ROMANOS 16

1Sehe tuu erahalo uje Febe wate eyok nanap. Wate Porrosht aap hn dyakɨnyarĩ̵hɨchɨs ese dɨt Cencrea. 2Sehe tuu olak ayla uje wate taachĩ̵hɨ olak ahɨr nehe pork ich om uje nos akashɨmlo Porrosht aabo hn wate eyok Ɨrhĩch ɨr aap. Uje kuchẽrk nihyokĩ̵hɨ ahɨr ich akashɨmlo wate pork wate shish takashɨm Porrosht aabo hn takashɨm yok toy. 3Tokosɨm Prisca hn Aquila õr saludo. Wɨr pihyẽro uje oshiyokõr Jesucristo ɨr ɨbiyo ɨtso yok. 4Wɨr otakashɨm yokni par uje ye erze yewo oduhu yok oduhu tɨkɨtɨ nehech sehe oduhu õr toy. Ye shɨ yokpe uje tɨkɨna õr, nos wɨr Porrosht aabo uje otakɨsho lawichɨhɨ lekɨtiyo uje õr dihipo kɨnãho onɨna õr toy. 5Tokosɨm saludo erze Porrosht aabo uje otakɨsho lawichɨhɨ Prisca hn Aquila õr ihyuch. Tokosɨm saludo Epeneto. Wɨchɨ ich tahmũr. Wɨchɨ webich os uje ye lotiis Cristope uje dechɨ hnɨmich Asia. 6Tokosɨm María saludo. Wate shish shiyokõr Cristo ɨr ɨbiyoho olak ahɨr. 7Tokosɨm saludo Andrónico hn Junias. Wɨr pɨhnapso uje ode pahɨr karsel ehetni. Wɨr apóstole uje oshiyokõr debiyo ich otsɨhnew. Uje ehn yahpaa tomsahani par yok Porrosht aap ɨchii õr ɨre omasaha par Porrosht aabo. 8Tokosɨm saludo Ampliato toy. Tahmũr ɨre pork ye lotiis eyok Ɨrhĩchpe. 9Tokosɨm saludo Urbano. Wɨchɨ ĩya yokni uje oyiyokõr Cristo ɨr ɨbiyo. Tokosɨm saludo Estaquis. Ich tahmũr ɨre. 10Tokosɨm saludo Apeles toy. Ich ɨmeheeych uje ɨre ye lotiis Cristope. Tokosɨm saludo nos wɨr Aristóbulo ɨr iiso toy. 11Tokosɨm ese pɨhnapsɨt Herodión saludo toy. Tokosɨm saludo toy nos wɨr Narciso ɨr iiso uje ye olotiis eyok Ɨrhĩchpe. 12Tokosɨm saludo Trifena hn Trifosa. Wɨr ochish eyok Ɨrhĩch ɨr ɨbiyo. Tokosɨm saludo Pérsida. Wate shish chish eyok Ɨrhĩch ɨr ɨbiyo. Nos wɨr Porrosht aabo otsahmũr wate. 13Tokosɨm saludo Rufo toy. Wɨchɨ ma ye lotiis eyok Ɨrhĩchpe. Tokosɨm waa ɨr lata saludo toy. Wate shɨ ɨtso uje yok patɨ. 14Tokosɨm saludo Asíncrito, hn Flegonte hn Hermes hn Patrobas hn Hermas hn nos wɨr Porrosht aabo uje ode õr ahɨr. 15Tokosɨm saludo Filólogo toy hn Julia hn Nereo hn waa nanɨmicha toy. Tokosɨm Olimpas saludo toy hn nos wɨr uje ye olotiis Cristo uje odechɨ õr ahɨr toy. 16Nos tyenɨj etɨloye. Nos wɨr uje ye olotiis Cristope uje otakɨsho lawichɨhɨ lekɨtiyo oshɨm olak saludo. 17Pɨshɨbo watsaklo, titɨm olak. Eychɨmlo erze oso uje shish sehe odehek olak hn sehe oduhu olak yewo oniyokõr uje ich kɨnaha, ye ɨlo erze ahwoso uje oshiyokorãha olakni. Moymlo wɨr, ye meylo õr 18pork ye oniyokõr eyok Ɨrhĩch Jesucristo ɨr ɨbiyope. Shɨ oshiyokõr uje õr ɨre otsahmũr. Otata lahwoso uje ich ɨhĩ̵rt pisho shɨ par otsehnyẽr erze uje ye odɨrehepe. 19Nos oso ochɨraha uje olak dechɨ dɨt Roma shish ahakõrlo uje ich om uje Porrosht sahmũr heke ich uhulo yok aylpa, hn sehe tuu olak eykdeyo heke ahakõrlo uje ich om hn ye ahakõrlo uje ich mɨhnũwo. 20Kɨmɨjɨ olak eykdeyo ɨlorz ich Porrosht uje shuu oso õr aho kɨɨs ich shuu ɨtso uje arãhalo Satanás hnɨmich. Sehe tuu eyok Ɨrhĩch Jesucristo dosɨr olak. 21Timoteo ɨshɨm olak saludo. Wɨchɨ ĩya yok uje oyiyokõr Cristo ɨr ɨbiyo. Lucio hn Jasón hn Sosípater oshɨm olak saludo toy. Wɨr yok pɨhnapso. 22Yok Tercio uje tichew Pablo ahwoso tɨbɨte ana hutɨta. Tokosɨm olak saludo pork yok Porrosht aap toy. 23Gayo ɨshɨm olak saludo toy. Yok Pablo. Gayo shuu tiyakaha dahuch. Wɨchɨ shish shuu nos Porrosht aabo otakɨsho lawichɨhɨ dahuch hn oteeychãha Porrosht. Erasto ɨshɨm olak saludo toy. Wɨchɨ tesorero uje tɨbey ese dɨt ɨr hnote. Cuarto ɨshɨm olak saludo toy. Wɨchɨ Porrosht aap toy. 24Sehe tuu eyok Ɨrhĩch Jesucristo nos takashɨm olak. Ich ɨhĩ̵rtpa uje ɨtsorz. 25Titɨm olak. Porrosht ukurbo deyo de par uje takashɨm olak. Tanɨmɨrãha Porrosht ahwoso hn titɨm oso tuu ɨtsorz. Titɨm oso toy uje Jesucristo ɨshɨ õr hnɨtewɨhɨ Porrosht ahɨrkite. Wap Porrosht ye duhu odɨrehepe 26per ele ahle ich shuu ochɨraha. Erze ahwoso uje profeta poruwo wɨshɨ ochichewkite wɨr uje Porrosht shuu nos erze dihipo kɨnãho ochɨraha uje Cristo shiyokõrkite par uje ye olotiis ɨre hn oshiyokõr uje ɨre tata. Porrosht yelɨj nɨhna ɨre. 27Wɨchɨ shɨ sohmɨra hn ich eykdeyo. Sehe tuu nos ye olotiis uje Jesucristo ɨshɨ õr hnɨtewɨhɨ Porrosht ahɨrkite heke oshuu Porrosht ich dich. Ich ɨhĩ̵rtpa uje oniyokõr ɨr ahwoso oduhu ɨlorz.

will be added

X\