1 Corintios 12

1Hermanos, vacame nivajo' chi ixre' ntivatamaj otz chirij ri dones ri nuya' ri Espíritu Santo. 2Inre' ni'ej chi ixre' c'a nalka pan ive' ri chica xi'an antok c'a maja' ivata'n roch ri Dios. Ixre' can otz chivach chi ic'o ri xixquisach ruma xixuc'uax inche'l ni'an chica ri ídolos, ri nca'c'uax jun lado y jun chic lado, y ijeje' xa man nca'ch'o' ta. 3Rumare' nivajo' nic'ut otz chivach chi man jun vinak nich'o' itziel chirij ri Jesús xa uc'uan ruma ri Ru-Espíritu ri Dios. Y quire' je' jun vinak ri man uc'uan ta ruma ri Espíritu Santo, man nicovin ta nu'ej chi ri Jesús jare' ri Ajaf. 4Y q'uiy roch dones, pero ri niyo'n re', jo'c Jun, y re' ja ri Espíritu Santo. 5C'o q'uiy roch samaj yo'n chika, pero jo'c jun Rajaf ri samaj y re' ja ri Ajaf Jesús. 6C'o q'uiy roch yo'n chika chi naka'an, pero jo'c Jun ri niyo'n kachuk'a' chikajunal y re' ja ri Dios. 7Y ruma ri yo'n chika chikajunal, k'alaj chi c'o ri Espíritu Santo kiq'uin. Y ri yo'n chika, can c'o otz nuc'am-pa chika konojiel. 8Ruma chica nic'aj, ri Espíritu Santo nuya' chica chi niquitzijuoj ri no'j ri nipa riq'uin ri Dios. Y chica nic'aj chic ruyo'n chi niquic'ut chiquivach nic'aj chic. 9Y ri Espíritu Santo nuya' je' chica nic'aj chic chi más quicukub'an quic'u'x riq'uin ri Ajaf Jesús chi q'uiy ri nca'tiquir niqui'an, y nic'aj chic nca'tiquir nca'qui'an sanar ri nca'yavaj. 10Nic'aj chic, ri Espíritu Santo nu'on chica chi niqui'an milagros. Ic'o je' ri nu'on chica chi niqui'ej ri ni'e'x chica ruma ri Dios. Y chica nic'aj chic nu'on chi cha'nin niquitz'at xa riq'uin ri Dios patanak-ve o xa riq'uin jun itzal espíritu patanak-ve ri nu'ej o nu'on jun chic vinak; y chica nic'aj chic nu'on chi nca'ch'o' nic'aj chic ch'ab'al. Y chica nic'aj chic, nu'on chica chi niqui'ej ri nca'qui'ej ri nic'aj chic antok nca'ch'o' nic'aj chic ch'ab'al. 11Y nojiel re' xa Jun nib'ano, y re' xa ja ri Espíritu Santo. Y chikajunal c'o ruyo'n chika chi naka'an, y can inche'l c'a nrajo' jaja' ri ruyo'n chika. 12Can inche'l rub'anun ri ka-cuerpo, c'o ruk'a', c'o rakan, c'o nak'aroch, pero jo'c jun cuerpo. Y quire' je' kab'anun ojre' riq'uin ri Cristo. 13Y quire' kab'anun, ruma xa jun mismo Espíritu xojb'ano bautizar konojiel y rumare' xojuoc ru-cuerpo ri Cristo; chi israelitas y man israelitas ta, chi libres y chi esclavos. Can ja mismo Espíritu re' ri xuoc pa kac'aslien konojiel. 14Ri ka-cuerpo c'o ruk'a', c'o rakan, c'o nak'aroch, pero jo'c jun cuerpo. 15Xa ta ri akanaj nu'ej: Inre' ruma man in ruk'a' ta ri cuerpo, man in richin ta ri cuerpo, ruma quire' nu'ej, ¿man richin ta came ri cuerpo ri akanaj? 16Y xa ta ri xiquinaj nu'ej: Inre' ruma man in nak'aroch ta ri cuerpo, man in richin ta ri cuerpo, ruma quire' nu'ej, ¿man richin ta came ri cuerpo ri xiquinaj? 17Xa nojiel ta ri cuerpo jo'c nak'aroch c'o, ¿che'l came nic'axan? Xa nojiel ta xiquinaj, ¿che'l came nisakuon? 18Pero ri Dios xuya' nojiel cha ri ka-cuerpo; xuya' ruk'a-rakan, y xuya' nak'aroch, xuya' nojiel, can inche'l ri xutz'at jaja' chi nic'atzin. 19Ruma xa nojiel ta xa jun roch, ¿pache' c'o-ve ri cuerpo? 20Ri ka-cuerpo can i-ruc'uan nojiel ri nca'c'atzin cha. Pero ri ka-cuerpo jo'c jun. 21Rumare' ri nak'avachaj manak che'l nu'ej cha ri k'ab'aj: Atre' man ncac'atzin ta chuva. Y quire' je' ri jolomaj manak che'l nu'ej chica ri akanaj: Ixre' man nquixc'atzin ta chuva. 22Ruma quinojiel nca'c'atzin. Y ri nitz'iet richin ri cuerpo chi manak-oc quikalien, xa jare' ri más nca'c'atzin. 23Y ri naka'an ojre' cha ri ka-cuerpo, ja ri manak más quikalien, xa jare' ri más nca'kavak. Y ri nuya' q'uix, can más nca'kavaj. 24Pero ri más i-otz nca'tz'iet richin ri ka-cuerpo, man nic'atzin ta chi nca'kavaj. Ri Dios can otz xu'on cha nojiel. Ruma hasta ri nitz'iet chi manak más quikalien richin ri ka-cuerpo, jaja' xu'on chica chi más ja'al nca'an cuenta. 25Ri Dios quire' ri xu'on chica quinojiel, chi quire' jo'c jun niqui'an quinojiel y niquitola-qui'. 26Xa c'o jun ri nik'axo, quinojiel quire' niquina'; y xa c'o jun otz nitz'iet, can nca'quicuot quinojiel. 27Ixre' ri ix-acunak ru-cuerpo ri Cristo, can inche'l rub'anun ri ka-cuerpo, c'o ruk'a', c'o rakan, c'o nak'aroch, can quire' kab'anun ojre' riq'uin ri ru-cuerpo ri Cristo. 28Y quire' rub'anun ri Dios chica nic'aj ri ic'o chupan ri iglesia. Na'ay ja ri apóstoles. Ri ruca'n ja ri profetas. Ri ruox ja ri maestros. Ic'o je' ri niqui'an milagros. Ic'o ri nca'qui'an sanar ri nca'yavaj. Ic'o ri nca'to'n quichin ri nic'aj chic. Ic'o ri nca'qui'an mandar nic'aj chic. Ic'o ri nca'ch'o' nic'aj chic ch'ab'al ri nuya' ri Espíritu Santo chica. 29Man konojiel ta oj apóstoles. Man konojiel ta oj profetas. Man konojiel ta oj maestros. Man konojiel ta naka'an milagros. 30Man konojiel ta nca'ka'an sanar ri nca'yavaj. Man konojiel ta ni'an chika ruma ri Espíritu Santo chi nkuch'o' nic'aj chic ch'ab'al. Man chika ta konojiel yo'n-ve chi naka'ej ri nca'qui'ej ri nic'aj chic antok nca'ch'o' nic'aj chic ch'ab'al ri nuya' ri Espíritu Santo chica. 31Pero can otz chi ntirayij jun don ri más otz. Y inre' nivajo' nic'ut jun chic chivach ri c'o más rakalien.

will be added

X\