TITO 1

1Yok Pablo. Yok Porrosht ɨbɨk hn Jesucristo ɨr apóstol. Shuu takaha par uje titɨm erze uje Porrosht chiihla õrkite par uje ye olotiis Jesús. Shuu takaha par tuu ochɨraha Porrosht ahwoso. Ɨr ahwoso ich ũru. Shuu oym erze deluu mɨhnũ hn shuu oshiyokõr uje ɨre sahmũr. 2Titɨm õr par uje oyem ese ɨkɨrĩt uje yelɨj nɨhna ɨre uje Porrosht tyenɨj ɨshɨm daabo. Porrosht yelɨj nehnyẽr oso. Uje ehn yahpaa niyokõr nãhu ɨrmõkite ɨchii chɨbɨte lahwoso uje tyenɨj ɨshɨm daabo ese ɨkɨrĩt, 3hn chɨbɨte toy ese ɨshɨrĩtkite par uje shuu oso ochɨraha ese ɨkɨrĩt uje de. Uje terɨhɨ ese ɨshɨrĩtkite hn Porrosht shuu tanɨmɨrãha lahwoso. Wɨchɨ uje shuu Cristo ɨshɨ eyok hnɨtewɨhɨ dahɨr. 4Tichew ana hutɨta, Tito, par uje owa ler. Owa ɨtso pijɨt pisht pork uje titɨm owa Porrosht ahwosni ich ye otiispe ɨtso uje ye tokotiispe heke amsaha par Porrosht aap. Ele ahle ich Porrosht wɨchɨ uu eyok Deych hn Jesucristo wɨchɨ uje ɨshɨ eyok hnɨtewɨhɨ Porrosht ahɨr. Sehe tuu Jesucristo hn ɨr Deych odosɨr owa hn oduhu ehet kɨɨs. 5Uje eyok dechɨ ese hnɨmich uje iich otsɨɨ Cretani ich tuu akahachɨs par uje ahakõr erze obiyo uje yahpaa yɨmɨtpe, hn enshii uje ye ũrpe. Kal dɨt ich tyenɨj aahla hnakɨrbo par uje otɨbey Porrosht aabo uje odechɨ. Ekẽra õr iyo on anciano. Titɨm owa erze obiyoni par uje ahakõr. 6Wap eychɨm erze uje ye oniyokõr mɨhnĩ̵kpe par uje aahla õr par otɨbey Porrosht aabo. Kɨmɨjɨ oniyokõr uje mɨhnũwo heke oso ochinehnɨm õr ɨre. Kal anciano shɨ duhu nerãhta nohmɨra hn õr aabo ye odotiis Jesús. Kɨmɨjɨ oniyokõr uje mɨhnũwo heke oso ochinehnɨm ese anciano pork ɨr aabo oshiyokõr uje mɨhnũwo heke tyenɨj ɨr aabo shish oshiyokõr uje õr deych hn data otatɨm õr. 7Erze uje omasaha par anciano ich omasaha par otɨbey Porrosht aabo heke ye ompe yeẽk uje shiyokõr mĩ̵hnɨk masaha erze obiyo hnii ese uje shɨ shiyokõr uje ɨre sahmũr. Hn ye ompe yeẽk uje chesdelo shɨchish. Ye ompe ese uje yɨkɨch sẽhi, hn ye ompe ese uje satsɨr yewo. Ye ompe ese uje sehe torha hnote. 8Om uje yeẽk masaha erze obiyo ich tyenɨj sahmũr uje oso otekɨrɨhɨ ɨre. Sahmũr takashɨm yewo. Shish shuu deyuwo tɨsĩ̵r erze obiyo uje shiyokõr kɨmɨjɨ om o kɨmɨjɨ ye ompe hn shiyokõr erze om uje Porrosht sahmũr. Tɨbey ɨre par uje ye niyokõr uje mĩ̵hnɨk. Shish shiyokõr uje Porrosht ahwoso tata hn ye niyokõr erze mɨhnũwo uje yewo sehe oduhu niyokõr. 9Ye noym Porrosht ahwoso uje yewo oshiyokorãha ɨre par uje ɨre pwele shiyokorãha yewo erze uje ich ũru hn par uje ɨre pwele sontew õr ahwoso erze uje õr eyuwo kɨnãho. 10Ich okɨhniya erze uje ye onahmũrpe erze Porrosht ahwoso uje yiyokorãha oso. Ich ochɨrahapa ochiilehet per ye õr ahwoso jukur. Shɨ otsehnyẽr oso. Ma okɨhniya wɨr israel oso uje otsehnyẽr oso oshuu ɨtsorz. 11Tyenɨj ahɨrm õr par uje ye odiilehet pork otĩ̵r oso õr ihyuwo hn oshuu wɨr õr eyuwo mɨhnũwo hn oshuu otsotiis Porrosht. Oshiyokorãha õr erze uje ye ũrpe shɨ par uje otserz hnote. 12Sohmet deni uje creta oso ochɨbɨte par õr profeta. Wɨchɨ tata shuu ɨtsorz: —Erze creta oso wɨr shɨ õr kushĩyo. Wɨr shɨ õr ɨtso erze loshɨpo uje shɨ dɨrkɨhɨ lekɨtiyo par uje tohɨr. Wɨr õr towo hn õr jar.— 13Ese profeta tatni shuu ɨtsorz hn ich ũru heke atɨm erze creta oso ich ehnew par uje ye oduhu ɨlorz par uje uhu ye olotiis Porrosht ahwoso pork wɨr ich ũru. 14Uje odɨraha nehe uje Porrosht ahwoso ich ũru ich tyenɨj ye odɨbɨte uje ich ũru erze monɨhne uje erze israel oso otata. Tyenɨj ye otẽr erze oso õr ahwoso uje otsotiis Porrosht ahwoso. Erze õr ahwoso shɨ tãra õr. 15Erze oso uje õr ɨluu om uje oteychɨm kuchɨt ich ochɨbɨte uje om, per erze uje õr ɨluu mɨhnũ hn otsotiis Porrosht par õr ɨre ich nĩhyok uje ich om. Yakaha õr eyuwo par uje sehe oshiyokõr uje ich mĩ̵hnɨk hn uje oshiyokõr uje ich mĩ̵hnɨk ich ye opookpe. 16Otata uje õr ɨre ochɨraha Porrosht per erze uje õr ɨre oshiyokõr chɨbɨte orhõta uje õr ɨre ye odɨrehepe. Wɨr õr ɨluu mɨhnũ. Ye onahmũr oniyokõr uje Porrosht sahmũr. Ye õr pwele oniyokõr uje ich ompe.

will be added

X\