ROMANOS 8

1Nos wɨr uje ye olotiis Jesucristope wɨr uje ye otĩ̵r urhuta bahluta ehet nehe. 2Porrosht Ɨchɨbich ɨshɨm õr ɨkɨrĩt uje yelɨj nɨhna ɨre pork ye olotiis Jesucristope, hn chiyuhu õr par uje erze kuche mɨhnũwo ye dii õr delohope. Erze kuche mɨhnũwo seya oso urhuta bahluta ehet nehe. 3Kɨmɨjɨ yiyokõr uje erze ley tata uje Moisés chichewkite ich eyok ɨkɨrĩt de uje yelɨj nɨhna ɨre per ye eyok pwele yiyokõrpe, heke Porrosht sosɨr eyok hn shuu Deyjɨt tɨrẽt par uje ɨshɨ eyok hnɨtewɨhɨ dahɨr. Shuu Cristo shũrha per ye niyokõrpe uje mĩ̵hnɨk mahn oso oshiyokõr. Wɨchɨ chiyuhu eyokɨhɨ erze kuche mɨhnũwo par uje ye wɨr dii eyok delohope. 4Erze ley uje Moisés chichewkite wɨr ich om. Uje yɨbɨte uje yuhu Porrosht Ɨchɨbich iyeebe hn yiyehe nẽr ich yiyokõr uje erze ley tata, per kɨmɨjɨ shɨ yiyokõr uje shɨ eyok yahmũr ich ye yiyokõrpe uje erze ley tata. 5Nos wɨr oso uje shish oshuu deyuwo tɨsɨrĩ̵hɨ erze kuche uje de nãhu ĩ̵rmo ich shish oshiyokõr erze mɨhnũwo uje õr ɨre otsahmũr, per nos wɨr oso uje oshuu deyuwo tɨsɨrĩ̵hɨ uje Porrosht Ɨchɨbich sahmũr ich shɨ oshiyokõr uje ɨre sahmũr. 6Uje shɨ oshuu deyuwo tɨsɨrĩ̵hɨ erze kuche uje de nãhu ĩ̵rmo ich erze mɨhnũwo uje de nãhu ĩ̵rmo tyenɨj seya õr urhuta bahluta ehet nehe, per erze uje shɨ oshuu deyuwo tɨsɨrĩ̵hɨ uje Porrosht Ɨchɨbich sahmũr ich õr ɨkɨrĩt de uje yelɨj nɨhna ɨre hn õr aho kɨɨs. 7Nos wɨr uje shɨ oshuu deyuwo tɨsɨrĩ̵hɨ erze kuche uje de nãhu ĩ̵rmo wɨr Porrosht ɨr ɨmãho pork ye onahmũrpe oniyokõr uje Porrosht ɨr ley tata, hn kɨmɨjɨ õr prowa oniyokõr uje erze ley tata ich ye õr pwelpe. 8Nos wɨr uje shish oshiyokõr erze kuche mɨhnũwo uje de nãhu ĩ̵rmo wɨr ye õr pwelpe oniyokõr uje Porrosht sahmũr. 9Kɨmɨjɨ ũru uje Porrosht Ɨchɨbich chɨhɨ olak aho ich ye ahakõrlope erze olak ɨluu ɨler. Shɨ ahakõrlo uje Porrosht Ɨchɨbich sahmũr. Nos wɨr erze uje ye Porrosht Ɨchɨbich chɨhɨ õr ahope wɨr ye Porrosht aabope, 10per uje Cristo de olak aho ich olak ɨchɨbiyo ɨkɨrĩt de pork Jesús ɨshɨ olak hnɨtewɨhɨ Porrosht ahɨrkite. Kuche mɨhnũwo de nãhu ĩ̵rmo heke Porrosht chɨbɨte uje nos oso tyenɨj otoy, heke eyok yũhurrza tyenɨj toy nehe. 11Porrosht shuu Jesucristo ɨkponi chĩ̵ra Dechɨbich par uje tokolɨhɨ erze topo õr ahɨr. Kɨmɨjɨ Porrosht Ɨchɨbich chɨhɨ olak aho ich Porrosht tyenɨj shuu Dechɨbich shuu olak yũhurrza ɨkpo nehe ɨtso Cristo uje ɨkponi. 12Pɨshɨbo watsaklo, heke titɨm olak. Ye uhu erze olak ɨluu ɨler dɨrok olak par uje ahakõrlo uje sahmũr. 13Kɨmɨjɨ shish ahakõrlo uje olak ɨluu ɨler sahmũr ich tyenɨj atɨlo, per kɨmɨjɨ ahakõrlo uje Porrosht Ɨchɨbich sahmũr ich uhulo erze olak ɨluu ɨler shɨ ɨtso uje toy pork ye ahakõrlope uje sahmũr, heke olak ɨkɨrĩt de. 14Nos wɨr erze uje oshuu Porrosht Ɨchɨbich iyeebe hn oyehe nẽr wɨr Porrosht aabo. 15Porrosht ye duhu olak ɨlo uje olak shɨ yeẽk ɨr yɨlo uje ich atɨlɨlpa. Porrosht shuu amsahalo par olak ɨr aabo pork ich ũru uje eyok Porrosht aabo pisho. Yɨbiilo Porrosht yuhulo ɨtsorz ɨm: —Dii Porrosht,— 16pork Porrosht Ɨchɨbich tatɨm eyok ɨchɨbiyo uje eyok Porrosht aabo. 17Ich ũru uje eyok Porrosht aabo, heke erze Porrosht kushjãro uje de ɨre ahɨr wɨr par eyok toy shɨ ɨtso uje wɨr par Cristo toy pork shish eyok ewenta erze kuche mɨhnũwo uje tĩ̵r eyok shɨ pork ye yotiis Cristope. Uje ich terɨhɨ uhurc nehe ich eyok owich ɨhĩ̵rtpa de Cristo ahɨr. 18Heke titɨm olak uje erze kuche mɨhnũwo uje yesh tĩ̵r eyokɨhɨ nãhu ĩ̵rmo ye yɨteẽta erze uje ich ɨhĩ̵rtso uje de wahacha poõrc. Wɨr uje Porrosht tyenɨj sowa eyok nehe. 19Heke nos wɨr uje Porrosht shiyokõrkite ich tarãha uje Porrosht chɨbɨte laabo õr orhõta nehe. 20Porrosht sajɨr ĩ̵rmo ɨkiyokite heke ye ɨlope uu ĩ̵rmo tenit. Shiyokõr shuu ɨtsorz pork ɨre sehe niyokõr duhu ɨlorz. Ye niyokõrpe uje ich ma om par ĩ̵rmo per deeych yet nehe hn Porrosht nɨshiipo. 21Nos wɨr kuche uje de nãhu ĩ̵rmo ich nos sɨhna ɨre, per deeych yet nehe hn Porrosht nɨshiipo par uje ich ye nɨhna ɨrpe. Shish tyenɨj de nehe shɨ ɨtso wɨr Porrosht aabo. 22Yɨrahalo uje nos wɨr kuche shish sɨhna ɨre per wɨr shɨ ɨtso oso uje ɨhnakosh uje ewenta nehech ele ahle shɨ ɨtso asa tɨmcharrza ewenta uje ɨr ijɨt tabɨta nehech shũrha. 23Eyok ɨtspo yiyem ese deeych pork Porrosht Ɨchɨbich de eyok aho. Wɨchɨ webich os uje ɨshɨmɨhɨ eyokni hn yehe kuche yewo de uje tyenɨj ɨshɨmɨhɨ eyok. Ich eyok aho ɨhnakosh uje ich yɨtɨrãha ese deeych uje Porrosht chɨbɨte eyok orhõta uje eyok ɨr aabo, hn shuu eyok yũhurrza ɨkpo hn shuu ahle. 24Yɨraha uje eyok owich de Porrosht ahɨr heke shish yiyem par uje yɨtĩ̵r ɨre ahɨr. Uje yumo erze kuche ich ye yiyempe pork eyok dechɨ. Nĩhyok yeẽk uje shish iyem erze kuche uje de ɨre ahɨr, 25per eyok yesh yiyem erze uje ye yumpe, hn shɨ yɨnta nehech terɨhɨ ese deeych nehe. 26Uje yiyem yuhu ɨtsorz hn erze uje tĩ̵r eyok ich ye eyok pwele ewentpe hn ye yɨrahape latɨkpo uje ich ma om par uje eyok orar yapur Porrosht ich Porrosht Ɨchɨbich takashɨm eyok hn orar par eyok. Ɨr ahwoso ich shɨ ɨtso oso õr ɨhna heke nĩhyok yeẽk pwele tata uje Porrosht Ɨchɨbich tatɨm Porrosht. 27Porrosht shish teychɨm oso õr aho kɨmɨjɨ om o kɨmɨjɨ ye ompe. Wɨchɨ chɨraha Dechɨbich ɨr eyuwo pork uje Porrosht Ɨchɨbich sapur Porrosht par nos wɨr ɨr aabo ich shish sapur uje Porrosht sahmũr. 28Titɨm olak. Yɨrahalo uje nos wɨr kuche uje tĩ̵r eyoklo uje yahmũrlo Porrosht ich Porrosht shish shuu tokole uje ich om par eyoklo nehe. Porrosht chiihla eyoklo par uje yiyokõrlo uje ɨre sahmũr. 29Uje ehn yahpaa Porrosht niyokõr ɨrmõkite ɨchii chɨraha yeniipo uje tyenɨj omasaha par ɨr aabo nehe. Heke Porrosht chɨbɨtkite uje ich uhurc nehe hn ɨr aabo õr ɨluu tyenɨj tokole ɨtso Deyjɨt ɨr ɨluuta, heke ɨr Ijɨt wɨchɨ webich os hn deshɨbo hn nanɨme ode ich okɨhniya. 30Erze uje Porrosht chɨbɨtkite uje õr ɨluu tokole ɨtso Cristo ɨr ɨluuta nehe wɨr uje Porrosht chiihla õr, hn erze uje chiihla õr wɨr uje shuu Cristo ɨshɨ õr hnɨtewɨhɨ dahɨr. Erze uje ɨshɨ õr hnɨtew wɨr uje shuu õr owich de dahɨr. 31Erze uje titɨm olakɨke ich ɨhĩ̵rt pisho. Ye latɨk pwele sontew uje Porrosht sosɨr eyok, heke ye latɨk pwele uje sontew eyok par uje ye yɨtĩ̵r ɨre ahɨr nehe. 32Porrosht ye narhak Deyjɨtpe. Ɨshɨm osokite par uje wɨchɨ nos ɨshɨ eyok hnɨtewɨhɨ Porrosht ahɨr, heke tyenɨj nos ɨshɨmɨhɨ eyok erze kuche nehe shuu ɨtso uje ɨshɨm Deyjɨt toy. 33Ye latɨk pwele denunsya erze uje Porrosht chiihla õr pork Porrosht wɨchɨ uje ɨshɨ õr hnɨtewɨhɨ dahɨr. 34¿Yeẽkpo uje pwele tata uje eyok tyenɨj yɨtĩ̵r urhuta bahluta ehet nehe? Jesucristo ye tatpe duhu ɨlorz pork wɨchɨ uje tokite par uje ɨshɨ eyok hnɨtewɨhɨ dahɨr. Porrosht chiyuhu Cristo erze topo õr ahɨr hn ele ahle sakaha Porrosht waãchta pork wɨchɨ ich dich. Wɨchɨ shish sapur Porrosht par eyok. 35¿Yeẽkpo uje pwele shuu Cristo iim uje sahmũr eyok? Kɨmɨjɨ mɨhnũwo tĩ̵r eyok, ¿je wɨchɨ noym eyok? Ye noym eyokpe. Kɨmɨjɨ kuchẽrk masaha eyok uje ich dospa, o kɨmɨjɨ oniyokõr mɨhnɨkĩ̵hɨ eyok pork ye yotiis ɨrpe, o kɨmɨjɨ sewɨt nẽhi eyok, o kɨmɨjɨ nĩhyok ye eyok ɨshuwĩ̵rsh, o kɨmɨjɨ kuchẽrk sehe dishew eyok uje ich yarhakpa, o kɨmɨjɨ yeẽk duhu eyok duhu yɨtɨ, ¿je wɨchɨ noym eyok? Wɨchɨ ye noym eyokpe uje sahmũr eyok. 36Porrosht ahwoso tata uje yeẽk tatɨm Porrosht shuu ɨtsorz ɨm: —Shish ode uje sehe oduhu õryok oduhu oyɨtɨ pork ye oyotiis owape. Oshuu õryok ɨtso obeje uje ohnoy par uje sehe oduhu.— Wɨr uje Porrosht ahwoso tata shuu ɨtsorz. 37Uje nos wɨr kuche tĩ̵r eyok ich shish yerz pork Porrosht sahmũr eyok hn sosɨr eyok. 38Tɨkɨraha uje ye latɨk pwele shuu Porrosht iim uje sahmũr eyok. Uje oshuu eyok oshuu yɨtɨ ich shish sahmũr eyok. Uje yesh eyok ɨka nĩhyok kuchẽrk uje pwele shuu Porrosht iim eyok, hnii erze ɨr anjele, hnii erze ɨchɨbiyo mɨhnũwo, hnii kuchẽrk uje de hn uje de nehe, hnii erze uje õr ukurbo deyo de, 39hnii erze uje de porĩt, hnii erze uje de hnɨmich uut pisht, hnii nos wɨr kuche yewo uje Porrosht shiyokõr ye pwelpe uje shuu Porrosht iim uje sahmũr eyok. Ɨmeheeych uje Porrosht sahmũr eyok pork shuu eyok Ɨrhĩch Jesucristo toy hn ɨshɨ eyok hnɨtewɨhɨ dahɨr.

will be added

X\