TITO 3

1Uhu erze Porrosht aabo õr eyucha uje tyenɨj oshiyokõr uje gobierno tatɨm õr hn shish ochɨmɨt ɨre par oshiyokõr uje om. 2Atɨm õr par uje ye oninehnɨm oso hn ye odihokosye nehech otsɨtakye hn ohneta oso hn uhu nos ye odɨkey uje otsetye. 3Antni eyok ye yɨraha Porroshtpe. Ich eyok ɨtso õr. Ye yiyokõrpe uje Porrosht sahmũr. Shɨ yiyokõrni uje yewo otatɨm eyok. Erze kuche mɨhnũwo uje yahmũrpa yiyokõr shish yiyokõr nehech uhurc ich yakaha eyok. Wɨr shɨ ɨtso eyok yɨnsɨrc uje chɨpa eyok pork eyok ɨr yɨlo. Ich yahmũrpa erze õr ahmyoni hn shish yahmũr yiyokõr erze mɨhnũwo. Yɨtak yewo pork yobɨta õr kushjãro. Hn uje otsɨtak eyok hn eyok ɨtspo yɨtak õr. 4Per uje terɨhɨ ɨshɨrĩt par uje Porrosht shuu oso ochɨraha uje wɨchɨ sahmũr pishɨ õr hn sehe dosĩ̵r õr heke ɨshɨm õr Deyjɨt par uje oshuu oshuu toy par uje ɨshɨ õr hnɨtewɨhɨ Porrosht ahɨr. 5Uje shuu yɨraha ɨtsorz ich shuu yomsaha par eyok ɨr aabo. Ye yiyokõrpe uje om par uje shuu yomsaha par ɨr aabo. Shɨ chuuna uje eyok losuhlaabo heke sosɨr eyok. Shuu Dechɨbich masaha eyok aho hn churhũ eyok kuche mɨhnũwo uje Porrosht ye nahmũrpe uje de eyok aho hn shuu eyok shurhãpo hn shuu eyok aho kɨnãho par uje yiyokõr uje om. 6Ɨshɨm eyok Dechɨbich par uje ɨr ukurbo kɨhniya de eyok aho pork Jesucristo ɨshɨ eyok hnɨtewɨhɨ Porrosht ahɨrni. 7Sosɨr eyok heke ye eyok hnɨtew chɨhɨ ɨr ahɨrpe. Ɨshɨm eyok Dechɨbich par uje yomsaha par eyok ɨr aabo. Ele ahle yiyem ese ɨkɨrĩt uje yelɨj nɨhna ɨre. 8Ahnũwo ahwoso uje ticheku ich ũru. Sehe tuu ahakorãha pishɨ erze uje ye olotiis Porroshtpe par uje ochɨrahapa par uje shish oshiyokõr uje om. Ahnũwo ɨr ahwoso ich ɨhĩ̵rts pisho hn om par nos wɨr oso ochɨraha. 9Per ye ekitkẽr erze uje shɨ ochiilehet hn õr ahwoso ich ye jukur. Ye ekitkẽr erze uje shɨ õr eyucha õr poruwo wɨshɨ õr ahwoso. Par Porrosht ich wɨr õr ahwoso ye jukurpe. Ye etĩ̵r erze uje oshiyokosye hn oshuu ma kɨhniya asa uje Moisés ley tata. Wɨr õr ahwoso ye jukurpe. 10Uje yeẽk duhu Porrosht aabo otsehek ɨre ich tyenɨj atɨm ɨre par uje ye duhu ɨlorz. Kɨmɨjɨ niyokõrpo duhu ɨlorz ich tyenɨj atɨmpo. Kɨmɨjɨ niyokõrpo ich uhu tokolɨhɨchɨs Porrosht aabo õr ehet. 11Eraha uje wɨchɨ iim uje Porrosht sahmũr, par uje shiyokõr uje mĩ̵hnɨk. Shiyokõr mɨhnũwo heke ɨre shuu Porrosht aabo ochiyuhu ɨrehe õr ehet. 12Sehe tuu Artemas do tĩ̵r owa o kɨmɨjɨ Tíquico. Uje taachĩ̵hɨ ahɨr hn owa tyenɨj etĩ̵r yokɨhɨ wahacha dɨt Nicópolis pork tɨbɨte tɨtĩ̵r wahacha nehe par tiyakaha par ese hmamo ɨshɨrĩt. 13Akashɨm Apolos hn Zenas. Asɨm õr uje õr nesita par uje ye kuchẽrk nihyokĩ̵hɨ õr ahɨr dehet pehet. Ese Zenas wɨchɨ politikya uje chɨrahapa gobierno ɨr ley. 14Nos Porrosht aabo tyenɨj oshuu chish leheta par uje shish oshiyokõr uje ich om hn otakashɨm deyso hn erze Porrosht aabo yewo uje kuche nihyokĩ̵hɨ õr ahɨr. Kɨmɨjɨ ye otakashɨm õr ich ye oniyokõrpe uje Porrosht sahmũr. 15Tito, nos wɨr Porrosht aabo uje ode lɨka pahɨr nos oshɨm owa saludo. Atɨm erze Porrosht aabo yewo uje ode ahɨr uje otsahmũr yok uje tokosɨm õr saludo. Sehe tuu Porrosht nos dosɨr olak.

will be added

X\