ROMANOS 14

1Tyenɨj olak ayla uje yeẽk tekɨrɨhɨ olak uje Porrosht aap uje yẽrɨj dɨraha Porrosht ahwoso. Uje ɨre eyuwo tɨsĩ̵r kɨnaha, ye ɨlo uje olak eyuwo tɨsĩ̵r hn ye Porrosht ahwoso tata latɨk ich ye ahakoslo ɨre. 2Shɨ tɨteẽta kɨmɨjɨ yeẽk dɨraha uje nos wɨr oposo ich om par otew, per yet de uje ye dɨrehepe heke shɨ tew jõro. 3Ese uje nos tew erze kuche ye ompe uje chɨbɨte uje wɨchɨ ye jukur ese uje ye tepe, hn ese uje ye tew erze kuchepe ich ye ompe uje chish majamichɨhɨ ese uje tew. Ese uje tew erze ẽro hn ese uje ye tepe wɨr Porrosht aabo hn Porrosht sahmũr õr. 4¿Owa yeẽkpo par uje ata uje ich mĩ̵hnɨk ese yet ɨr ɨbich? Porrosht wɨchɨ uu ɨr Yɨnsɨrc, ye owape. Porrosht wɨchɨ uje tyenɨj tatɨm kɨmɨjɨ om uje shiyokõr o kɨmɨjɨ ye ompe, heke tyenɨj shiyokõr uje ich om pork eyok Ɨrhĩch ukurbo deyo de par uje takashɨm wɨchɨ. 5De uje shuu deyuwo tɨsĩ̵r ese deeych nohmet hn shuu ma dich par teeychãha Porrosht je uu daalo yewo, hn yet de uje shuu erze daalo nos ɨtsye. Kal nohmɨr shɨ tyenɨj shuu deyuwo tɨsĩ̵r uje ich om par ɨre kɨmɨjɨ diihla deeych nohmet ich ma dich o kɨmɨjɨ nos diihla, hn ye ompe uje koswãha. 6Wɨr õr ɨtsye, ochiihla uje õr ɨre otsahmũr par uje oteeychãha Porrosht, heke ich oshuu eyok Ɨrhĩch ich dich erze daalo. Ɨtso ese uje nos tew erze kuche pork shuu eyok Ɨrhĩch ich dich hn nɨna Porrosht. Ese yet uje ye tew ẽrope ich ye tepe heke shuu eyok Ɨrhĩch ich dich toy, hn nɨna Porrosht toy. 7Heke ich nĩhyok eyok yeẽk uje pwele shiyokõr shuu ɨtso uje ɨre sahmũr pork uje ehn ɨka ich shish tyenɨj shuu Porrosht dich hn uje terɨhɨ ese deeych uje toy ich shish shuu Porrosht dich. 8Uje yesh eyok ɨka hn uje yɨtɨ shish tyenɨj yiyokõrlo uje eyok Ɨrhĩch sahmũr. Heke shish yishew eyok Ɨrhĩch ɨr ɨbiyo uje yesh eyok ɨka hn uje yɨtɨ, 9pork Cristo tokite hn ɨkpo par uje wɨchɨ masaha par uu topo õr Ɨrhĩch hn erze uje õr ɨka toy. 10Heke titɨm olak yeẽk. ¿Ɨnaapo heke chish majamichɨhɨ Porrosht aap yet pork wɨchɨ leshap? Hn olak yet ɨtspo ¿ɨnaapo heke chɨbɨte uje wɨchɨ ye jukur pork wɨchɨ leshap toy? Deeych yet nehe hn nos yɨtĩ̵rlo Porrosht ɨle ɨkɨch ese owich uje teychɨm oso kɨmɨjɨ oniyokõr uje mĩ̵hnɨk o kɨmɨjɨ oniyokõr uje ich om. 11Porrosht ahwoso tata uje eyok Ɨrhĩch sole: —Ich ũru uje shish yok ɨka hn ich ũru toy uje tyenɨj nos ocha dete hnɨmoho pɨkɨch hn nos oteeychãha yok nehe otata uje yok ich dich.— Wɨr uje Porrosht ahwoso tata, 12heke kal eyok nohmɨr nohmɨr tyenɨj nos yitɨm Porrosht uje yiyokõrloni. 13Tyenɨj yukwim uje yishlo majamichɨhɨye pork nos tyenɨj yitɨm Porrosht uje yiyokõrloni yuhu ɨlorz nehe. Ma om yɨbɨte uje ye yiyokõrlo kuchẽrk uje shuu eyok leshɨbich shiyokõr uje ich mĩ̵hnɨk. Uje yuhulo shiyokõr uje mĩ̵hnɨk ich shɨ ɨtso uje yɨbɨte kojach ɨjɨch par uje shuu hnɨte shuu kay. 14Tɨkɨraha erze uje ye olotiis eyok Ɨrhĩch Jesuspe ich om par otew nos wɨr oposo. Wɨr om per par ɨre uje shuu deyuwo tɨsĩ̵r uje Porrosht ye nahmũr uje ɨr tew ich mɨhnũwo par ɨre tew. Shɨ shuu ɨtso uje Porrosht ahwoso ye jukur. 15Uje eshɨbich shuu deyuwo tɨsĩ̵r uje Porrosht ye nahmũr uje tew erze kuche hn teychɨm owa uje ew heke tew toy ich shiyokõr uje mĩ̵hnɨk. Uhu eshɨbich tew heke ich ye ahmũr wɨchpe. Ye owa eshɨbich uje ew erze uje shuu ɨre shiyokõr uje mĩ̵hnɨk. Cristo tooho krus eeych par uje ɨshɨ eshɨbich ɨr hnɨtew toy. 16Erze oposo uje eraha uje ich om per yewo oshuu deyuwo tɨsĩ̵r uje ich mɨhnũwo, ye ew par uje ye odish majamichɨhɨ owa. 17Par Porrosht aabo ich om par otaak hn oho ye latɨkɨsh, per ich ma ɨhĩ̵rtpa par õr ɨre uje tyenɨj oshiyokõr uje ich om hn oshuu laho kɨɨs hn õr ayla pork Porrosht Ɨchɨbich de õr aho. 18Erze uje oshiyokõr Cristo ɨr ɨbiyo oshuu ɨtsorz ich Porrosht sahmũr uje oshiyokõr hn nos wɨr oso otsahmũr toy, 19heke tyenɨj yiyokorĩ̵hɨye erze uje shuu eyok aho kɨɨs hn yakashɨmloye yuhu eyok ɨluu ma ɨtso Cristo ɨr ɨluuta. 20Ye ompe uje uhu Porrosht ɨbiyo tokole uje ye jukur shɨ pork sehe ew erze kuche. Ich ũru uje nos wɨr oposo ich om par uje otew, per kɨmɨjɨ ew erze uje shuu eshɨbich shiyokõr uje mĩ̵hnɨk ich ahakõr uje mĩ̵hnɨk. 21Kɨmɨjɨ eshɨbich teychɨm owa uje ew erze kuche ẽro hn tew toy per ɨr eyuwo tɨsĩ̵r uje ye Porrosht nahmũrpe, ich uhu shiyokõr uje ich mĩ̵hnɨk. Ma om uje ye ew erze kuche ẽro hn ye ehe erze wino hn ye ahakõr kuche yewo uje shuu eshɨbich shiyokõr uje ich mĩ̵hnɨk. 22Owa eraha erze kuche uje ich nos om par uje ahakõr hn par ew hn ehe. Porrosht chɨraha uje ye mɨhnĩ̵kpe par ahakõr, per ye uhu erze yewo oniyokõr pork wɨr ye odɨrehepe. Ese uje ye duhu leshɨbich niyokõrpe uje ich mĩ̵hnɨk shuu ɨtsorz ich ayla pork ehet chuuna uje ye niyokõrpe uje mĩ̵hnɨk. 23Per ese uje koswãha pork ye dɨrehepe kɨmɨjɨ om o kɨmɨjɨ ye ompe par uje tew erze kuche wɨchɨ shiyokõr uje mĩ̵hnɨk uje tew pork ɨr eyuwo tɨsĩ̵r uje shiyokõr uje ye Porrosht nahmũrpe, per shiyokõr. Nos wɨr kuche uje yeẽk shuu deyuwo tɨsĩ̵r uje Porrosht ye nahmũrpe, uje shiyokõr ich shiyokõr mĩ̵hnɨk.

will be added

X\