APOCALIPSIS 7

1Esee hn takachɨm hn tokomo anjele uje õr kwatro uje oyehe myentɨ wãrno uje kwatro par uje otsontew erze myentɨ par uje ye tɨbichu ele hnɨmich hnii uje tɨbichu onoota bahluta hnii uje tɨbichu pohɨr. 2Tokomo anjel yet uje tãra deeych warĩch. Wɨchɨ tõhwa Porrosht seylta. Porrosht wɨchɨ ɨka. Ese anjel tɨbich ich sɨhnew tatɨm erze anjele yewo uje õr kwatro uje Porrosht ɨshɨm õr ukurbo par oshiyokõr mɨhnɨkĩ̵hɨ nãhu ĩ̵rmo hn onoota bahluta. 3Tatɨm õr ɨm: —Ye ahakõrlo mɨhnɨkĩ̵hɨ ele hnɨmich hnii onoota bahluta hnii erze pohɨr nehech oyɨbɨte Porrosht ɨr seylta õr une erze Porrosht aabo pork wɨr ɨr ɨbiyo.— 4Tukunt uje ochɨbɨte wɨr õr yar erze uje õr syento kwarenta y kwatro mil oso uje õr israel oso. 5Erze uje otãra ɨr porokkite Judá wɨr õr dose mil. Erze uje otãra ɨr porokkite Rubén wɨr õr dose mil. Erze uje otãra ɨr porokkite Gad wɨr õr dose mil. 6Erze uje otãra ɨr porokkite Aser wɨr õr dose mil. Erze uje otãra ɨr porokkite Neftalí wɨr õr dose mil. Erze uje otãra ɨr porokkite Manasés wɨr õr dose mil. 7Erze uje otãra ɨr porokkite Simeón wɨr õr dose mil. Erze uje otãra ɨr porokkite Leví wɨr õr dose mil. Erze uje otãra ɨr porokkite Isacar wɨr õr dose mil. 8Erze uje otãra ɨr porokkite Zabulón wɨr õr dose mil. Erze uje otãra ɨr porokkite José wɨr õr dose mil. Erze uje otãra ɨr porokkite Benjamín wɨr õr dose mil. 9Esee hn takachɨm hn tokomo oso ich okɨhnipa. Nĩhyok uje yeẽk pwele tɨskẽr õr. Nos otãra uu dihipo õr hnɨmoho lekɨtiyo hn otãra erze owɨlo uje otseẽt ahwoso kɨnãho kɨnãho ĩ̵rmo lekɨtiyo. Wɨr oyehetɨhɨ Porrosht ɨle ɨkɨch hn ese Obejɨt. Wɨr oyãha lasuwo poro hn nos otõhwa hĩ̵r ĩhyo. 10Nos wɨr õr ɨre otɨbich ich otsɨhnew otsɨɨ: —Porrosht uje sakaha debɨta eeych hn ese Obejɨt wɨr uje otsõsɨr õryok hn oshɨm õryok ese ɨkɨrĩt uje yelɨj nɨhna ɨre.— 11Nos wɨr anjele oyehe ochɨpeẽsa Porrosht uje sakaha debɨta eeych hn erze anciano hn erze uje ɨtso loshɨpo uje ɨka hn erze anjele ocha dete hnɨmo nehech õr une terɨhɨ hnɨmich hn oteeychãha Porrosht 12otsɨɨ: —Yehe wɨchɨ, sehe oyuhu nos oso shish oteeychãha Porrosht hn onarim ɨre. Wɨchɨ ich eykdeyo hn nos tyenɨj onɨna ɨre hn oduhu ɨre dich. Wɨchɨ ich ukurbo deyo de hn ukurbo de par shiyokõr kuche. Sehe oyuhu nos shish otata oduhu ɨlorz. Ich oyahmũr uje ɨtsorz.— Wɨr uje anjele otata. 13Esee hn erze anciano õr yet tatɨm yok ɨm: —¿Yeniipo erze uje oyãha lasuwo poro hn otãra ɨraãpo?— 14Titɨm ɨre too: —Ɨrhĩche, owa eraha.— Ese anciano tatɨm yok ɨm: —Wɨr uje otokolɨhɨ erze mɨhnũwo pisho uje tĩ̵r nãhu ĩ̵rmo. Wɨr uje ye olotiis ese Obejɨt heke ich õr ɨshuwo poro pork wɨchɨ ɨr armɨsta ɨshɨ õr hnɨtewkite hn churhũ õr aho. 15Heke ode Porrosht ɨle ɨkɨch uje sakaha debɨta eeych. Deeych hn dɨhlak shish oshiyokõr Porrosht ɨbiyoho templo ehet. Porrosht uje sakaha debɨta eeych wɨchɨ uje shuu odebuhu dahɨr. 16Ich ye sewɨt nẽhi õrpe hn ye õr iilo nẽhi õrpe hn ye deeych tew õrpe hn ye onuunape uje duhlu 17pork ese Obejɨt uje de Porrosht ɨbɨta ɨkɨch wɨchɨ uje tɨbey õr shɨ ɨtso uje tɨbey obejɨ. Wɨchɨ tyenɨj hnoy õr seya õr awɨt par uje oho. Ese awɨt wɨchɨ uje ɨshɨm õr ɨkɨrĩt uje yelɨj nɨhna ɨre hn Porrosht nos churhũ õr ɨlote shuu kako.— Wɨr uje ese anciano tatɨm yok.

will be added

X\