1 Corintios 13

1Xa ta inre' nquich'o' q'uiy roch ch'ab'al vave' choch-ulief, o quich'ab'al ta ángeles, y xa manak amor viq'uin, xa in junan riq'uin jun ch'ich' ri nitzinin o jun k'ajuon ri altíra nik'ajan. 2Y xa ni'ej ta ri ni'e'x chuva ruma ri Dios, o xa ni'ka ta pano' (ni'an ta entender) nojiel runo'j ri Dios ri man k'alaj ta ranun-pa, o xa ni'ka ta pano' (ni'an ta entender) nojiel no'j, o ruma ta nucukub'an nuc'u'x riq'uin ri Dios, ruma ta re' nquitiquir ni'an chica ri nima'k tak juyu' chi ca'iel-el pache' ic'o-ve, y mesque ni'an nojiel re', pero xa manak amor viq'uin, man jun nquinuoc-ve. 3Y xa ta niya' nojiel ri c'o viq'uin chi nca'va' ri i-puobra, o xa niya' ta nutzij chi nquiparox pa k'ak', pero xa manak amor viq'uin, mesque quire' xtin'an, man jun kax xtinch'ec chirij. 4Ri amor nu'on chi nca'kacoch' y otz kano'j naka'an quiq'uin quinojiel. Ri amor nu'on chika chi man itziel ta nakatz'at jun ri otz c'o, chi man naka'an ta chi can c'o kak'ij, y chi man naka'an ta chi oj nima'k. 5Ri amor nu'on chika chi man naka'an ta xanak-pe', chi man nakacanuj ta ri jo'c nic'atzin chika, chi man nipa ta kayoval, y chi man nakayac ta ka ri ayoval riq'uin kánima. 6Ri amor nu'on chika chi antok ni'an ri man choj ta, man nkojquicuot ta, pero antok nib'anataj ri otz, nkojquicuot. 7Ri amor nu'on chika chi nojiel nakacoch', chi nakanimaj ri nu'ej ri jun chic, chi nojiel nakayo'iej akal, y chi can c'o ka-paciencia. 8Ri amor man xtiq'uis ta. Pero ri niqui'ej ri ni'e'x chica ruma ri Dios, can xtalka ri k'ij antok xtiq'uis. Y quire' je' ri nca'ch'o' nic'aj chic ch'ab'al ri nuya' ri Espíritu Santo chica, xtalka ri k'ij antok man xtiqui'an ta chic quire'. Y quire' je' xtalka ri k'ij antok ri no'j ri c'o kiq'uin vacame, xa man chic xtic'atzin ta. 9Ri no'j ri c'o kiq'uin vacame, xa man ja ta re' nojiel, y quire' je' ri ni'e'x chika ruma ri Dios chi naka'ej, xa man ja ta je' re' nojiel; 10pero antok xtalka ri k'ij chi nakana'iej nojiel, man chic xca'c'atzin ta ri kata'n vacame, xa nca'q'uis. 11Inche'l inre', antok xiq'uiy, xin'an inche'l niqui'an quinojiel ac'ola'. Ri nutzij, ri ni'an pensar y ri nuno'j, can inche'l richin jun ac'ual. Pero antok xinuoc c'ajuol, man xin'an ta chic inche'l niqui'an ri ac'ola'. Nojiel re' xa'nya' can. 12Vacame xa inche'l nkutzu'n chupan jun ispieja ri man can ta k'alaj otz ri chica nakatz'at chupan. Pero xtalka ri k'ij antok can k'alaj ri xtakatz'at. Vacame jo'c jutz'it vata'n, pero chupan ri k'ij re' xtinvatamaj ja'al roch ri Dios, can inche'l jaja' rata'n ja'al noch inre'. 13Pero siempre xca'c'ujie' ri cukb'al c'u'x riq'uin ri Dios, y ri esperanza, y ri amor. Pero chiquivach ri oxe' re', ri más nem rakalien ja ri amor.

will be added

X\