri man q'uiy ta rata'n chirij ri ruch'ab'al ri Dios, jaja' xtuna' chi aj-b'anoy-pecado y xtuna' je' chi ixvonojiel nquix'e'n cha chi aj-b'anoy-pecado. 25Can nojiel ri ravan pa ránima xca'iel-pa choch sakil, y jaja' xtixuquie-ka y xtuya' ruk'ij ri Dios, y xtu'ej chi ketzij chi c'o ri Dios chicajol. 26¿Chica came nic'atzin nti'an ixre' hermanos? Antok ntimol-ivi', ic'o ri nca'b'ixan, ic'o ri nca'quitijuoj nic'aj chic riq'uin ri ruch'ab'al ri Dios, ic'o ri nca'e'n ri ni'e'x chica ruma ri Dios, ic'o ri nca'ch'o' nic'aj chic ch'ab'al ri ruyo'n ri Espíritu Santo chica, ic'o ri niqui'ej ri nca'qui'ej nic'aj chic antok nca'ch'o' nic'aj chic ch'ab'al ri rusipan ri Espíritu Santo chica. Can tib'ana' nojiel re' chi niq'uiy más quic'aslien ri iglesia choch ri Dios. 27Xa ic'o nca'ch'o' nic'aj chic ch'ab'al, can jo'c ica'ye' o iyoxe' ri nca'ch'o' antok ntimol-ivi'. Y chi jujun ca'ch'o', y jun ti'e'n chica nu'ej ri ch'ab'al re'. 28Y xa man jun nitiquir ni'e'n ri chica niqui'ej ri nic'aj chic ch'ab'al, man ca'ch'o' nic'aj chic ch'ab'al chiquivach ri quimaluon-qui'. Xa nca'ch'o-ka pa cánima y cha ri Dios. 29Quire' je' ri profetas, ca'ch'o' ica'ye' o iyoxe'. Y ri nic'aj chic tiquib'ana' pensar ja'al ri ni'e'x, xa riq'uin ri Dios patanak-ve o xa manak. 30Y xa c'o jun ri nu'ej ri e'n cha ruma ri Dios, y jare' antok c'o chic jun ri tz'uyul ri c'o ni'e'x cha ruma ri Dios; titanie-ka ri na'ay. 31Ruma man jo'c ta jun ri nitiquir nu'ej ri ni'e'x cha ruma ri Dios, can ixvonojiel nquixtiquir nti'ej ri ni'e'x chiva, pero chi jujun tib'ana' chi quire' quinojiel nicatamaj ri nic'atzin chica chupan ri quic'aslien choch ri Dios. 32Ruma ri profetas nca'tiquir niquiyo'iej-qui'. Ijeje' nca'tiquir niquik'at ruchuk'a' ri cánima. 33Ruma ri Dios man jun kax nu'on ri man ta pa ruchojmil. Ruma ri Dios nuya' paz. Ixre' tib'ana' inche'l niqui'an ri santos hermanos ri niquimol-qui' nic'aj chic tanamet. 34Antok ntimol-ivi', ri ixoki' man ca'ch'o-apa, ruma man yo'n ta permiso chica chi ca'ch'o-apa, tiquinimaj inche'l nu'ej ri ley. 35Y xa ri ixoki' nicajo' nicatamaj, tiquic'utuj chica ri cachajil chicachuoch. Ruma man otz ta chi jun ixok nich'o' antok quimaluon-qui' chi niquiya' ruk'ij ri Dios. 36¿Acaso iviq'uin ixre' alanak-el ri ruch'ab'al ri Dios o jo'c iviq'uin ixre' xalka-ve? 37Rumare', xa c'o jun nu'ej chi profeta o nu'ej chi uc'uan ruma ri Espíritu Santo, jaja' xtu'ej chi ri xin'ej inre' chiva can ru-mandamiento ri Dios. 38Y xa ic'o ri man nicajo' ta niquinimaj ri xin'ej, man tinimax je' ri niqui'ej ijeje'. 39Rumare' hermanos, can riq'uin nojiel ivánima tirayij chi ri Espíritu Santo nusipaj chiva chi nti'ej ri ni'e'x chiva ruma ri Dios. Y man qui'ik'at ri nca'ch'o' nic'aj chic ch'ab'al ri rusipan ri Espíritu Santo chica. 40Y nojiel c'a tib'ana' pa rub'ayal y pa ruchojmil.

will be added

X\