ROMANOS 12

1Pɨshɨbo watsaklo, heke titɨm olak. Porrosht sosɨr eyok shuu ɨtsorz heke tyenɨj asɨmɨhɨlo olak ɨre uje yesh olak ɨka. Enahalo olak par uje shɨ ahakõrlo uje ɨre sahmũr. Heke olak shɨ par ɨre par uje eeychãhalo ɨre. Porrosht sahmũr uje ahakõrlo uhulo ɨtsorz. 2Ye uhu olak ɨluu ɨlo erze uje ye odɨraha Porroshtpe. Enshii olak eyuwo par uje olak ɨluu tokole ich om. Uje ahakõrlo uhulo ɨtsorz ich ɨmeheeych uje Porrosht sehe duhu ahakõrlo, heke erahalo uje ich om hn erahalo uje Porrosht sahmũr. 3Porrosht ɨshɨm yok pɨbich uje ich dich heke yok pwele titɨm olak yeẽk. Ye ompe uje ɨre narim ɨre hn duhu deyuwo tɨsĩ̵r uje ɨre ich ma dich hn iyuwe uje Porrosht chɨbɨte ɨre. Porrosht shuu dɨtɨk par shiyokõr debiyo pork ye lotiis ɨrpe. Shɨ tyenɨj shuu deyuwo tɨsɨrĩ̵hɨ debiyo heke ye duhu ɨre ma losuhlaap o kɨmɨjɨ duhu ɨre ma dich. 4Kal eyok nohmɨra ɨr yũhurrza shɨ nohmɨra per ɨr ɨkiyo ich kɨhniya. Ye ɨr ɨkiyo ɨlyepe. 5Shɨ eyok ɨtso Cristo ɨr yũhurrza hn ɨr ɨkiyo pork eyok ich eyok kɨhniya per shɨ eyok weeta nohmɨra ɨtso ɨr yũhurrza. 6Porrosht nos ɨshɨm eyoklo ɨbiyo shuu kɨnãho kɨnãho, ye duhu ɨlyepe. Ɨshɨm eyok debiyo uje sehe duhu yiyokõr. Kɨmɨjɨ dosɨm eyok yeẽk par uje sanɨmɨrãha ɨr ahwoso ich ye sowe uje Porrosht ahwoso tata. 7Kɨmɨjɨ Porrosht dɨbɨte yeẽk par diákono uje nɨshii iglesya ich nos shiyokõr debiyo shuu tokole om. Kɨmɨjɨ Porrosht dosɨm yeẽk par uje shiyokorãha õr ich tyenɨj shiyokorãha õr. 8Kɨmɨjɨ Porrosht dosɨm yeẽk erze obiyo par uje duhu yewo oduurapo ich tyenɨj sakɨt õr. Kɨmɨjɨ Porrosht dosɨm yeẽk kuche par uje ɨshɨmɨhɨ yewo ich ye narhak, dosɨm õr. Kɨmɨjɨ Porrosht dosɨm yeẽk par uje tɨbey Porrosht aabo uje ochish obiyo o oteeychãha Porrosht ich tyenɨj chɨbɨte ɨre par uje takashɨm õr. Kɨmɨjɨ Porrosht dosɨm yeẽk erze obiyo par uje sosɨr erze uje õr permo, hn erze uje õr dosdarak hn erze uje õr losuhlaabo ich tyenɨj ɨre ayla uje takashɨm õr. 9Titɨm olak. Ich uhulo ũrpa uje ahmũrloye, per etaklopa ahakõrlo erze mɨhnũwo, hn shish ahakõrlo erze uje ich om. 10Ahmũrlo erze Porrosht aabo yewo pork wɨr olak leshɨbo, hn shish olak narim õr uhulo ɨlo uje ich õr deyo. 11Ye uhulo patɨm olak. Ye uhulo olak towo, per shish emɨtlo olak par ahakõrlo eyok Ɨrhĩch ɨr ɨbiyo. 12Shish tyenɨj olak ayla pork erahalo uje olak owich de Porrosht ahɨr, hn shish tyenɨj olak ewenta erze kuche mɨhnũwo uje tĩ̵r olak. Shish tyenɨj olak orar apurlo Porrosht. 13Akashɨmlo erze Porrosht aabo yewo uje kuche nihyokĩ̵hɨ õr ahɨr. Kɨmɨjɨ Porrosht aap tãra dukuhla hn tekɨrɨhɨ olak yeẽk ich uhulo taakɨhɨ ahuch. Kɨmɨjɨ nĩhyok uje umuhu ich uhulo umuhu ahuch. 14Eyuhulo olak ahwoso oomoho erze uje oloter olak, ye ajĩ̵rlo õr ɨkiyo. 15Uje yeẽk ayla ich tyenɨj olak aylɨhɨ ɨre toy. Uje yeẽk yerh ich olak tyenɨj eyerhlo toy. 16Nos olak uje olak Porrosht aabo ich tyenɨj uhulo olak eyuwo ɨlye, hn ye olak narim olak. Ye ebɨtlo uhu olak ma deyo je erze losuhlaabo pork nos olak ɨtsye, hn ye uhulo olak ɨlo uje olak ma dɨtuwo je erze yewo. 17Uje yeẽk niyokõr mɨhnɨkĩ̵hɨ olak ich ye eyuhulo olak bahat. Shɨ ahakõrlo uje nos oso ochɨraha uje ich om. 18Kɨmɨjɨ yeẽk dɨtak olak yeẽk ich tyenɨj uhulo ɨre ehet kɨɨs par uje olak aho kɨɨsɨhɨye. Kɨmɨjɨ wɨchɨ ye nahmũrpe ich shɨ ɨre. 19Pɨshɨbo watsaklo, uje oniyokõr mɨhnɨkĩ̵hɨ olak ich ye eyuhulo olak bahat. Shɨ moymɨhɨlo Porrosht hme par uje ɨre nɨshii hn sepyẽr õr, pork ɨr ahwoso tata shuu ɨtsorz ɨm: —Eyok Ɨrhĩch sole: “Uje yeẽk niyokõr mɨhnɨkĩ̵hɨ olak ich yok tyenɨj tiyuhu olak bahat.”— 20Wɨr uje tyenɨj ahakõrlo. Kɨmɨjɨ sewɨt nẽhi olak ɨmehẽt asɨmlo kuchẽrk par tew hn uje iich nẽhi asɨmlo awɨt uhulo doho. Uje ahakõrlo uhulo ɨtsorz ich tyenɨj shuu wɨchɨ pook pork shɨ ahakõrlo omɨhɨ ɨre. 21Ye eyuhulo olak bahat hn uhulo erze kuche mɨhnũwo derz olak. Shɨ tyenɨj ahakõrlo omɨhɨ erze uje oshiyokõr mɨhnɨkĩ̵hɨ olak heke erzlo erze mɨhnũwo.

will be added

X\