ROMANOS 15

1Eyok uje yɨraha uje Porrosht ahwoso tata ich ye ompe uje shɨ yiyokõr uje yahmũr. Tyenɨj eyok ewenta erze uje yẽrɨj odɨrahapa Porrosht ahwoso heke õr koswãha hn ochimehi. 2Tyenɨj yakashɨm erze uje yẽrɨj odɨraha Porrosht ahwoso par uje ma ye olotiis ɨre. Wɨchɨ ich om par õr ɨre. 3Cristo ye niyokõrpe uje shɨ ɨre sahmũr per shish shiyokõr uje Porrosht sahmũr. Porrosht ahwoso tata uje Cristo tatɨm Porroshtkite shuu ɨtsorz ɨm: —Erze uje ochiyuhu lahwoso mɨhnuwõho owa ich ochiyuhu lahwoso mɨhnuwõho yok toy.— 4Nos wɨr Porrosht ahwoso uje profeta poruwo wɨshɨ ochichewkite wɨr par shiyokorãha eyok par uje yɨraha heke eyok ewenta erze kuch mɨhnũwo uje tĩ̵r eyok hn yɨraha uje eyok owich de Porrosht ahɨr. 5Porrosht wɨchɨ uje shuu eyok ewenta erze kuche uje tĩ̵r eyok hn shuu eyok aho kɨɨs. Sehe tuu Porrosht duhu olak eyuwo ɨlye ɨlo Cristo uje hõr Deych õr eyuwo ɨtsye 6par uje nos eeychãhalo Porrosht uu eyok Ɨrhĩch Jesucristo ɨr Deych pork ich nos olak eyuwo ɨtsye. 7Tyenɨj olak ayla uje wɨr õya olak erze Porrosht aabo uje yẽrɨj odɨraha Porrosht shɨ ɨtso uje Cristo ayla uje amsahalo par olak Porrosht aabo par uje uhulo Porrosht dich. 8Titɨm olak uje Cristo tɨrẽtni par uje takashɨm erze israel oso par uje sowa õr uje Porrosht ahwoso ich ũru uje chɨbɨte tatɨm eyok poruwo wɨshkite pork Cristo shuu Porrosht ahwoso yakaha uje tatɨm õr. 9Tɨrẽt toy par uje takashɨm erze dihipo kɨnãho par uje wɨr onɨna Porrosht uje sosɨr õrkite pork ɨr ahwoso tata shuu ɨtsorz ɨm: —Cristo tatɨm Porrosht ɨm: “Tyenɨj tɨkeeychãha owa uje yok dechɨ dihipo kɨnãho õr ehet, hn tɨkeeychɨ teẽt imno par owa nehe.”— 10Porrosht ahwoso tatpo tatɨm erze dihipo kɨnãhokite ɨm: —Uhu olak ayla hõr wɨr israel oso.— 11Hn Porrosht ahwoso tatpo shuu ɨtsorz ɨm: —Olak uje olak dihipo kɨnãho, nos eeychãhalo olak Ɨrhĩch, hn sehe duhu nos oso oteeychãha ɨre.— 12Profeta Isaías tatkite ɨm: —Cristo tyenɨj tɨrẽt nehe. Wɨchɨ tyenɨj tãra Isaí lɨshɨ uu rey David lɨshɨ ɨr deych. Ese Cristo tyenɨj tɨbey erze dihipo kɨnãho nehe, heke erze dihipo kɨnãho ochɨraha uje õr owich de Porrosht ahɨr pork ye olotiis Cristope.— Wɨr uje Porrosht ahwoso tata. 13Porrosht wɨchɨ uje shuu erahalo uje olak owich de ɨre ahɨr. Sehe tuu Porrosht duhu nos olak ayla hn duhu olak aho kɨɨs pork ye otiislo ɨrpe. Uje Porrosht niyokõr duhu ɨlorz ich ɨr Ɨchɨbich shuu erahalo uje ich ũru uje olak owich de Porrosht ahɨr. 14Pɨshɨbo watsaklo, ye tokotiispe uje olak ɨle om. Tɨbɨte uje nos erahalo ahakõrlo uje Porrosht sahmũr hn erahalo uje akɨtloye. 15Erze ahwoso uje tuu ochichew ochɨbɨte asa hutɨta ich meytii doso uje titɨm olak hn par uje olak eyucha pork Porrosht chɨbɨte yok erze pɨbiyo par uje titɨm olak tuu ɨtsorz. 16Yok Jesucristo ɨr ɨbɨk par uje titɨm erze dihipo kɨnãho ɨr ahwoso. Erze Porrosht ɨbiyo uje ɨshɨm yok par tiyokõr wɨr uje titɨm õr uje Jesucristo ɨshɨ õr hnɨtewɨhɨ Porrosht ahɨrkite. Heke yok shɨ ɨtso israel oso õr saserdote uje oshɨm Porrosht loshɨpo armɨstakite hn erze dihipo kɨnãho uje titɨm õr Cristo wɨr shɨ õr ɨtso erze loshɨpo uje tokosɨmɨhɨ Porrosht. Wɨchɨ uje Porrosht ich sahmũrpa uje tiyokorãha erze dihipo kɨnãho pork Porrosht Ɨchɨbich nɨshii õr. 17Yok narim Jesucristo pork shuu pɨbiyo tokole ich om uje Porrosht ɨshɨm yok par uje tiyokõr. 18Shɨ tiita uje Cristo shiyokõrni pork wɨchɨ uje shuu pɨbiyo tokole ich om. Uje titɨm erze dihipo kɨnãho tuu ɨtsorz hn uje omo uje tiyokõr ich ye olotiis ɨrpe hn oshiyokõr uje Porrosht ahwoso tata. 19Porrosht Ɨchɨbich ich ukurbo deyo de. Wɨchɨ uje takashɨm yok par uje shuu tiyokõr erze kuche uje ye latɨk pwele shiyokõr par uje ye olotiis Cristope. Heke titɨm erze dɨt Jerusalén oso hn nos wɨr oso yewo uje ode lekɨtiyo nehech takaachĩ̵hɨ ese hnɨmich Iliria titɨm õr uje Jesucristo ɨshɨ õr hnɨtewɨhɨ Porrosht ahɨrkite, 20pork tɨbɨte uje shɨ tɨtĩ̵r erze oso uje ye odɨraha uje Cristo ɨshɨ õr hnɨtewɨhɨ Porrosht ahɨrkite. Ye tɨtĩ̵r erze hnɨmope uje yewo otsanɨmɨrãha ɨr ahwosni pork wɨr ich ye pɨbiyope. 21Porrosht ahwoso tata shuu ɨtsorz ɨm: —Erze uje ye odɨraha Cristope wɨr uje tyenɨj ochɨraha nehe. Erze uje yelɨj onunt uje Cristo shiyokõrkite par õr ɨre wɨr uje tyenɨj ochɨraha nehe.— 22Heke titɨm olak. Nĩhyok ye yok tyempĩ̵rsh petɨkni par uje tekɨrɨhɨ olak, 23per ele ahle ich nos tɨhna pɨbiyoho lɨka, hn ich osdeyo uje sehe takaha tekɨrɨhɨ olakni, 24heke sehe tekɨrɨhɨ olak wap uje olak de dehet pehet uje takaha tɨtĩ̵r España nehe. Uje takaachĩ̵hɨ olak ahɨr nehe hn tiyakaha olak ahɨr tuu pɨkaap ich sehe tuu akashɨmlo yok uje tɨtĩ̵r ese hnɨmich España. 25Wap sehe takaha tɨtĩ̵r Jerusalén. Takahii hnote par tokosɨm erze Porrosht aabo uje odechɨ, 26pork erze Porrosht aabo uje ode erze hnɨmo Macedonia hn Acaya otakɨsho deyuwo hn ochɨbɨte hnote par otakashɨm erze Porrosht aabo uje õr losuhlaabo uje odechɨ dɨt Jerusalén. 27Wɨr ich õr ayla uje otakashɨm erze Porrosht aabo uje õr losuhlaabo. Erze uje ich om uje Porrosht ɨshɨmɨhɨ erze israel oso uje shuu Cristo ɨshɨ õr hnɨtewɨhɨ dahɨr ich tĩ̵r erze dihipo kɨnãho toy, heke ich om uje erze dihipo kɨnãho oshuu cheeshɨ otakashɨm erze israel oso toy. 28Uje tokosɨm erze hnote erze Porrosht aabo nehe uje Porrosht aabo yewo oshɨm õr ich sehe takaha tɨtĩ̵r España. Sehe tiyakaha olak ahɨr wap ese dehet pehet. 29Tɨkɨraha uje tekɨrɨhɨ olak nehe ich Cristo shuu tokole uje ich ompa. 30Pɨshɨbo watsaklo, shɨ pork Jesucristo wɨchɨ uu eyok Ɨrhĩch hn pork Porrosht Ɨchɨbich shuu yahmũrloye ich tapur olak par uje enaha olak par uje eyok orar yapurlo Porrosht par yok. 31Yapurlo Porrosht par uje ye wɨr odishew yok hn oduhu yok oduhu tɨkɨtɨ erze israel oso uje odechɨ hnɨmich Judea uje otsotiis Cristo. Apurlo Porrosht toy par uje erze ɨr aabo uje ode Jerusalén ich onahmũr erze hnote uje tãra erze dihipo kɨnãho uje tokõhwa par tokosɨm õr, 32heke kɨmɨjɨ Porrosht nahmũr uje takaachĩ̵hɨ olak ahɨr nehe ich yok aylpa hn tahmũrpa tekɨrɨhɨ olak. 33Sehe tuu Porrosht uje shuu oso õr aho kɨɨs takashɨm olak. Ich ɨhĩ̵rtpa uje ɨtsorz.

will be added

X\