APOCALIPSIS 8

1Uje ese Obejɨt sɨtsẽr asa belta otich uje iyehe ese seys nẽr hn oshuu ĩ̵rmo etich wahacha poõrc nehech terɨhɨ media ora. 2Uje iyuwe media ora hn tokomo anjele uje õr syete oyehetɨhɨ Porrosht ɨle ɨkɨch. Otõhwa trompetɨ syete hn oshɨm erze anjele trompeta kal õr nohmɨr nohmɨr. 3Esee hn tokomo anjel yet taãcha hn iyehetɨhɨ ese altar ɨkɨch. Tõhwa kucherk uje ɨtso kobɨt par otserũhu kuche ehet uje aat ehmuuj. Ese kobɨt pur oro. Nos wɨr erze Porrosht aabo õr ahwoso uje õr orar otsapur Porrosht de wahacha ese altar eeych uje oro uje de Porrosht ɨkɨch. Yeẽk ɨshɨm ese anjel erze kuche uje aat ehmuuj ich kɨhniya hn shuu ĩya erze Porrosht aabo õr ahwoso uje de altar eeych par uje sẽru. 4Ese anjel sẽru ese uje aat ehmuuj hn ɨr iibich tĩ̵r poõrc Porrosht ɨle ɨkɨch hn erze Porrosht aabo õr ahwoso uje õr orar otsapur ɨre ĩya ese iibich. 5Ese anjel chishew pichure uje dechɨ altar eeych hn chɨmchaha ese kobɨt ehet uje oro nehech yeno hn tãra chɨbɨte ele hnɨmich. Ɨchii nar, ihyokõrak dich hn õr ahwoso tãra hn ich hũre ɨtso yuwebo hn hnɨmich telerrza. 6Esee hn erze anjele uje õr syete ochɨmɨt ɨre par otsobɨta erze trompetɨ. 7Ese anjel webich osht sobɨta ɨr trompeta hn kojano tãra poõrc kayɨhɨ hnɨmich. Jwekɨta ĩya hn dɨkɨrmɨsta ĩya toy. Kɨmɨjɨ hnɨmo po tre chɨhɨ ich wɨchɨ sẽru nohmet hn kɨmɨjɨ pohɨr chɨhɨ wee tre ich sẽru weeta nohmata hn nos sẽru erze ɨhnemyo uje berte. 8Esee hn anjel yet uje iyehe ese webich osht nẽr sobɨta ɨr trompeta. Otãra kuchẽrk shɨ ɨtso kojach uje dich uje duhlu hn ɨr yokacha data. Ochɨbɨte onoota bahluta ehet. 9Kɨmɨjɨ onoota bahluta po tre ich shuu pɨt nohmet chisãha ɨre dɨkɨrmɨsta hn nos wɨr kuche uje de onoota bahluta kɨmɨjɨ wee tre ich shuu weeta nohmata toy. Kɨmɨjɨ nos wɨr pohɨr uje chɨkãha onoota bahluta wee tre ich sɨhna asa weeta nohmata. 10Esee hn ese anjel yet uje iyehe erze osiyer nẽr sobɨta ɨr trompeta hn porrzeebcha bahluta tãra poõrc kayɨhɨ hnɨmich. Wate ɨtso jwekɨta waa je ich data. Kɨmɨjɨ nos wɨr onoo hn nos owɨlo uje awɨt tãra hnɨmich uut wee tre chɨhɨ ich kayɨhɨ asa weeta nohmata eeych. 11Asa porrzeebcha ɨr iich otsɨɨ chiyok pork ich pur menent. Wate shuu ese awɨt chiyok heke shuu oso shuu otoy ich okɨhniya pork ich shuu chiyokpa hn pur menent. 12Esee hn ese anjel yet uje iyehe ese tre nẽr sobɨta ɨr trompeta. Kuchẽrk sentii deeych par uje ye dihitpe nehech kwatro ora, hn shekurko ɨtspo ye dihitpe nehech kwatro ora, hn erze porrzeebe ɨtspo ye dihitpe nehech kwatro ora. Uje deeych ich ese deeych ye dihitpe nehech kwatro ora hn uje dɨhlak shekurko hn porrzeebe ye dihitpe nehech kwatro ora. 13Esee hn takachɨm. Tukunt agilt uje shɨ iyohochɨs poõrc pehet hn tɨbich ich sɨhnew ɨm: —Ich yarhak par oso, ich yarhak par oso, ich yarhak par erze oso uje ode hnɨmich nehe uje erze anjele õr tre otsobɨta erze ɨr trompetɨ. Ochɨmɨt ɨre par otsobɨta.—

will be added

X\