1 Corintios 1

1Inre' Pablo, xinayox chi xinuoc ru-apóstol ri Jesucristo ruma quire' nrajo' ri Dios. Y c'o viq'uin ri hermano Sóstenes, 2antok nitak-el va carta va chiva ixre' ri ix ru-iglesia ri Dios ri ixc'o pa tanamet Corinto, ri can sak chic ri ic'aslien ruma ri Cristo Jesús. Ixre' xixayox ruma ri Dios chi xixuoc santos vinak, inche'l xu'on quiq'uin ri nic'aj chic ri niquiya' ruk'ij ri Kajaf Jesucristo nic'aj chic tanamet. Can jaja' ri Kajaf konojiel ojre' ri kaniman chic. 3Ja ta ri favor y ri paz ri nuya' ri Katata' Dios y ri Ajaf Jesucristo tic'ujie' riq'uin ivánima. 4Inre' siempre niya' tiox b'a' cha ri Dios ivuma ixre', ruma ri favor ri ruyo'n chiva. Y xa ruma ri Cristo Jesús yo'n ri favor re' chiva. 5Can jaja' xb'ano chiva chi ix b'ayuon, ruma can q'uiy ino'j xuya' y xu'on chiva chi can ja'al rutzijoxic nti'an cha ri ivata'n. 6Can inche'l ri xtzijos chiva chi xtivil ruma ri Cristo, can quire' c'a xb'anataj iviq'uin. 7Y ruma c'o chic iviq'uin nojiel ri dones ri nuya' ri Cristo, vacame jo'c chic ivoyo'ien ri k'ij antok ri Kajaf Jesucristo xtipa chic jun b'ay. 8Y ri Kajaf Jesucristo can xquixruto' chupan ri ic'aslien, chi quire' man jun ta pecado nilitaj pan ic'aslien antok xtalka ri k'ij chi xtitzalaj chic pa ri Kajaf Jesucristo. 9Ri Dios can nu'on nojiel ri i-ru'e'n. Jaja' ri xayuon ivichin chi jun oc nti'an riq'uin ri Kajaf Jesucristo ri Ruc'ajuol. 10Hermanos, pa rub'e' ri Kajaf Jesucristo nic'utuj favor chiva chi junan ivánima tib'ana'. Man ti'an pensar diferente. Xa junan tib'ana' pensar y junan ta ri ntina' pan ivánima. 11Ruma xtzijos chuva cuma ri ic'o pa rachuoch ri ixok Cloé rub'e', chi ixre' hermanos c'o ayoval chicajol. 12Ruma ic'o chivach ixre' ri niqui'ej: Inre' in richin ri Pablo; ic'o ri nca'e'n: Inre' in richin ri Apolos; ic'o ri nca'e'n: Inre' in richin ri Pedro; y ic'o ri nca'e'n: Inre' in richin ri Cristo. 13¿Acaso ranun dividir-ri' ri Cristo? ¿Xquimisas came choch cruz ri Pablo ivuma ixre'? ¿O xix'an came bautizar pa rub'e' ri Pablo? 14Tiox b'a' niya' cha ri Dios ruma chicajol ixre', xa jo'c ri Crispo y ri Gayo ri xa'n'an bautizar, 15chi quire' man jun xti'e'n chi x'an bautizar pa nub'e'. 16Xin'an je' bautizar ri Estéfanas y ri ru-familia. Y man nalka ta pano' xa ic'o chic nic'aj ri xa'n'an bautizar. 17Ri Cristo man xirutak ta chi ni'an bautizar; jaja' xiruya' pa rusamaj chi nitzijuoj ri evangelio. Y antok nitzijuoj, man nicusaj ta no'j richin vinak, ni ja'al tak tzij. Chi quire' man ntiel ta chi man jun rakalien ri rucamic ri Cristo choch ri cruz. 18Y antok nitzijos ri rucamic ri Cristo choch ri cruz chakavach ojre' ri nkojcolotaj, can altíra ru-poder. Y jare' ri nucusaj ri Dios chi nca'rucol quinojiel ri niquinimaj rub'e'. Pero chiquivach ri vinak ri xa pa k'ak' nca'b'aka-ve, ri rutzijoxic ri rucamic ri Cristo choch ri cruz, xa man jun nic'atzin-ve. 19Y chiquij ijeje', ri Dios ru'e'n: Inre' xtin'an chica ri vinak ri altíra quino'j ri choch-ulief chi can xca'sach. Y chica je' ri q'uiy cata'n, xtin'an chica chi man jun nic'atzin-ve nojiel ri cata'n. Quire' ri tz'ib'an can. 20¿Pache' came c'o-ve ri altíra runo'j? ¿Pache' came c'o-ve ri ache escriba? ¿Pache' came c'o-ve ri ja'al nitzijuon richin ri tiempo vacame? Ri Dios man jun rakalien rub'anun cha ri no'j re'. 21Ri Dios can rata'n-ve ri nu'on, mare' man xucha' ta ri quino'j ri vinak ri ic'o choch-ulief chi quire' riq'uin ta re' nicatamaj roch jaja'. Ri Dios xu'on pensar chi ja ri rucamic ri Cristo titzijos chi nca'colotaj ri vinak ri niquinimaj jaja'. Quire' xu'on pensar ri Dios, mesque chiquivach ri vinak man jun nic'atzin-ve. 22Ruma ri nuvanakil israelitas nicajo' chi ri Dios nu'on ta jun milagro chiquivach. Y ri man israelitas ta, xa jo'c ri no'j richin ri roch-ulief niquicanuj. 23Y ojre' ja ri Cristo ri xquimisas choch cruz ri nakatzijuoj. Y re' xa nu'on chica ri nuvanakil israelitas chi nipa quiyoval, y chiquivach ri man israelitas ta man jun nic'atzin-ve. 24Pero ojre' ri xojayox ruma ri Dios chi xojcolotaj, israelitas y man israelitas ta, can kata'n chi ja ri Cristo ri ru-poder y runo'j ri Dios. 25Ruma ri no'j ri más co'l ri c'o riq'uin ri Dios, can más nem choch ri c'o riq'uin jun vinak, mesque can q'uiy ta runo'j. Y quire' je' ri poder ri más co'l richin ri Dios, can altíra nem choch ri poder ri más nem ri c'o riq'uin jun vinak. 26Y titz'ata-ka-ivi' ixre' hermanos; ixre' xixayox je' ruma ri Dios chi xixcolotaj, mesque man ix q'uiy ta ri c'o ino'j chiquivach ri vinak. Man ix q'uiy ta ri c'o poder pan ik'a'. Y man ix q'uiy ta ix utzulaj vinak. 27Pero ri Dios xixrucha', mesque ni'e'x chiva chi manak ino'j, richin chi nca'ruya' pa q'uix ri vinak ri niquina' chi altíra quino'j. Ri Dios xixrucha' mesque ni'e'x chiva chi man jun ivuchuk'a', richin chi nca'ruya' pa q'uix ri c'o quichuk'a'. 28Y ixre' ri man jun ivakalien y itziel nquixtz'iet cuma ri vinak ri man quiniman ta ri Dios, can ja ri Dios ri xixcho'n. Quire' xu'on chi nik'alajin chi ri c'o altíra quikalien vave' choch-ulief, xa man jun nca'c'atzin-ve. 29Quire' xu'on ri Dios chi quire' man jun vinak nuna' chi nem choch jaja'. 30Pero ri Dios xu'on chika ojre' chi xa jun xka'an riq'uin ri Cristo Jesús. Can xk'alajin-ve runo'j ri Dios chakavach ojre' ruma ri Cristo. Ri Dios can xu'on chi ruma ri Cristo ntiel chi man jun chic ka-pecado choch. Y ruma je' ri Cristo xu'on sak cha ri kac'aslien y xojcolotaj. 31Ruma c'a re' ri ruch'ab'al ri Dios ri tz'ib'an can nu'ej: Xa c'o jun nrajo' nuya-ka ruk'ij, ri más otz nu'on, tuya' ruk'ij ri Ajaf. Quire' nu'ej ri tz'ib'an can.

will be added

X\