ROMANOS 13

1Nos wɨr oso tyenɨj oshiyokõr uje gobierno hn õr bahluwo otatɨm õr. Shɨ Porrosht wɨchɨ uje chɨbɨte par nos oso õr bahluwo ode hn chiihla yeniipo uje omasaha par õr bahluwo. 2Heke erze uje otsɨtak uje õr bahluwo ode ich otsɨtak erze uje Porrosht chɨbɨte. Uje ye oniyokõrpe uje õr bahluwo otatɨm õr ich erze õr bahluwo tyenɨj otsepyẽr õr. 3Erze õr bahluwo ye ochɨhɨpe par uje oshuu wɨr otola õr ɨre erze uje oshiyokõr uje ich om. Erze õr bahluwo ode shɨ par uje oshuu wɨr otola õr ɨre erze uje oshiyokõr uje ich mɨhnũwo. Kɨmɨjɨ ye ahmũrlo uje erze õr bahluwo otsepyẽr olak ich tyenɨj ahakõrlo uje ich om. Uje ahakõrlo uje ich om uhulo ɨtsorz ich erze õr bahluwo otsahmũr olak. 4Porrosht chɨbɨte erze õr bahluwo par uje oshiyokorĩ̵hɨ olak uje ich om, per kɨmɨjɨ ahakõrlo uje ich mɨhnũwo ich tyenɨj atɨlɨlo õr. Õr ukurbo de pork Porrosht chɨbɨte õr par uje otsepyẽr erze uje oshiyokõr uje ich mɨhnũwo. 5Heke tyenɨj ahakõrlo uje olak bahluwo otatɨm olak par uje ye Porrosht duhu olepyẽr olak, hn par uje eenɨlo uje ahakõrlo uje mɨhnũwo. 6Eshɨlo gobierno uje ley tata pork Porrosht chɨbɨte erze õr bahluwo par oshiyokõr erze obiyo uje titɨm olakɨke. 7Erze uje õr ɨbiyo shɨ par õr kobra hnote par gobierno ich tyenɨj eshɨlo õr uje ley tata, hn uje eyuhu hute ich eshɨlo ɨre pork ley chɨbɨte shuu ɨtsorz. Tyenɨj atɨlɨlo erze õr bahluwo. 8Ye ahakõrlo olak hnɨtewɨhɨ yeẽk. Ese uje shɨ ɨtso hnɨtewta uje de Porrosht aabo wɨchɨ uje tyenɨj otsahmũrye, pork yeẽk uje sahmũr yewo ich nos shiyokõr uje Porrosht ley tata. 9Porrosht ahwoso tata uje ɨr ley tata shuu ɨtsorz ɨm: —Ye orãha erãhta, hn ye orãha abich, hn ye tuk yewo uhu otoy, hn ye ohɨr. Ye abɨta kuche.— Erze ley hn erze yẽr wɨr shɨ ɨtso erze ahwoso uje tata ɨm: —Ahmũr yewo uhu ɨtso owa uje ahmũr owa.— 10Uje yeẽk sahmũr yet ich yelɨj shiyokõr mɨhnɨkĩ̵hɨ ɨre, heke shɨ ɨtso uje shiyokõr uje Porrosht ɨr ley tata. 11Kuchɨt yet de uje tyenɨj ahakõrlo toy. Ich osdeyo uje yomsahaloni par eyok Porrosht aabo per ele ahle yej terɨhɨ ɨshɨrĩt uje Cristo cheeshpo par hnoy eyok nehe. Ese deeych uje cheeshpo nehe ich yej terɨhɨ je uje yomsahaloni par eyok Porrosht aabo, heke ich ye ompe uje olak shɨ ɨtso uje amɨlo hn ye ahakõrlo ɨr ɨbiyope. Heke tyenɨj erĩ̵hɨlo par uje ahakõrlo ɨr ɨbiyo. 12Ich yej terɨhɨ uje sɨhna ɨre ese ɨshɨrĩt uje oso oshiyokõr uje ich mɨhnũwo shɨ ɨtso uje yej dechole uje Cristo cheeshpo nehe, heke tyenɨj moymlo erze kuche mɨhnũwo uje ahakõrlo pork wɨr shɨ ɨtso uje dɨhlak. Ahakõrlo uje ich om uje Porrosht sahmũr pork uje ahakõrlo uje ich om ich olak shɨ ɨtso luu. Uhu olak ɨlo ohyerptosht uje chɨmɨt ɨre par uje oteye. 13Olak shɨ olak ɨtso uje deeych heke tyenɨj ahakõrlo uje Porrosht sahmũr. Ye ompe uje etĩ̵rlo õr ahamich uje ich mĩ̵hnɨk, hnii uje uhulo yɨkɨch sẽhi olak, hnii ye ahakõrlo erze kuche mɨhnũwo uje hnakɨrbo hn tɨmcher oshiyokorĩ̵hɨye. Ye ompe uje ahakosloye, hn ye abɨtɨlo kuche. 14Shɨ tyenɨj uhu olak ɨluu ɨlo eyok Ɨrhĩch Jesucristo ɨr ɨluuta. Ye emɨtlo olak par uje ahakõrlo erze olak ɨluu ɨler uje moymloni.

will be added

X\