ROMANOS 1

1Yok Pablo uje tuu ochichew pahwoso ochɨbɨte ana hutɨta. Yok Jesucristo ɨr ɨbɨk. Porrosht chiihla yok hn chiyuhu yokɨhɨ laabo õr ehet par uje yok ɨr apóstol hn shuu tanɨmɨrãha lahwoso titɨm oso uje Jesucristo ɨshɨ õr hnɨtewɨhɨ Porrosht ahɨrkite. 2Porrosht tatɨm erze israel oso uu õr profeta poruwo wɨshɨ par uje ochichew ɨr ahwoso. Tatɨm õrkite uje chɨbɨte lahwoso par uje tyenɨj Cristo taachĩ̵hɨ ĩ̵rmo nehe. 3Shɨ Porrosht tata uje tyenɨj shuu Deyjɨt tãra erze israel oso õr porokkite rey David par uje shuu wɨchɨ tokole hnakɨrap. 4Porrosht chɨbɨte orhõta uje Jesús wɨchɨ uu ɨr Ijɨt pisht uje shuu ɨkponi tokolɨhɨ erze topo õr ahɨr. Porrosht Ɨchɨbich yelɨj niyokõr mĩ̵hnɨk. Wɨchɨ uje ɨshɨm Porrosht Ijɨt ukurbo. Ɨr Ijɨt wɨchɨ Jesucristo uu eyok Ɨrhĩch. 5Cristo wɨchɨ uje sosɨr yok par uje shuu tomsaha par ɨr apóstol hn tanɨmɨrãha ɨr ahwoso titɨm erze oso uje ode ĩ̵rmo lekɨtiyo par uje ye olotiis Jesucristope hn par uje oshuu Jesucristo dich. 6Olak ɨtso õr, Porrosht chiihla olak par uje uhulo Jesucristo masaha par uje wɨchɨ uu olak Yɨnsɨrc. 7Tuu ochichew pahwoso ochɨbɨte ana hutɨta par tokosɨm olak uje olak dechɨ dɨt Roma. Porrosht sahmũr olak. Chiihla olak par uje amsahalo par ɨr aabo. Sehe tuu Porrosht uu eyok Deych hn eyok Ɨrhĩch Jesucristo odosɨr olak hn oduhu olak aho kɨɨs. 8Sehe titɨm olak kuche ich kɨhniya per wap tɨkɨnshɨp Porrosht tĩ̵ra eyok Ɨrhĩch Jesucristo ɨr iich par nos wɨr olak pork oso uje ode lekɨtiyo otata uje olak uje ebuhulo dɨt Roma ich ye otiislo eyok Ɨrhĩch Jesucristope. 9Ich tɨnaha yok uje tiyokõr Porrosht ɨr ɨbiyo pork tanɨmɨrãha ɨr ahwoso titɨm õr uje Jesucristo ɨshɨ õr hnɨtewɨhɨ Porrosht ahɨrkite. Porrosht wɨchɨ uje chɨraha uje shish yok orar tapur ɨre par olak. 10Shish yok orar tapur Porrosht kɨmɨjɨ nahmũr ich shuu takaha tekɨrɨhɨ olak shɨchish. 11Shish sehe takaha par uje tekɨrɨhɨ olak par uje tokosɨr olak. Shɨ sehe ma tuu olak duurapo, 12hn yok ɨtspo, pork sehe tuu akashɨmlo yok par tukuurapo hn takashɨm olak par uje ma ye yotiislo eyok Ɨrhĩch. 13Pɨshɨbo watsaklo, sehe tuu erahalo uje shish sehe takaha par uje tekɨrɨhɨ olak per shish kuchẽrk sontew yok heke ye yok pwele tɨtĩ̵r olakpe. Sehe tuu oso ma okɨhniya omasaha par Porrosht aabo par õya olak shɨ ɨtso uje tiyokorãha erze Porrosht aabo yewo uje õr dihipo kɨnãho. 14Porrosht ɨshɨm yok lahwoso par uje tanɨmɨrãha heke titɨm erze griego yewo hn erze dihipo kɨnãho, hn titɨm erze uje õr eykdeyo hn erze uje ye õr eyuwĩ̵rsh, 15heke sehe tɨtĩ̵r olakɨhɨ wahacha dɨt Roma shɨchish par uje titɨm olak hn erze oso yewo Porrosht ahwoso uje Jesús ɨshɨ olak hnɨtewɨhɨ Porrosht ahɨrkite. 16Ye tɨkɨpookpe uje titɨm oso uje Jesús ɨshɨ õr hnɨtewɨhɨ Porrosht ahɨr, pork kɨmɨjɨ ye olotiis erze ahwoso uje ich ɨhĩ̵rtso ich Porrosht ɨr ukurbo shuu omasaha par ɨr aabo. Titɨm erze israel oso wap hn titɨm erze dihipo kɨnãho toy. 17Uje Jesús tooho krus eeychkite par uje ɨshɨ eyok hnɨtewɨhɨ Porrosht ahɨr ich shuu ɨmeheeych uje Porrosht shiyokõr uje ich om per shɨ ɨmeheeych par erze uje ye olotiis ɨrpe. Porrosht ahwoso tata shuu ɨtsorz ɨm: —Shɨ erze uje ye olotiis ɨrpe ich nĩhyok õr hnɨtew uje de Porrosht ahɨr heke õr owich de ɨre ahɨr.— 18Titɨm olak uje nos wɨr oso uje ye onahmũr Porrosht hn oshiyokõr uje ich mɨhnũwo ich otsontew erze ahwoso uje ich ũru uje tãra Porrosht, heke oshuu Porrosht chesdelpa hn sɨtak õr. Tyenɨj shuu ochɨraha uje sepyẽr õr nehe ich shuu dospa. 19Nos wɨr uje oshiyokõr uje ich mɨhnũwo ochɨraha uje Porrosht de pork Porrosht sowa õr. 20Uje ĩ̵rmo tenitkite ɨchii Porrosht nos shiyokõr kuche heke nos oso ochɨraha uje ɨre shish de. Ye õr pwelpe uje onomo ɨre per ochɨraha uje ɨr ukurbo deyo de, heke ich nĩhyok uje yeẽk pwele sata ɨrehe Porrosht ɨle ɨkɨch. 21Õr ɨre ochɨraha uje Porrosht de, per ye oduhu Porrosht dichpe, hn ye onɨna ɨrpe. Shɨ oshuu deyuwo tɨsɨrĩ̵hɨ erze kuche uje ye jukur heke õr eyuwo ich shɨ ɨtso dɨhlele. 22Otata uje ich õr eykdeyo per wɨr shɨ oshuu ɨre ɨtso uje õr totihlo. 23Porrosht ich hũre hn yelɨj nɨhna ɨre, per oym Porrosht hn oshiyokõr kojano po ochii wɨr ɨr porroshtɨhɨ. Erze kojano po oshiyokõr oshuu ɨtso oso hn shɨ ɨtso chɨpɨrme hn shɨ ɨtso loshɨpo hn shɨ ɨtso echĩ̵re. 24Heke Porrosht iim õr par uje oshiyokõr erze kuche mɨhnũwo uje shɨ õr ɨre otsahmũr. Oshiyokorĩ̵hɨye erze uje shuu opook. 25Porrosht ich ũru per wɨr okoswãha heke ohno oteeychãha erze uje ye Porroshtpe. Shɨ oteeychãha erze uje Porrosht shiyokõrkite hn oshiyokõr erze kuche ɨr ɨbiyo. Porrosht wɨchɨ uje nos shiyokõr erze kuche. Wɨchɨ uje tyenɨj onarim ɨre hn oteeychãha. Ich om uje oniyokõr oduhu ɨlorz. 26Heke Porrosht iim õr par uje oshiyokõr erze kuche mɨhnũwo uje otsahmũrpa uje shuu oso opook. Tɨmcher oym dabiyo par uje õhyiyer ahɨr. 27Hnakɨrbo õr ɨtspo oym nerẽhte par uje õhyiye ahɨr hn ye opookpe. Otsahmũrpa oshiyokõr erze mɨhnũwo per ich oshye leshĩ̵ro hn masaha õr aho. 28Otata uje nĩhyok ye Porroshtɨkɨsh, heke Porrosht iim õr par uje shɨ oshiyokõr erze kuche mɨhnũwo uje shish oshuu deyuwo tɨsĩ̵r. 29Shish õr eyuwo tɨsĩ̵r erze kuche mɨhnũwo uje ich kɨnãho kɨnãho hn ye shɨ erzepe, ich otsahmũr oshuu yewo doso. Ich otsahmũr uje ochukutɨrãha ɨre kuche, hn wɨr õr ɨljaabo. Shish opota kuche, hn oshuu yewo oshuu otoy. Otsahmũr uje oshiyokosye, hn otsehnyẽrye. Wɨr õr ehnito, hn ich otsahmũr uje otat lare. 30Otsahmũr uje otatɨm yet lekushiĩ par uje oshuu sɨtak yet. Wɨr shɨ otsɨtak Porrosht, hn ye oduhu yewo õr jukur. Wɨr shɨ sehe oduhu ɨre ma deyo, hn otsahmũr uje otatɨm oso uje oshiyokõr erze kuche shɨ par uje onarim ɨre. Shish oshuu deyuwo tɨsĩ̵r erze kuche ahlo uje ich ma mɨhnũwo par uje oshiyokõr. Ye oniyokõrpe uje õr deych hn õr data otatɨm õr. 31Wɨr shɨ oshuu deyuwo tɨsĩ̵r erze kuche uje ye jukur, hn shish oyehi lahwoso, ye oniyokõrpe. Yelɨj onuuna uje yewo õr losuhlaabo, per wɨr otsahmũr uje oshuu oso dospa. 32Ochɨrahapa uje Porrosht chɨbɨte uje yeẽk shiyokõr erze mɨhnũwo shuu ɨtsorz ich tyenɨj tĩ̵r urhuta bahluta ehet per wɨr shish oshiyokõr. Hn ye shɨ erzepe, ich otsahmũr uje yewo oshiyokõr erze kuche mɨhnũwo ɨtso õr.

will be added

X\