APOCALIPSIS 3

1Atsew ebɨte hutɨta hn asɨm erze Porrosht aabo õr bahlut uje de asa iglesya uje de dɨt Sardis. Atɨm ɨre on: “Wɨchɨ ɨr ahwoso uje Porrosht Ɨchɨbich syete de ɨre hn porrzeebe syete de ɨre toy. Wɨchɨ tata ɨm: Tɨkɨraha uje ahakõrlo. Ebɨtlo uje olak ɨka per shɨ olak ɨtso topo. 2Olak shɨ olak ɨtso uje amɨlo. Erĩ̵hɨlo uhu olak ukurboshpo. Uhulo ɨkpo ese uje sehe toy. Tokomo erze uje ahakorĩ̵hɨlo Porrosht ɨle ɨkɨch ich ye ompe. 3Olak eyucha erze uje ẽntloni hn ahmũrlo. Moymlo erze mɨhnũwo uje yesh ahakõrlo hn eeshlopo ahakõrlo uje Porrosht sahmũr. Kɨmɨjɨ ye erĩ̵hɨlo ich tɨkɨrẽt shɨ yok ɨtso echɨkɨt heke ye erahalope waa orta uje takaashpo par tepyẽr olak. 4Oso sohmɨramo ode olak ehet wahacha dɨt Sardis uje ye oniyokõr mɨhnũwope. Wɨr shɨ ɨtso uje ye õr ɨshuwo waresh heke wɨr tyenɨj õya yok nehe hn õr ɨshuwo ich poro pork ye oniyokõr uje mɨhnũwope. 5Yeẽk uje iim erze mɨhnũwo ich serz. Wɨchɨ tyenɨj iyãha lasuwo uje poro, hn ye turhũ iichpe uje de asa hutɨta uje õr ɨkɨrĩt de uje yelɨj nɨhna ɨre. Tyenɨj titɨm Papa ɨr iich toy hn erze ɨr anjele. 6Ese uje tẽr uje Porrosht Ɨchɨbich tatɨm daabo uje otakɨsho lawichɨhɨ lekɨtiyo tyenɨj shiyokõr uje ɨre tata.” 7Atsew asa hutɨta asɨm erze Porrosht aabo õr bahlut uje de asa iglesya uje de dɨt Filadelfia. Atɨm ɨre on: “Wɨchɨ ɨr ahwoso ese uje yelɨj niyokõr uje mĩ̵hnɨk. Wɨchɨ shɨ tata uje ich ũru, hn shɨ ɨtso uje tõhwa rey David ɨr yabe pork tyenɨj tɨbey israel oso õr hnɨmich nehe. Uje Cristo sɨtsẽr ese pwert uhurrza ich nĩhyok yeẽk pwele shiyeru hn uje shiyeru ich nĩhyok yeẽk pwele sɨtsẽr. Wɨchɨ tata ɨm: 8Nos tɨkɨraha uje ahakõrlo. Ẽrlo yok. Tokosɨm olak pahwoso par anɨmɨrãhalo shɨ ɨtso uje tɨtsẽr pwert uhurrza hn nĩhyok yeẽk uje pwele shiyeru. Tɨkɨraha uje yẽrɨj olak ukurbosh per shish ahakõrlo uje titɨm olak hn yelɨj atɨlɨlo erze uje ye odɨraha yokpe. 9Ẽrlo yok. Erze israel oso otata uje ochii ɨre Porrosht aaboho per shɨ oshiyokõr uje Satanás sahmũr. Wɨr shɨ otata lekushiĩ. Ẽrlo yok. Tuu otɨrẽt hn ocha dete hnɨmoho olak ɨkɨch otatɨm olak uje tahmũr olak. 10Shish olak ewenta erze kuche mɨhnũwo uje tĩ̵r olak ɨtso uje titɨm olakni heke shish tɨkɨbey olak uje terɨhɨ ɨshɨrĩt nehe uje kuche mɨhnũwo tĩ̵r ĩ̵rmo lekɨtiyo par chɨbɨte orhõta kɨmɨjɨ õr ɨluu om o kɨmɨjɨ ye ompe. 11Tyenɨj takaashpo shɨchish. Ye moymlo erze uje ich om uje yesh ahakõrlo par uje nĩhyok yeẽk shuu olak premyo pyerte nehe. 12Ese uje shish shiyokõr uje titɨm olakɨke ich serz. Tuu wɨchɨ dich shɨ ɨtso uhwɨrbe uje de Dii Porrosht ihyuch ehet. Yelɨj tokolɨhɨ Dii Porrosht ihyuch. Tichew Dii Porrosht ɨr iich tɨbɨte ɨr eeych hn tichew Dii Porrosht ɨr dɨt ɨr iich tɨbɨte ɨr eeych toy. Ese dɨt wɨchɨ Jerusalén ahle uje tãra poõrc uje Dii Porrosht de hn ihnɨmichɨhɨ hnɨmich nehe. Tichew piich uje ahle toy tɨbɨte ɨre eeych. 13Ese uje tẽr uje Porrosht Ɨchɨbich tatɨm daabo ich tyenɨj shiyokõr uje ɨre tata.” 14Atsew asa hutɨta hn asɨm erze Porrosht aabo õr bahlut uje de asa iglesya uje de dɨt Laodicea. Atɨm ɨre on: “Wɨchɨ ɨr ahwoso ese uje ich ũru pork shish tata uje ich ũru hn shuu yakaha uje tata. Wɨchɨ shiyokõr poõrc hn shiyokõr hnɨmich hn nos wɨr kuche uje Porrosht tata. Wɨchɨ tata ɨm: 15Nos tɨkɨraha uje ahakõrlo. Shɨ olak ɨtso kuche uje oso oho kɨmɨjɨ duhlu o kɨmɨjɨ kɨɨs per olak shɨ olak ɨtso awɨt uje otsehnyẽr. Ye olak duhlu hnii olak kɨɨs. Tahmũr uje olak kɨɨs o olak duhlu, 16per ye olak duhlupe hn ye olak kɨɨspe heke tɨteẽta tuu ɨtso uje tiyuhu olak tuu ãrlo pahwo. 17Athɨlo uje ich olak ɨhĩ̵r deyo hn nos olak ɨbiyo tokole om hn ye olak nesit latɨk. Ye erahalope uje nĩhyok kuche om uje tĩ̵r olak hn nos oso ochuuna uje olak losuhlaabo hn shɨ olak ɨtso olɨbo hn shɨ ɨtso uje amehelo eeyo. 18Heke takɨt olak par uje eylo erze oro uje de pahɨr uje tarĩ̵hɨ jwekɨta par tuu ware tokole par uje ye olak koswãha yok heke tuu olak ɨhĩ̵r deyo. Hn eylo olak ɨshuwoho pahɨr uje poro par anãhalo par uje ye apooklo uje oteychɨm olak pork olak ɨluu om, hn eylo olak ɨmɨshiyoho pahɨr par uje ormĩ̵hɨlo olak ɨle hn erahalo uje Porrosht sehe duhu erahalo. 19Yok tahɨrm erze uje tahmũr õr uje sehe oniyokõr uje ye tahmũrpe hn tepyẽr erze uje tahmũr õr uje oshiyokõr uje ye tahmũrpe heke enaha olak par ahakõrlo uje titɨm olak hn moymlo erze mɨhnũwo uje ahakõrlo. 20Ẽrlo yok. Yesh tiyehe pwert uhurrza hn tuu. Kɨmɨjɨ yeẽk nunt pahwoso hn dɨtsẽr asa pwert uhurrza ich yok tomsaha ehet hn oyaakɨhɨye ahɨr. 21Uje yeẽk serz ich tuu sakaha pahɨr shɨ ɨtso uje terzni hn tiyakaha Papa ahɨr. 22Ese uje tẽr uje Porrosht Ɨchɨbich tatɨm daabo ich tyenɨj shiyokõr uje ɨre tata.”—

will be added

X\