APOCALIPSIS 21

1Esee hn tokomo poõrc uje ahle hn tokomo ĩ̵rmo uje ahle toy pork uu poõrc webich osht hn hnɨmich ich nos sɨhna ɨre hn asa onoota bahluta ich nĩhyok. 2Tokomo dɨt uje tãra Porrosht ahɨr wahacha poõrc hn ihnɨmich. Ese dɨt ye kuche mɨhnũwo chɨhɨ ehetpe. Ɨr iich otsɨɨ Jerusalén ahle. Wɨchɨ ich ɨhĩ̵rtpa shɨ ɨtso uje onɨshii tɨmcharrza par chiilabey. 3Tukunt ahwoso uje ich sɨhnew tãra ese Porrosht ɨbɨta tata ɨm: —Ẽrlo yok. Ele ahle Porrosht ihyuch dechɨ oso õr ahɨr hn wɨchɨ debuhu õr ahɨr. Wɨr Porrosht ɨr iiso hn wɨchɨ uu õr Porrosht. 4Wɨchɨ nos churhũ õr ɨlote hn ich ye otope. Nĩhyok uje õhyiye hn nĩhyok uje oyerh hn nĩhyok uje doso pork nos wɨr kuche uje antkite de nihyokĩ̵hɨ wahacha.— 5Porrosht uje sakaha debɨta eeych tata ɨm: —Ẽrlo yok. Yok ich nos tiyokõr erze kuche ahlo.— Tatɨm yok toy ɨm: —Atsew ebɨte hutɨta pork ahnũwo ahwoso ich ũru hn tyenɨj yakaha.— 6Tatɨm yok ɨm: —Ich nos tɨmɨtɨke. Yok uu webich osht hn uu uhurzosht shɨ ɨtso letra a hn zeta. Ese uje iich sẽhi tokosɨm ɨre awɨt tuu ɨhɨ. Ese awɨt wɨchɨ uje tõhwa õr ɨkɨrĩt uje yelɨj nɨhna ɨre. Wɨchɨ ye bahatɨkɨsh. 7Ese uje serz ich tokosɨm ɨre ese premit. Ese premit wɨchɨ yok uu ɨr Porrosht hn ɨre yok pijo. 8Per erze uje otola hn erze uje otsotiis, hn erze uje oshiyokõr uje ye tahmũrpe, hn erze uje oshuu yewo oshuu otoy, hn erze uje ye onõyhi pɨshye ahɨrpe, shɨ omuhuye ahɨr, hn erze uje otorãhaye, hn erze uje õyhi yẽr ahɨr, hn erze uje õyhiye ahɨr, hn erze uje otsahat loshɨpo, hn erze uje oshɨm ɨre loshɨpo par oshuu sahat ɨre, hn nos wɨr meriko, hn erze uje oteeychãha kojano po, hn nos wɨr erze uje ich õr kushĩyo nos wɨr õr ɨre otserz. Õr premyo wɨchɨ uje tyenɨj otĩ̵r urhuta bahluta ehet uje asufre duhlu. Asa urhuta bahluta iich otsɨɨ toypo.— 9Esee hn erze anjele uje õr syete uje õr basɨ de uje syete uje erze kuche mɨhnũwo uje syete de aho uje yuwɨrke uje nos otsorĩ̵hɨ ĩ̵rmo ese yet tatɨm yok ɨm: —Erẽt. Tokowa owa waa je ɨtso Obejɨt ɨr ihyãta.— 10Porrosht Ɨchɨbich shuu takachɨm erze uje anjel tatɨm yokɨke. Ese anjel hnoy yok seya yok kojach eeych uje ich dich hn de porĩt hn sowa yok ese dɨt uje mɨhnũwo nihyokĩ̵hɨ ehet uje iich otsɨɨ Jerusalén. Tãra Porrosht ahɨr wahacha poõrc hn ihnɨmich. 11Ese dɨt ich hũre shɨ ɨtso Porrosht uje hũre hn shɨ ɨtso kojach uje ich ɨhĩ̵rt hn debich uje iich otsɨɨ jaspe uje pwele oteychɨm pɨt ɨtso ese kojach yet uje iich otsɨɨ cristal. 12Moraylt uje ich berzak chɨpeẽsa ese dɨt. Ese moraylt ɨr uhɨr dose hn kal uhɨr anjel iyehe. Erze uhɨr israel oso õr poruwo wɨshɨ õr iiyo de uje õr dose kal nohmɨr nohmɨr. 13Ɨr uhɨr tre de deeych warĩch hn tre de norte hn tre de sur hn tre de uje deeych yakaha. 14Ese moraylt sakaha erze kojano eeyo uje dose. Ese Obejɨt ɨr apóstole õr iiyo de erze kojano kal nohmɨr nohmɨr. 15Ese anjel uje keytkẽr yok hnoy oro uje ɨtso phich par sɨteẽta ese dɨt hn sɨteẽta uhɨr hn ese moraylt. 16Ese dɨt uu ɨr wɨro nos ɨtsye. Ɨr ehet hn uje berzak ich ɨtsye. Ese anjel sɨteẽta ese dɨt chĩ̵ra ese phich shuu do mil do syento kilometro. Ɨr ehet hn uje berzak hn porĩt shɨ ɨtsye. 17Sɨteẽta ese moraylt toy. Wɨchɨ sesenta y sinko metro uje de porĩt. Sɨteẽta chĩ̵ra namikɨt ɨtso hnakɨrbich meykɨt. 18Ese moraylt oshiyokõr ochĩ̵ra kojach uje iich otsɨɨ jaspe. Ese dɨt pur oro hn shɨ ɨtso pejta waa je ye warĩ̵rsh. 19Ese moraylt sakaha kojano eeyo. Wɨr ich ɨhĩ̵rts pisho hn ich debich. Ese moraylt chɨpeẽsa ese dɨt. Uu kojach webich osht iich otsɨɨ jaspe. Ese kojach uje de ese webich osht eeych iich otsɨɨ zafiro. Ese kojach yet uje de ese osiyer eeych iich otsɨɨ ágata. Ese kojach yet uje de ese tre eeych iich otsɨɨ esmeralda. 20Ese kojach yet uje de ese kwatro eeych iich otsɨɨ ónice. Ese kojach yet uje de ese sinko eeych iich otsɨɨ cornalina. Ese kojach yet uje de ese seys eeych iich otsɨɨ crisólito. Ese kojach yet uje de ese syete eeych iich otsɨɨ berilo. Ese kojach yet uje de ese ocho eeych iich otsɨɨ topacio. Ese kojach yet uje de ese nueve eeych iich otsɨɨ crisoprasa. Ese kojach yet uje de ese dye eeych iich otsɨɨ jacinto. Ese kojach yet uje de ese onse eeych iich otsɨɨ amatista. 21Erze ɨr uhur uje dose oshiyokõr ochĩ̵ra ese kojach uje iich otsɨɨ perla. Kal ɨr uhɨr perla nohmɨra. Ese dɨt ehet dehet de uje ich dich, pur oro hn shɨ ɨtso pejta waa je ye warĩ̵rsh. 22Nĩhyok ye tokomo templo uje chɨhɨ dɨt ehetpe pork ese eyok Ɨrhĩch Porrosht uje ukurbo deyo de wɨchɨ templo hn ese Obejɨt. 23Ese dɨt ye nesitpe uje deeych chihit hnii shekurko pork shɨ Porrosht yokõrt wɨchɨ uje chihit hn ese Obejɨt wɨchɨ shɨ ɨtso nampyon uje de ese dɨt. 24Ese dɨt hũre ɨtsorz heke nos chihit wɨr oso uje ode ĩ̵rmo lekɨtiyo hn wɨr odɨrkɨhɨ ɨr yokõrt. Erze reye uje ode ĩ̵rmo lekɨtiyo ohnoy ɨr kuche uje ich ɨhĩ̵rtso otseya ese dɨt. 25Ese dɨt ye odihyeru ɨr uhɨrpe uje deeych, hn nĩhyok uje dɨhlak. 26Nos wɨr dihipo uje ode ĩ̵rmo lekɨtiyo ohnoy ɨr kuche uje ich ɨhĩ̵rtso otseya ese dɨt, 27per nĩhyok kuche uje ich mɨhnũwo masaha ehet. Erze uje oshiyokõr uje ich mɨhnũwo ye omasaha ehetpe hn erze uje ich õr kushĩyo. Shɨ wɨr omasaha erze uje õr iiyo de asa hutɨta uje õr ɨkɨrĩt de uje yelɨj nɨhna ɨre. Asa hutɨta Obejɨt ɨr huto.

will be added

X\