APOCALIPSIS 22

1Ese anjel sowa yok asa onoota waa je ich nimpyo shɨ ɨtso kojach uje iich otsɨɨ cristal. Asa onoota tokolɨhɨ ese Porrosht hõr ese Obejɨt õr ɨbɨta hn uushɨ 2chɨkãha ese dehet dich ehet. Ɨr wɨro pohɨr de uje shuu õr ɨkɨrĩt de uje yelɨj nɨhna ɨre. Kal shekurko ɨr ee de hn erze ɨr ĩhyo ich shuu nos oso uje ode ĩ̵rmo lekɨtiyo õr owich om. 3Erze ĩ̵rmo ɨlaro Porrosht sajɨr ɨkiyokite per ese ĩ̵rmo ahle Porrosht ye dajɨr ɨkiyope. Porrosht hõr ese Obejɨt õr ɨbɨta de ese ĩ̵rmo ahle, hn ɨr ɨbiyo shish oteeychãha ɨre. 4Wɨr oteychɨm Porrosht ɨle hn ɨr iich de õr une. 5Ese ĩ̵rmo ahle ich nĩhyok uje dɨhlak. Ye õr nesita nampyonpe hnii deeych par chihit õr pork eyok Ɨrhĩch Porrosht ɨr yokõrt chihit õr. Ich shish nos õr ɨtso rey hn shish odechɨ. 6Esee hn anjel tatɨm yok ɨm: —Erze ahwoso ich ũru hn ich tyenɨj yakaha. Eyok Ɨrhĩch Porrosht wɨchɨ uje shuu erze ɨr profeta otatɨm erze oso lahwoskite. Wɨchɨ shuu ɨr anjel sowa laabo erze mɨhnũwo uje tyenɨj tĩ̵r ĩ̵rmo shɨchish nehe. 7Jesús sole: “Ẽrlo yok. Tyenɨj tɨkɨrẽt shɨchish. Ich om par erze uje oshiyokõr uje asa hutɨta tata.”— 8Yok Juan. Tukunt erze kuche hn tokomo erze kuche. Uje tukunt hn tokomo erze, ich tokotsa pɨte hnɨmoho ese anjel ɨle ɨkɨch par tɨkeeychãha ɨre pork sowa yok erze kuche, 9per ese anjel tatɨm yok ɨm: —Ye ahakõr uhu ɨlorz. Shɨ yok Porrosht ɨbɨk ɨtso owa hn yok ɨtso erze eshɨbo uje õr profeta hn yok ɨtso erze uje oshiyokõr uje asa hutɨta tata. Eeychãha Porrosht.— 10Hn tatɨm yok toy ɨm: —Uhu nos odɨraha uje asa hutɨta tata pork ich yej terɨhɨ ɨshɨrĩt uje erze ahwoso yakaha. 11Moym erze uje õr ɨluu mɨhnũ yakaha õr par shɨ oniyokõr uje ich mɨhnũwo. Moym erze uje oshiyokõr mɨhnũwo shɨ õr ɨtso erze hnakɨrbo hn tɨmcher uje oshiyokõr mɨhnuwõhoye par uje shish oshiyokõr oshuu ɨtsorz. Per erze uje oshiyokõr uje ich om ich shish tyenɨj oshiyokõr uje ich om hn erze uje oshiyokõr uje Porrosht sahmũr ich shish tyenɨj oshiyokõr uje Porrosht sahmũr.— 12Jesús sole: —Ẽrlo yok. Tyenɨj tɨkɨrẽt shɨchish hn tokõhwa premyo par tokosɨm pɨbiyo shɨ ɨtso uje otserz nohmɨr nohmɨr. 13Yok uu webich osht hn uhurzosht shɨ yok ɨtso letra a hn zeta. 14Ich om par erze uje oshiyokõr uje Porrosht sahmũr shɨ ɨtso uje ochũrhu lasuwo par uje õr pwele otew asa pohorrza ee waa je shuu õr ɨkɨrĩt de uje yelɨj nɨhna ɨre hn par uje ochɨkãha ese moraylt ɨr uhurrza hn otĩ̵r ese dɨt ehet. 15Nos wɨr uje oshiyokõr uje ich mɨhnũwo ye omasaha ese dɨt ahltpe pork õr ɨre ode urhuta bahluta ehet. Wɨr shɨ õr ɨtso poyto. Nos wɨr meriko hn konsaho ode urhuta bahluta ehet, hn nos wɨr erze uje ye onõyhi pɨshye ahɨrpe, shɨ omuhuye ahɨr, hn erze uje otorãhaye, hn erze uje õyhi yẽr ahɨr, hn erze uje õyhiye ahɨr, hn erze uje otsahat loshɨpo, hn erze uje oshɨm ɨre loshɨpo par oshuu sahat ɨre, hn erze uje oshuu yewo oshuu otoy, hn erze uje oteeychãha kojano po, hn nos wɨr erze uje otsahmũr otsehnyẽr yewo, hn erze uje otata lekushiĩ nos ode urhuta bahluta ehet. 16Yok Jesús. Tuu yok anjel hno tĩ̵r owa par shuu atsew erze ahwoso hn asɨm erze iglesya. Yok porokkite wɨchɨ rey David. Shɨ yok ɨtso porrzeebcha bahluta waa je deeych huta ich tokole.— 17Porrosht aabo wɨr õr ɨtso ese Obejɨt ɨr ihyãta. Porrosht Ɨchɨbich hn erze uje õr ɨtso Obejɨt ihyãta otɨbii otsɨɨ: —Erẽt.— Ese uje chunt uje yeẽk ler asa hutɨta ich tɨbii Jesús ɨm: —Erẽt.— Ese uje iich sẽhi ich tyenɨj tɨrẽt hn ese uje sahmũr ich tyenɨj ɨhɨ ese awɨt uje shuu õr ɨkɨrĩt de uje yelɨj nɨhna ɨre. Wɨchɨ ye bahatɨkɨsh. 18Titɨm olak nohmɨr nohmɨr uje ẽntlo uje asa hutɨta tata uje erze mɨhnũwo tyenɨj tĩ̵r ĩ̵rmo nehe. Kɨmɨjɨ yeẽk duhu ahwoso kɨnãho nõya erze Porrosht ahwoso ich erze kuche mɨhnũwo uje asa hutɨta tata uje Porrosht shuu tĩ̵r ĩ̵rmo nehe ich tĩ̵r ɨre toy. 19Kɨmɨjɨ yeẽk diyuhu ahnũwo ahwoso nohmɨramo uje de ana hutɨta uje tata uje Porrosht shuu mɨhnũwo tyenɨj tĩ̵r ĩ̵rmo nehe ich ye Porrosht duhu tew erze pohɨr ee uje shuu õr ɨkɨrĩt de uje yelɨj nɨhna ɨre hn ye dosɨm ɨre owichpe uje de ese dɨt Jerusalén ahle. Ana hutɨta tata ese dɨt hn erze pohɨr. 20Jesús wɨchɨ uje tatɨm eyok erze kuche hn wɨchɨ tata ɨm: —Titɨm olak uje ich ũru. Tyenɨj tɨkɨrẽt shɨchish.— Titɨm Jesús too: —Yehe wɨchɨ. Õryok Ɨrhĩche Jesús, erẽt.— 21Sehe tuu eyok Ɨrhĩch Jesús nos dosɨr olak uje olak Porrosht aabo. Shɨ ahnũwo uje titɨm olak.

will be added

X\