1 Corintios 11

1Can tib'ana' inche'l ri ni'an inre', ruma inre' can ni'an-ve inche'l xu'on ri Cristo. 2Hermanos, inre' nquiquicuot ruma can inc'o riq'uin ivánima. Ixre' can nti'an ri nuc'utun can chivach. 3Pero inre' nivajo' chi ixre' ntivatamaj chi ri Cristo jare' ri jolomaj ri c'o pa quive' ri achi'a', y ri ache jare' ri jolomaj ri c'o paro' ri raxjayil. Y ri Dios jare' ri jolomaj ri c'o paro' ri Cristo. 4Antok ri achi'a' niqui'an orar, o antok niqui'ej ri nu'ej ri Dios chica, man tiquiya' tziak pa quijaluon; ruma xa quire' niqui'an, niquikasaj ruk'ij ri c'o pa quive'. 5Pero antok ri ixoki' niqui'an orar, y antok niqui'ej ri nu'ej ri Dios chica, tiquiya' tziak pa quijaluon. Ruma xa man niqui'an ta quire', niquikasaj ruk'ij ri jolomaj ri c'o pa quive'. Can ntiel inche'l quisocan nojiel ri quive'. 6Y xa ic'o ixoki' ri man nicajo' ta niquiya' tziak pa quijaluon, tiquisocaj-el nojiel ri quive'. Y xa nca'q'uix niquisocaj-el nojiel ri quive', can tiquiya' tziak pa quijaluon. 7Ri achi'a' man otz ta niquiya' tziak pa quijaluon ruma i-rachib'al ri Dios y niquic'ut ruk'ij jaja', y ri ixoki' niquic'ut quik'ij ri achi'a'. 8Ruma ri na'ay ache, man riq'uin ta jun ixok xpa-ve. Pero antok x'an ri na'ay ixok, xcusas jun rub'akil ri ache. 9Ri Dios xu'on ri ixok ruma xutz'at chi nic'atzin cha ri ache, y man ja ta ri ache xu'on ruma nic'atzin cha ri ixok. 10Rumare' ri ixok can tuya' tziak pa rujaluon chi nuc'ut chi niniman cha ri rachajil. Can otz nu'on quire', cuma ri ángeles. 11Pero choch ri Ajaf Dios xa man jun ri más c'o ruk'ij. Ri ixok can nic'atzin cha ri ache y quire' je' ri ache nic'atzin cha ri ixok. 12Y can ketzij chi antok x'an ri na'ay ixok, xcusas jun rub'akil ri ache, pero ri ache je' nalax riq'uin ri ixok. Pero nojiel can riq'uin ri Dios patanak-ve. 13Can tib'ana' pensar ja'al: ¿Otz came chi ri ixok man nuya' ta tziak pa rujaluon antok nu'on orar cha ri Dios? 14Can quinojiel vinak cata'n chi q'uix-q'uix chi jun ache nca'nimar-ka ruve'. 15Pero jun ixok can otz-ve nca'nimar ruve'. Ruma ri ruve' can yo'n-ve cha chi nutz'apij ri rujaluon. 16Y xa c'o jun nrajo' nuch'ojij, ojre' naka'ej chi man jun chic costumbre c'o chikacajol y quire' je' chiquicajol quinojiel ri iglesias ri ic'o diferentes lugares. 17Y ri nivajo' ni'ej chiva vacame, manak che'l ni'ej chiva chi can otz ri nti'an. Ruma antok ntimol-ivi' pa rub'e' ri Ajaf, pa ruc'axiel chi c'o otz nuc'am-pa chiva, xa más itziel nti'an chupan ri ic'aslien. 18Ri na'ay nivajo' ni'ej chiva, ja ri niva'xaj chivij chi antok ntimol-ivi', c'o divisiones chicajol. Y nic'aj ninimaj ri ni'e'x chuva. 19Pero can nic'atzin chi nib'anataj quire' chicajol, chi c'o divisiones, chi quire' nca'k'alajin ri ketzij quiniman ri Cristo y ri man quiniman ta. 20Y antok ixre' ntimol-ivi' chi nti'an ri Santa Cena richin ri Ajaf Jesucristo, xa man ja ta rub'anic nti'an. 21Ruma antok ntimol-ivi', ic'o ri can cha'nin niquitej-ka ri quic'amun-pa y ic'o ri xa man jun chica niquitej, y ic'o hasta nca'k'ab'ar-ka. 22¿Can manak came ivachuoch chi chire' nquixva-ve y nquixkumun? ¿O chivach ixre' man jun ruk'ij ri iglesia richin ri Dios? ¿Y karruma nqui'q'uixb'iej ri man jun oc c'o quiq'uin? ¿Can ntivajo' ixre' chi riq'uin ri nti'an quire', inre' niya' ik'ij? Inre' man niya' ta ik'ij ruma man otz ta ri nti'an. 23Inre' man quire' ta ri ix-nutijuon. Inre' xixtijuoj riq'uin ri xuya' ri Ajaf chuva. Y re' quire': Chupan ri ak'a' antok ri Ajaf Jesús ya nijach-el pa quik'a' ri vinak ri itziel xquitz'at, jaja' xutz'om jun simíta; 24y antok jaja' ruyo'n chic tiox b'a' cha ri Dios, xuper ri simíta y xu'ej chica ri ru-discípulos: Titz'ama' y tic'uxu' ri simíta; ruma jare' ri nu-cuerpo ri xtijach pan i-cuenta ixre'. Can tib'ana' cava siempre richin nquininataj. 25Y antok ya i-vi'nak chic, ri Jesús xuc'an-apa je' ri copa, y xu'ej: Jare' ri nuquiq'uiel ri xti'in antok xquiquimisas. Riq'uin ri nuquiq'uiel, ja xtic'achoj ri c'ac'ac' pacto ri rajo'n-pa ri Dios chi nu'on quiq'uin ri vinak. Can tikumu', y nojiel mul antok xtikun, can inre' nquininataj, xcha' ri Jesús. 26Rumare', nojiel mul antok ntic'ux ri simíta y ntikun je' ri ruya'l ri uva, can ja ri rucamic ri Ajaf ri ntitzijuoj, y quire' xti'an, c'a xtalka-na ri k'ij chi xtipa chic jun b'ay. 27Rumare', xa chica-na ri nic'uxu ri simíta y nikumu ri ruya'l ri uva ri nunataj ri rucamic ri Ajaf, xa man jun rakalien nu'on cha, nu'on pecar-ri', ruma nu'on cha ri ru-cuerpo y ri ruquiq'uiel ri Ajaf chi man jun rakalien. 28Na'ay, katz'ata-ka-ki' xa otz rub'anun ri kac'aslien choch ri Dios, c'ajare' kac'uxu' ri simíta y kakumu' ri ruya'l ri uva. 29Ruma xa nakac'ux ri simíta y nakakun ri ruya'l ri uva, y xa man jun rakalien naka'an cha, y man nalka ta pa kave' chi ri nakatej nakanataj ri ru-cuerpo ri Ajaf Jesús antok xcon, can nika ri castigo pa kave'. 30Y rumare' iq'uiy chivach ixre' manak quichuk'a', nca'yavaj, y ic'o ya xa'con. 31Y xa ta ojre' nakatz'at-ka-ki' otz ri chica naka'an, man nipa ta ri castigo pa kave'. 32Pero q'uiy mul ri Ajaf Dios nuya-pa ri castigo pa kave', chi quire' man nika ta pa kave' ri nem castigo ri man niq'uis ta, inche'l xtika pa quive' ri vinak ri man quiniman ta ri Ajaf Jesús. 33Mare' hermanos, antok ntimol-ivi' chi nti'an ri Santa Cena, can tivoyo'iej-ivi'. 34Pero xa c'o jun chivach altíra ninem rupan, más otz tiva-pa chirachuoch, chi quire' man ntivayuoj ta ka ri castigo pan ive' antok ntimol-ivi'. Y c'o nic'aj chic kax ri nivajo' ni'ej chiva, pero xa c'a xquib'aka-na iviq'uin, c'ajare' xtin'ej chiva.

will be added

X\