APOCALIPSIS 6

1Esee hn takachɨm hn tokomo ese Obejɨt uje sɨtsẽr asa belta otich webich osht uje syete de uje oshuu chishew asa hutɨta hn tukunt wɨchɨ nohmet erze uje ɨtso loshɨpo uje kwatro uje ɨka chiilehet. Ich ochiilehet lahwoso shɨ ɨtso uje nar. Tata ɨm: —Erẽt.— 2Uje takachɨm hn tokomo kabehet uje poro. Ese uje iyãha tõhwa pohɨrpɨt par uje tatsɨkĩ̵r. Porrosht ɨshɨm wɨchɨ wolt shɨ ɨtso uje reye oyãha. Hno par uje tatsɨkĩ̵r hn par uje serz. 3Uje ese Obejɨt sɨtsẽr asa belta otich uje de asa hutɨta iyehe ese webich osht nẽr hn tukunt erze uje ɨtso loshɨpo uje ɨka yetpo ɨm: —Erẽt.— 4Kabehet yet tokolpo uje wɨhĩ̵rt. Ese uje iyãha wɨchɨ kabehet Porrosht ɨshɨm ɨr ukurbo par uje ye duhu oso õr aho kɨɨsɨhɨyepe heke oshuuye oshuu otoy, hn ɨshɨm ɨre espada berzak. 5Uje ese Obejɨt sɨtsẽr asa belta otich uje iyehe ese osiyer nẽr hn tukunt ese uje ɨtso loshɨpo yet uje ɨka tata ɨm: —Erẽt.— Takachɨm hn tokomo kabehet uje wɨs. Ese uje iyãha kabehet balansta de ɨr hmata. 6Erze uje ɨtso loshɨpo uje ɨka uje kwatro õr ehet tukunt ahwoso uje tata ɨm: —Un kilo erint ɨr bahat shɨ ɨtso uje yeẽk chish obiyo deeych nohmɨra hn tre kilo erint kɨnaha uje iich otsɨɨ cebada ɨr bahat shɨ ɨtso uje yeẽk chish obiyo deeych nohmɨra, per ye ahakõr mɨhnɨkĩ̵hɨ erze pohɨr uje iich otsɨɨ olivo uje aseyte tãra hn ye ahakõr mɨhnɨkĩ̵hɨ erze uva uje wino tãra.— 7Uje ese Obejɨt sɨtsẽr asa belt otich uje iyehe ese tre nẽr hn tukunt ese uje ɨtso loshɨpɨt yet uje kwatro uje ɨka tata ɨm: —Erẽt.— 8Takachɨm hn tokomo kabehet uje kahɨr. Ese uje iyãha ɨr iich otsɨɨ topɨk, hn ese uje iyehe nẽr wɨchɨ uje topo õr ɨchɨbiyo de. Porrosht ɨshɨm wɨchɨ ukurbo uje iich otsɨɨ topɨk par uje shuu oso shuu otoy per tyenɨj sehek oso shuu õr wee kwatro hn shɨ pwele shuu ese weeta nohmata shuu õr chĩ̵ra õr espada hn shuu sewɨt sẽhi õr nehech otoy hn shuu õr permo nehech otoy hn shuu loshɨpo uje de ĩ̵rmo shuu õr shuu otoy. 9Uje ese Obejɨt sɨtsẽr asa belt otich uje iyehe ese kwatro nẽr hn tokomo topo õr ɨchɨbiyo uje odechɨ altar uut. Oso oshuu õr oshuu otoy shɨ pork otsanɨmɨrãha Porrosht ahwoso hn pork otatɨm õr uje shɨ ye olotiis Cristo heke omasaha par Porrosht aabo. 10Erze õr ɨchɨbiyo okeytkẽr Porrosht ich otsɨhnew lahwoso otsɨɨ: —Ɨrhĩche, owa ich ma dich je nos wɨr kuche uje ahakõr. Yelɨj ahakõr uje mɨhnũwo hn shish ata uje ich ũru. ¿Latɨk nehe hn eychɨm erze ĩ̵rmo oso uje oshuu õryok oshuu oyɨtɨ hn eyuhu õryok bahat?— 11Esee hn ɨshɨm õr ɨshuwo uje ich poro hn tatɨm õr ɨm: —Hap anemlo pɨkaap nehech oso oshuu Porrosht aabo yewo oshuu otoy uje oshiyokõr ɨr ɨbiyo.— Porrosht tatɨm õr ɨm: —Wɨr olak deshɨbo uje oso tyenɨj oshuu õr oshuu otoy shɨ ɨtso uje oshiyokorĩ̵hɨ olak.— 12Esee hn takachɨm ese Obejɨt uje sɨtsẽr asa belta otich uje iyehe ese sinko nẽr. Takachɨm hn tokomo hnɨmich uje telerrzpa. Ese deeych ich ye dihitpe, shɨ wɨs ɨtso õr ɨshuwo uje wɨso, hn ese shekurko ich wɨhĩ̵rtpa shɨ ɨtso dɨkɨrmɨsta. 13Porrzeebe tãra poõrc kayɨhɨ hnɨmich. Wɨr shɨ ɨtso pohɨr ee uje myent tɨbichu hn chishɨt hn shuu ɨr ee kay. 14Ese poõrc ich shɨ ɨtso hute uje ochɨpaãsho nehech nĩhyok poõrc. Nos wɨr kojano sɨhnok laleryo, hn erze hnɨmo uje awɨt chɨpeẽsa nos sɨhnok laleryo toy. 15Nos wɨr reye uje ode nãhu ĩ̵rmo lekɨtiyo otsakɨs ɨrehe erze kojano ɨle. Erze uje õr wɨmshɨro õya õr hn erze ohyerptoso õr bahluwo õya õr toy hn nos wɨr ɨhĩ̵r deyo õya õr toy hn erze uje õr ukurbo deyo hn uje õr yɨlo hn erze uje ye õr yɨlope õya õr toy. 16Otatɨm erze kojano par kayɨhɨ õr pork sehe oduhu lajuwe õr ɨre par uje sakɨs õr ɨre pork otola otĩ̵r Porrosht ɨle ɨkɨch uje sakaha debɨta eeych hn ese Obejɨt pork Porrosht hn ese Obejɨt wɨr ich ochowãha pɨsh õr. 17Ich terɨhɨ ɨshɨrĩt uje Porrosht sepyẽr õr hn nĩhyok yeẽk pwele ewenta.

will be added

X\