ROMANOS 10

1Pɨshɨbo watsaklo, ich tahmũrpa uje erze pɨhnapso israel oso omasaha par Porrosht aabo, heke shish yok orar tapur Porrosht par õr ɨre. 2Titɨm olak uje õr ɨre ich ochiyuhu ɨre uje oteeychãha Porrosht per ochimehi pork ye odɨrehepe uje Porrosht sahmũr. 3Ye odɨrehepe uje Porrosht shuu Cristo tɨrẽtkite par toy par ɨshɨ õr hnɨtewɨhɨ Porrosht ahɨr, heke õr prowa oshiyokõr erze ley par uje sehe oduhu Porrosht ehet kɨɨsɨhɨ õr ɨre. Ye Porrosht duhu õr owich chɨhɨ dahɨrpe pork otsotiis uje Jesús shiyokõrni par õr ɨre. 4Asa ley shuu ochɨraha uje oshiyokõr uje ich mɨhnũwo par uje ye duhu olotiis Jesucristope par uje ɨshɨ õr hnɨtewɨhɨ Porrosht ahɨr, heke nos wɨr uje ye olotiis ɨre ich õr owich de Porrosht ahɨr. 5Moisés chichewkite shuu ɨtsorz ɨm: —Yeẽk uje shiyokõr erze ley par uje shuu ɨr owich de Porrosht ahɨr ich ye ompe uje iyuwe erze ley.— 6Per erze uje ye olotiis uje Cristo ɨshɨ õr hnɨtewɨhɨ Porrosht ahɨrni yelɨj oduhu deyuwo tɨsĩ̵r ɨl: —¿Yeẽkpo tyenɨj tĩ̵r poõrc?— Ochɨbɨte uje sehe oduhu yeẽk duhu Cristo sohnɨmich. 7Hn ye oduhu deyuwo tɨsĩ̵r ɨl: —¿Yeẽkpo ihnɨmich tĩ̵r erze topo õr ɨchɨbiyo owich?— Ochɨbɨte uje sehe oduhu yeẽk diyuhu Cristo õr ahɨr. 8¿Õr ahwotiyoho uje shuu õr owich de Porrosht ahɨr? Erahalo erze ahwoso pork wɨr uje athɨlo hn uhulo olak eyuwo tɨsĩ̵r, pork wɨr erze ahwoso uje tanɨmɨrãha titɨm erze oso kɨmɨjɨ ye olotiis Cristo ich ɨshɨ õr hnɨtewɨhɨ Porrosht ahɨr. 9Tanɨmɨrãha tuu ɨtsorz pork uje yeẽk tata uje Jesús wɨchɨ ɨr Ɨrhĩch hn ye lotiis uje Porrosht shuu Cristo tokolɨhɨ erze topo õr ahɨrni ich ɨr owich de Porrosht ahɨr. 10Uje yeẽk ye lotiis uje Jesús ɨshɨ ɨr hnɨtewɨhɨ Porrosht ahɨr ich Jesús ɨshɨ ɨr hnɨtewɨhɨ Porrosht ahɨr. Uje tatɨm yewo shuu ɨtsorz ich ɨr owich de Porrosht ahɨr. 11Porrosht ahwoso tata ɨm: —Ese uje ye lotiis Cristope, uje taachĩ̵hɨ Cristo ahɨr nehe ich ye pookpe pork ɨr owich de.— 12Eyok Ɨrhĩch ye niyokõrpe kɨnaha par erze israel oso hn niyokõr kɨnaha par erze dihipo kɨnãho. Shuu nos õr ɨtsye pork wɨchɨ uu nos oso õr yɨnsɨrc. Nos sosɨr erze uje otsapur ɨre. 13Porrosht ahwoso tata ɨm: —Nos wɨr uje otsapur eyok Ɨrhĩch par uje wɨchɨ perdonar õr ich wɨchɨ ɨshɨ õr hnɨtewɨhɨ Porrosht ahɨr.— 14Kɨmɨjɨ oso olotiis ich ye õr pwelpe par uje otsapur Jesús par uje ɨshɨ õr hnɨtewɨhɨ Porrosht ahɨr. Uje yelɨj onunt uje Jesús ɨshɨ õr hnɨtew ich shish otsotiis pork ye odɨrehepe. Ich ye õr pwele uje onunt kɨmɨjɨ nĩhyok yeẽk tatɨm õr uje Jesús ɨshɨ õr hnɨtew. 15Kɨmɨjɨ Porrosht ye duhu odo onanɨmɨrãha ɨr ahwoso ich ye õr pwel odope, per Porrosht shuu ohno pork ɨr ahwoso tata shuu ɨtsorz ɨm: —Ich ɨhĩ̵rtpa erze uje ohno hn otsanɨmɨrãha pahwoso otatɨm oso uje Cristo ɨshɨ õr hnɨtewɨhɨ pahɨr par uje shuu pehet kɨɨsɨhɨ õr ɨre.— 16Per israel oso ich okɨhniya ode uje ochunt hn otsotiis uje Jesús ɨshɨ õr hnɨtew heke Isaías tatɨm Porroshtkite ɨm: —Ɨrhĩche, nos otsotiis erze ahwoso uje titɨm õr ɨre.— 17Heke shɨ erze uje otẽr wɨr uje õr pwele ye olotiispe, hn wɨr shɨ õr pwele otẽr uje yeẽk sanɨmɨrãha tatɨm õr uje Cristo shiyokõr par õrkite. 18Titɨm olak, ¿je israel oso onunt uje Cristo shiyokõr par õr ɨre? Ochunt pork Porrosht ahwoso tata shuu ɨtsorz ɨm: —Erze ɨr ahwoso ich nos chũr ĩ̵rmo lekɨtiyo.— 19Titɨm olak, erze israel oso ¿je ye odɨrehepe? Titɨm olak wap uje Moisés tata uje Porrosht sole: —Tuu dihipo kɨnãho omasaha par paabo, heke olak israel oso abɨtɨlo õr. Tuu dihipo kɨnãho uje õr ɨluu mɨhnũ omasaha par paabo, heke olak israel oso tuu etaklo õr.— 20Hn Isaías ye tola õrpe. Tatɨm õr ɨm: —Porrosht sole: “Erze uje ye odukwi yok petɨkni ele ahle ich ochish yok, erze uje ye olapur par uje sehe odɨraha yok petɨkni tuu ochɨraha yok .”— 21Isaías tata ɨm: —Porrosht sole: “Shish tokohɨrmi olak uje olak israel oso per olak ye ahakõrlope uje yok tahmũr hn shish uhu olak hu kata.”—

will be added

X\