1 Corintios 10

1Hermanos, inre' nivajo' chi ntivatamaj chirij ri xb'anataj quiq'uin ri ojier tak katie-katata' ojre' israelitas. Ri Dios can xuya-pa jun mukul ri xuc'uan quib'iey. Xujak je' ri Mar Rojo chi quire' xa'tiquir xa'k'ax. 2Y quinojiel can inche'l xa pa rub'e' ri Moisés xa'an bautizar antok xa'a chirij ri mukul y antok xa'k'ax chupan ri mar. 3Quinojiel ijeje' xquitej ri xka-pa chicaj riq'uin ri Dios. 4Y quinojiel xquikun je' ri ya' ri xuya-pa ri Dios chica, ri xiel-pa choch jun ab'aj. Ri ab'aj re' ja ri Cristo; y jaja' can b'anak quiq'uin. 5Pero can xk'alajin chi man xa'ka ta choch ri Dios ri xa'qui'an nic'aj, rumare' jub'a' ma quinojiel xa'con can pa desierto. 6Nojiel ri xb'anataj quiq'uin ijeje', xa richin jun ejemplo chakavach ojre', chi man takarayij ri man otz ta inche'l xqui'an ijeje'. 7Man tiya' quik'ij ri ídolos, inche'l xqui'an nic'aj chiquivach ijeje'. Chupan ri ruch'ab'al ri Dios ri tz'ib'an can, nu'ej chirij ri xqui'an: Ri vinak xa'tz'uye' chi xa'va' y xa'kumun, y xa'palaj chi xa'xajo. Quire' ri tz'ib'an can. 8Ic'o achi'a' ri xqui'an pecado quiq'uin ixoki', y rumare' chupan jun k'ij xa'con veintitrés mil vinak. Man taka'an ojre' inche'l xqui'an ijeje'. 9Ic'o je' chiquivach ijeje' ri xqui'an ri man otz ta, ruma xqui'an tentar ri Ajaf. Y ijeje' xa'con pa quik'a' cumatz. Y ojre' man taka'an inche'l xqui'an ijeje'. 10Y nic'aj chic ruma xqui'an reclamar, rumare' xtak-pa jun ángel pa quive' chi xa'ruquimisaj. Man taka'an ojre' inche'l xqui'an ijeje'. 11Nojiel ri xb'anataj quiq'uin ijeje', xa jun ejemplo chika ojre'. I-tz'ib'an can chupan ri ruch'ab'al ri Dios, chi quire' ojre' ri ojc'o chupan ri ruq'uisb'al tiempo richin ri roch-ulief, man tib'anataj kiq'uin quire'. 12Rumare', xa c'o jun ri nu'on pensar chi man nitzak ta pa ruc'aslien choch ri Dios, can tub'ana' cuenta-ri' chi quire' man nitzak ta. 13Y antok nquix'an tentar, talka pan ive' chi xa jun vinak nib'ano quire' chiva o pan ivánima nipa-ve. Pero ri Dios man nquixruya' ta can. Antok jaja' nutz'at chi ixre' man nquixtiquir ta chic chi nticoch', nuya' ivuchuk'a', chi quire' nquixtiquir nticoch'. 14Mare' ixre' hermanos ri altíra nquixvajo', ni'ej chiva chi man ti'an cach'il ri vinak ri niquiya' quik'ij ri ídolos. 15Ixre' c'o ino'j chi nti'an pensar otz; y ti'ej chuva xa ketzij o man ketzij ta ri ni'ej chiva. 16Antok nakanataj ri rucamic ri Cristo, nakaya' tiox b'a' cha ri Dios ruma ri ruya'l ri uva ri nakakun, ruma nunataj ri ruquiq'uiel ri Cristo. Y quire' je' ri simíta ri nakaper y nakac'ux, ruma nunataj ri ru-cuerpo ri Cristo, y re' jo'c jun nu'on chika riq'uin ri Cristo. 17Jo'c jun ri simíta y konojiel nakac'ux b'a', mesque can oj q'uiy; y rumare' ojre' jo'c jun cuerpo kab'anun. 18Titz'ata-na-pe' ri chica niqui'an ri kavanakil israelitas. Ri chica nca'c'uxu b'a' ri chicop ri nca'yo'x choch ri Dios, ¿man xa jun ta came niqui'an riq'uin ri Dios ruma niquic'ux? 19¿Chica ni'ej c'a? ¿C'o came rakalien jun ídolo, o c'o came rakalien ri yo'n choch? 20Ri ni'ej chiva jare': Ri man israelitas ta antok niquiya' te'j chiquivach ri ídolos, xa chica ri itzal tak espíritus niquiya-ve, y man choch ta ri Dios niquiya-ve. Y inre' man nivajo' ta chi nti'an xa jun quiq'uin ri itzal tak espíritus. 21Ruma ixre' can ntikun ruya'l ri uva chi ntinataj ri rucamic ri Ajaf. Y xa quire' nti'an, man otz ta chi ixre' ntikun je' jun kax quichin ri itzal tak espíritus. Ixre' ntic'ux ri simíta chi ntinataj ri rucamic ri Ajaf, y xa quire' nti'an, man otz ta ntitej je' jun kax quichin ri itzal tak espíritus. 22¿O nakayac rayoval ri Ajaf? ¿Can más came c'o kachuk'a' choch jaja'? 23Nojiel xa otz chi ni'an, pero man nojiel ta nuc'ul chi ni'an. Nojiel xa otz chi ni'an, pero man nojiel ta nu'on chica nic'aj chic chi más niq'uiy ri quic'aslien choch ri Dios. 24Man taka'an jo'c ri nuc'am-pa otz chika ojre'; ri nic'atzin chi naka'an, ja ri nuc'am-pa otz chica nic'aj chic. 25Ri ch'ac ri nic'ayix pa carnicería, ixre' otz ntilok' y ntic'ux. Man tic'utuj xa yo'n o man yo'n ta chiquivach ídolos, chi quire' man jun chica xtuna' ri ijaluon y ri ivánima. 26Ruma richin ri Ajaf Dios ri roch-ulief y nojiel ri c'o choch. 27Xa c'o jun vinak ri man runiman ta ri Dios, y jaja' nquixru'on invitar chi nquixb'ava' riq'uin, otz nquix'a, xa ntivajo'. Y titija' ri nca'ruya-pa chiva, y man tic'utuj xa yo'n o man yo'n ta chiquivach ídolos, chi quire' man jun chica xtuna' ri ijaluon y ri ivánima. 28Pero xa c'o jun ri ni'e'n chiva: Ri te'j re' xa ya xyo'x chiquivach ídolos, nicha' chiva; ixre' man titej ri te'j re', ruma xa ntitej choch, man otz ta xtuna' ri ránima; mesque ixre' ivata'n chi richin ri Ajaf Dios ri roch-ulief y nojiel ri c'o choch. 29Y antok ni'ej chiva chi man titej, man ruma ta ri ijaluon y ri ivánima ixre'. Xa ruma ri rujaluon y ri ránima ri jun chic, chi quire' jaja' man xtitzak ta pa ruc'aslien choch ri Dios. Talvez nic'aj niqui'ej manak che'l chi ja ri rujaluon y ri ránima jun chic ri ni'e'n chuva ri chica otz chi nitej o ri chica man otz ta. 30Y xa inre' niya' tiox b'a' cha ri Dios ruma ri te'j ri nitej, ¿karruma nca'e'x tzij chuvij ruma ri nitej xa ya nuyo'n chic tiox b'a'? 31Ruma c'a re', antok nquixva', ntikun iya', o chica-na ri nti'an, can tib'ana' chi ntiya' ruk'ij ri Dios. 32Y man c'a quixuoc tzakoy quichin ri vinak israelitas, ni quichin ri vinak man israelitas ta, y ni cha ri ru-iglesia ri Dios. 33Xa can tib'ana' inche'l ri ni'an inre'. Inre' man ni'an ta jo'c ri nika chinoch. Xa can nitej nuk'ij chi ni'an ri nika chiquivach quinojiel, man jo'c ta ni'an ri c'o otz nuc'am-pa chuva, ruma iq'uiy vinak ri nivajo' nca'nto' chi nca'colotaj.

will be added

X\