APOCALIPSIS 4

1Uje nos tichew erze huteke hn takachɨm poõrc hn tokomo uje uhurrza sɨtsẽr ɨre. Tukuntpo ese uje ɨr ahwoso shɨ ɨtso uje yeẽk sobɨta trompeta. Tatɨm yok ɨm: —Ohɨr lɨka. Tokowa owa erze kuche uje tyenɨj tokole nehe.— 2Ɨchii Porrosht Ɨchɨbich hnoy yok seya yok poõrc. Tokomo rey ɨr ɨbɨta dechɨ poõrc hn yeẽk sakaha eeych. 3Ese uje sakaha debɨta eeych ich hũre wɨhĩ̵rt shɨ ɨtso kojach uje iich otsɨɨ jaspe hn shɨ ɨtso kojach yet uje iich otsɨɨ cornalina. Chekshorrza chɨpeẽsa ɨre. Asa chekshorrza ɨr kolort berte ɨtso kojach uje iich otsɨɨ esmeralda. 4Ese rey ɨbɨta wɨro tokomo õr ɨbe yer toy bentikwatro, hn erze uje otsakahachɨs wɨr õr bahluwo uje õr ɨbiyo iich otsɨɨ anciano. Õr ɨshuwo ich poro hn oyãha doolo uje oro ɨtso uje reye oyãha. 5Ese uje sakaha debɨta eeych ich wɨro hũre shɨ ɨtso yuwebo uje chihit hn ich ihyokõrak dich hn nar. Asa ɨbɨta ɨkɨch syete nampyon dechɨ uje hũre. Wɨr sɨteẽta Porrosht Ɨchɨbich uje syete. 6Asa ɨr ɨbɨta ɨkɨch kucherk de uje shɨ ɨtso lagunta per shɨ ɨtso pejta hn kojach uje iich otsɨɨ cristal. Ese ɨr ɨbɨta wɨro kuche ɨka de kwatro shɨ ɨtso loshɨpo. Ɨr ɨle de lekɨtiyo ɨr eeych. De ɨr ɨkɨch hn de ɨr nẽr. 7Nohmet de uje ɨtso ɨlpiyo, hn uu yet shɨ ɨtso wõjɨt itokohlt, hn uu yet ɨr ɨle ɨtso hnakɨrbich, hn uu yet shɨ ɨtso agilt uje iyo. 8Erze loshɨpo uje kwatro, kal nohmɨra ɨr ĩhyo seys, hn ɨr ɨle de lekɨtiyo ɨr eeych. Deeych hn dɨhlak shish otsɨɨ: —Eyok Ɨrhĩch Porrosht uje ukurbo deyo de, wɨchɨ yelɨj niyokõr uje mĩ̵hnɨk, yelɨj niyokõr uje mĩ̵hnɨk, yelɨj niyokõr uje mĩ̵hnɨk. Wɨchɨ ɨchii dekite hn shish de hn shish de nehe.— 9Erze kuche uje kwatro uje ɨtso loshɨpo uje ɨka wɨr shish shuu Porrosht ich dich uje sakaha debɨta eeych hn onɨna ɨre. Wɨchɨ shish ɨka. 10Uje erze kwatro shiyokõr shuu ɨtsorz hn erze uje õr bentikwatro uje õr ɨbiyo iich otsɨɨ anciano wɨr ocha dete hnɨmoho ɨr ɨkɨch hn oteeychãha ɨre hn ochɨbɨte doolo ɨr ɨkɨch uje oro hn otsɨɨ: 11—Õryok Ɨrhĩch Porrosht, ich om uje nos oteeychãha owa hn otatɨm owa uje akɨrbo de pork owa uje nos ahakõr kuche uje de. Wɨr de shɨ pork ahmũr heke ahakõrkite.—

will be added

X\