ROMANOS 5

1Titɨm olak uje eyok Ɨrhĩch Jesucristo ɨshɨ eyok hnɨtewɨhɨ Porrosht ahɨr ich shuu Porrosht ehet kɨɨsɨhɨ eyoklo shɨ pork ye yotiis ɨrpe. 2Heke Cristo shuu Porrosht kahnɨr eyoklo pork nĩhyok ye eyok hnɨtew chɨhɨ ɨre ahɨrpe shɨ pork ye yotiis ɨrpe. Ich eyok ayla uje yɨrahalo uje deeych yet nehe hn shuu eyok ɨluu ɨtso Porrosht ɨr ɨluuta hn yebuhulo ɨre ahɨr. 3Ye shɨ eyok ayla yuhu ɨtsorz. Eyok ayla toy uje kuche mɨhnũwo tĩ̵r eyoklo pork yɨrahalo uje erze kuche mɨhnũwo shɨ tĩ̵r eyok par ma shuu eyok ukurbosh par uje ma eyok ewenta erze kuche. 4Uje shish ma eyok ewenta ich shuu eyok ɨluu ma om ɨtso uje Porrosht sahmũr. Uje eyok ɨluu om ɨtsorz ich shuu yɨrahapa uje Porrosht ahwoso shish yakaha. 5Yelɨj sẽhi lahwoso heke ye duhu yɨpooklope pork Porrosht chɨbɨte Dechɨbich eyok aho uje shuu yɨrahalo uje Porrosht sahmũr pishɨ eyok. 6Antkite hn eyok hnɨtew de Porrosht ahɨr pork nĩhyok uje yeẽk pwele ɨshɨ. Uje terɨhɨ ese ɨshɨrĩtkite uje ich om hn Cristo toy par uje ɨshɨ oso õr hnɨtewɨhɨ Porrosht ahɨr pork nos oshiyokõr uje ich mɨhnũwo. 7Nĩhyok yeẽk uje ɨshɨmɨhɨ ɨre par uje oshuu oshuu toy par uje ye oduhu yet uje shish shiyokõr asa ley waa je Moisés chichewkite. Per kɨmɨjɨ sehe oduhu oduhu toy ese yet uje ɨluu om kɨmɨjɨ yeẽk chɨhɨ uje sahmũr ɨre hn ɨshɨmɨhɨ ɨre par uje masaha owich shuu oshuu ɨre oshuu toy 8per Porrosht sowa eyok uje ich sahmũr pishɨ eyok shuu ɨtsorz. Uje ehn yiyokõrlo kuche mɨhnũwo ich Porrosht shuu Cristo toy par uje ɨshɨ eyok hnɨtewɨhɨ dahɨr. 9Heke ele ahle ich ye eyok hnɨtew chɨhɨ Porrosht ahɨrpe pork Cristo tooho krus eeych. Ɨr armɨsta noshɨ par uje ɨshɨ eyok hnɨtewɨhɨ Porrosht ahɨr. Ich ũrpa uje Cristo shish sosɨr eyok par uje ye Porrosht depyẽr eyok nehe hn nɨmchaha eyok urhuta bahluta ehet. 10Ich ɨmeheeych uje ɨtsorz pork uje ehn eyok Porrosht ɨmãhoni ich shuu Deyjɨt tooho krus eeych par uje shuu Porrosht ehet kɨɨsɨhɨ eyok. Ele ahle ich Porrosht ehet kɨɨsɨhɨ eyok heke ich ũru uje eyok tyenɨj yebuhulo Porrosht ahɨr nehe pork Cristo ɨkponi hn takashɨm eyoklo. 11Ye shɨ erzepe. Eyok ayla toy pork Porrosht wɨchɨ eyok Porrosht, pork eyok Ɨrhĩch Jesucristo shuu Porrosht ehet kɨɨsɨhɨ eyoklo. 12Eseekite uje ĩ̵rmo tenit ich nĩhyok ye latɨk toy, per shɨ hnakɨrbich nohmɨra shuu erze kuch mɨhnũwo tĩ̵r ĩ̵rmo, heke nos oso tyenɨj otoy pork nos oshiyokõr uje ich mɨhnũwo. 13Ehn yahpaa Moisés dichew asa leykite ich shish erze kuche mɨhnũwo de nãhu ĩ̵rmo. Per kɨmɨjɨ nĩhyok ye ley chɨhɨpe ich ye õr pwelpe uje otata uje oyuwe ley pork nĩhyok. 14Uje Adán lɨshɨ de nehech terɨhɨ uje Moisés lɨshɨ de ich shish otoy shɨ ɨtso uje oyuwe ley, per ye oniyokõrpe ese kuchɨt mɨ̃hnt uje Adán shiyokõr. Adán sohmɨra uje shiyokõr kuche dich hn Cristo sohmɨra uje shiyokõr kuche dich toy uje tɨrẽt iyehe Adán nẽr. 15Per ese uje Cristo ɨshɨmɨhɨ oso ich kɨnaha hn ese uje Adán shuu tĩ̵r oso ich kɨnaha toy. Ese uje Adán shiyokõrkite shuu nos oso tyenɨj otoy, per ese uje Porrosht shiyokõrkite sosɨr oso okɨhniya pork ese hnakɨrbich uje ɨshɨ õr hnɨtewɨhɨ Porrosht ahɨr wɨchɨ Jesucristo hn ese uje shiyokõr ye bahatɨkɨsh. 16Ese kuchɨt mĩ̵hnt uje ese hnakɨrbich shiyokõrkite wɨchɨ kɨnaha, hn ese uje ich ɨhĩ̵rt uje Porrosht ɨshɨmɨhɨ eyok wɨchɨ kɨnaha. Adán iyuwe uje Porrosht tata heke shuu Porrosht sepyẽr oso shuu otĩ̵r urhuta bahluta ehet nehe per Porrosht sehe dosɨr oso hn ye duhu bahatɨkɨsh. Oso oshiyokõr kuche mɨhnũwo ich kɨhniya per wɨchɨ ɨshɨ erze oso õr hnɨtew. 17Shɨ ese kuchɨt mĩ̵hnt nohmɨra uje ese hnakɨrbich shiyokõrkite ɨchii shuu nos oso otoy, per ich ũrpa uje erze uje ye olotiis Porroshtpe ich Porrosht nos perdonar õr. Ye duhu bahatɨkɨsh pork Jesucristo wɨchɨ hnakɨrbich uje shiyokõr uje ich om heke shuu õr ɨkɨrĩt de uje yelɨj nɨhna ɨre. 18Ese kuchɨt mĩ̵hnt uje Adán shiyokõr wɨchɨ uje shuu nos otĩ̵r urhuta bahluta ehet nehe, per ese uje ich ɨhĩ̵rt uje Jesucristo shiyokõr par uje sosɨr erze oso uje ye olotiis ɨre ich ɨshɨ õr hnɨtewɨhɨ Porrosht ahɨr hn shuu nos õr ɨkɨrĩt de Porrosht ahɨr. 19Adán ye niyokõrpe uje Porrosht tatɨm ɨre heke shuu nos oso oshiyokõr uje mɨhnũwo, per Jesús wɨchɨ uje nos shiyokõr uje Porrosht tatɨm ɨre heke shuu oso okɨhniya uje nĩhyok õr hnɨtewɨhɨ Porrosht ahɨr. 20Asa ley waa je Moisés chichewkite shuu ɨmeheeych uje nos oshiyokõr uje ich mɨhnũwo pork nos oyuwe erze ley per Porrosht shɨ shuu ma ɨmeheeych uje sosɨr oso. 21Erze kuche mɨhnũwo uje oshiyokõr wɨr shuu otoy hn tyenɨj seya õr urhuta bahluta ehet nehe, per Porrosht ich sahmũr pishɨ oso heke eyok Ɨrhĩch Jesucristo ɨshɨ oso õr hnɨtewɨhɨ dahɨrkite par uje shuu õr ɨkɨrĩt de uje yelɨj nɨhna ɨre kɨmɨjɨ ye olotiis ɨrpe.

will be added

X\