TITO 2

1Per owa ye owa ɨlo erze uje õr ɨluu mɨhnũ. Shish ahakorãha õr uje ich ũru uje Porrosht ahwoso tata. 2Atɨm erze hnakɨrbo ɨlaraabo par uje ye oduhu yɨkɨch nẽhi ɨre. Tyenɨj oshiyokõr om par uje oso otola õr. Shɨ tyenɨj oshuu deyuwo tɨsĩ̵r par uje ye oniyokõr uje mĩ̵hnɨk. Tyenɨj ye olotiis Porrosht ahwoso hn oniyokõr uje tata. Tyenɨj otsahmũr Porrosht hn otsahmũr erze Porrosht aabo toy. Tyenɨj õr ewenta uje oso oshiyokõr kuche mɨhnuwõho õr pork wɨr shish otsɨtak Porrosht aabo. 3Ɨtso uje ahakorãha erze hnakɨrbo ɨlaraabo ich tyenɨj ahakorãha erze tɨmcher ɨler par uje oshiyokõr oshuu ɨtso uje Porrosht sahmũr. Ye ompe uje otata lare. Ye ompe uje oshuu yɨkɨch sẽhi ɨre. Tyenɨj oshiyokorãha yẽr uje ich om. 4Uje oshiyokõr oshuu ɨtsorz hn õr pwele otsakɨt erze apɨbite par uje otsahmũr dabiyo hn otsahmũr daabo toy. 5Tyenɨj oshiyokorãha erze apɨbite par uje oshuu õr eyuwo tɨsĩ̵r par uje oshiyokõr uje ich om hn shɨ oshuu dabich nohmɨra hn par uje ye otorãha dabich. Tyenɨj oshiyokorãha õr par otɨbey dahuch hn otakashɨm wɨr yewo. Tyenɨj oshiyokorãha õr par oshiyokõr uje õr abiyo otatɨm õr par uje ye oduhu oso odish majamichɨhɨ Porrosht ahwoso. 6Tito, owa tyenɨj ahakorãha erze pɨkɨhnino hnakɨrbito toy. Atɨm õr par uje oshuu deyuwo tɨsĩ̵r uje õr ɨre oshiyokõr. 7Nos wɨr kuche uje ahakõr tyenɨj ahakõr om par uje wɨr oteychɨm owa uje ahakõr hn ochɨraha uje Porrosht sahmũr. Uje ahakorãha oso uu Porrosht ahwoso tyenɨj atɨm õr uje ich ũru. Ye ahakorãha õr shɨ par uje wɨr õr ayla. 8Tyenɨj ahakorãha õr uje ich ũru par uje ye wɨr oso otata otsɨɨ: —Wɨchɨ ɨr ahwoso ich ye jukur.— Ahakorãha oso uhu ɨtsorz hn erze uje otsɨtak owa wɨr opook pork ye odishpe uje mĩ̵hnɨk par uje oninehnɨm eyok. 9Tyenɨj ahakorãha erze Porrosht aabo par uje ochishew obiyo par oshiyokõr uje õr yɨnsɨro otatɨm õr. Tyenɨj oshuu nensɨro õr aylpa hn otola õr. 10Ye ompe uje otorha nensɨro õr kushjãro. Tyenɨj Porrosht aabo oshiyokõr uje õr yɨnsɨro otatɨm õr par uje nos omo uje oshiyokõr uje ich om, heke ochɨraha uje erze ahwoso uje yiyokorãha õr ich ɨhĩ̵rts pisho. Otsahmũr uje yitɨm õr Porrosht ahwosni hn Jesucristo uje ɨshɨ oso õr hnɨtewɨhɨ Porrosht ahɨr. 11Porrosht sehe dosĩ̵r oso heke ɨre ɨshɨ õr hnɨtewɨhɨ dahɨrni hn kɨmɨjɨ onahmũr ich nos õr pwele ochɨraha hn omasaha par ɨr aabo. 12Uje Porrosht ɨshɨ eyok hnɨtewɨhɨ dahɨrni ich shuu yukwim mɨhnũwo hn yaham erze kuche mɨhnũwo uje oso otsahmũr oshiyokõr. Uje ehn eyok de nãhu ĩ̵rmo hn wɨchɨ shuu eyok eyuwo tɨsĩ̵r par uje yiyokõr uje ich om uje Porrosht sahmũr 13uje yiyem ese deeych uje ich ɨhĩ̵rtpa uje Jesucristo cheeshpo nehe. Uje taãcha ich hũre. Wɨchɨ uje ɨshɨ eyok hnɨtewɨhɨ Porrosht ahɨrni. 14Wɨchɨ ɨshɨm ɨre oso par uje oshuu oshuu toni par uje chiyuhu eyok Satanás hme hn par uje shuu ye yiyokõr erze uje Porrosht ye nahmũrpe hn par uje shuu eyok ɨluu om pork wɨchɨ uu eyok yɨnsɨrc. Shuu yahmũrpa yiyokõr uje ich om. 15Erze uje tichew tokosɨm owaka wɨr uje tyenɨj ahakorãha oso. Uhu otsahmũr oshiyokõr uje ich om, hn ekushuhu õr uje oshiyokõr uje mɨhnũwo pork Porrosht wɨchɨ uje shuu ahakõr uje ɨtsorz. Ontew erze uje otata otsɨɨ: —Ye eraha latɨk.—

will be added

X\