APOCALIPSIS 5

1Takachɨm hn tokomo Porrosht uje sakaha debɨta eeych ich tukumo uje hutɨta de hmata waãchta waa je ochɨpaãsho. Õr ahwoso de pɨt hn de pɨt yet hn oshuu belt otich chishew asa hutɨta owɨlo syete par oshuu chishye. 2Tokomo anjel toy uje ɨr ukurbo deyo de. Wɨchɨ chiilehet ich sɨhnew lahwoso ɨm: —¿Yeẽkpo uje ma dich par sehek asa hutɨta hn shuu kãra erze uje oshiyeru ochĩ̵ra?— Wɨchɨ uje anjel tata. 3Nĩhyok yeẽk uje de poõrc pwele sehek asa hutɨta hnii erze uje ode hnɨmich hnii erze uje ode hnɨmich uut. Nĩhyok uje yeẽk pwele teychɨm. 4Ich tɨkiyerh pork nĩhyok yeẽk uje ma dich par sɨtsẽr asa hutɨta hnii uje pwele teychɨm, 5per erze uje õr ɨbiyo iich otsɨɨ anciano yet tatɨm yok ɨm: —Ye eyerh. Hmeychɨm, ese uje ɨr alokot otsɨɨ ɨlpiyot wɨchɨ tãra uu ɨr porokkite Judas lɨshɨ hn tãra uu ɨr porokkite rey David lɨshɨ toy, ese uje ɨr alokot otsɨɨ ɨlpiyot wɨchɨ serz heke pwele sɨtsẽr asa hutɨta hn shuu asa belta otich kãra uje oshiyeru ochĩ̵ra syete.— 6Tokomo Obejɨt uje de pɨsh Porrosht ɨbɨta ahɨr hn erze uje ɨtso loshɨpo uje kwatro uje ɨka meytii dukuhlehe asa ɨr ɨbɨta hn erze uje õr ɨbiyo otsɨɨ anciano ode pɨt. Ese Obejɨt shɨ iyehe wahacha. Uje takachɨm ɨre ich shɨ ɨtso uje yeẽk shuukite shuu toy par teeychãha Porrosht. Ɨr wãpe syete hn ɨr ɨle syete. Wɨr shɨ sɨteẽta Porrosht Ɨchɨbich uje syete uje Porrosht shuu tĩ̵r ĩ̵rmo lekɨtiyo. 7Ese Obejɨt hno chishew asa hutɨta waa je de Porrosht hmata waãchta uje sakaha debɨta eeych. 8Uje chishew asa hutɨtaka hn erze uje ɨtso loshɨpo uje kwatro uje ɨka hn erze anciano uje õr bentikwatro ocha dete hnɨmoho ese Obejɨt ɨkɨch. Nos wɨr õr ɨre õr arpa de hn õr prete de uje oro uje pohɨr ɨsho de ehet uje aat ehmuuj. Erze uje aat ehmuuj shɨ sɨteẽta Porrosht aabo õr ahwoso uje õr orar otsapur ɨre. 9Wɨr oteeychɨ otseẽt imno uje ahle otsɨɨ: —Owa ich ma dich heke pwele boy asa hutɨta uje ochɨpaãsho hn etsẽr erze belt otich uje oshiyeru ochĩ̵ra shɨ pork oso oshuu owani hn armɨsta noshɨ par eshɨ oso õr hnɨtewɨhɨ Porrosht ahɨr. Erze oso nohmɨramo otãra nos wɨr dihipo õr hnɨmoho lekɨtiyo hn otãra nos owɨlo uje otseẽtɨhɨ ahwoso kɨnãho kɨnãho ĩ̵rmo lekɨtiyo. 10Owa nos uhu õr weeta nohmɨra hn uhu õr saserdote par eyok Ɨrhĩch Porrosht ɨr ɨbiyo. Tyenɨj uhu nos otɨbey oso ĩ̵rmo lekɨtiyo nehe.— 11Esee hn tokomo hn tukunt erze anjele õr ahwoso. Wɨr ode erze anciano õr nẽr hn erze uje ɨtso loshɨpo uje kwatro uje chɨpeẽsa ese uje sakaha debɨta eeych. Erze anjele ich okɨhnipa, õr miyone y miyone. 12Ochiilehet ich otsɨhnew lahwoso otsɨɨ: —Ese Obejɨt oso oshuuni par ɨshɨ õr hnɨtewɨhɨ Porrosht ahɨr heke ich om uje ɨr ukurbo de hn ich ɨrhĩch dich hn ich eykdeyo hn ukurbosh par shiyokõr kuche. Ich om uje oshuu ɨr dich hn onarim ɨre hn oteeychãha ɨre.— 13Esee hn tukunt toy nos wɨr kuche uje Porrosht shiyokõrkite uje de poõrc hn uje de hnɨmich hn uje de hnɨmich uut hn uje de onoot bahluta hn nos wɨr kuche uje de ehet otata otsɨɨ: —Ese uje sakaha debɨta eeych hn ese Obejɨt ich om uje nos oteeychãha õr hn oshuu õr deyo hn onarim õr hn otata uje wɨr õr ukurbo deyo de par uje nos oshiyokõr kuche. Ich om uje shish otata oshuu ɨtsorz.— 14Erze uje ɨtso loshɨpo uje ɨka uje kwatro otsɨɨ: —Yehe wɨchɨ.— Hn erze anciano uje õr bentikwatro ocha dete hnɨmoho õr ɨkɨch ese uje dechɨ debɨta eeych hn ese Obejɨt hn oteeychãha õr.

will be added

X\