APOCALIPSIS 20

1Esee hn tokomo anjel uje ihnɨmich tãra poõrc. Wɨchɨ tõhwa yabe par sɨtsẽr ese jotsɨt ebich uje ye uhurtɨkɨsh. Kenent dich de ɨr hmata. 2Ese anjel chishew ese loshɨpɨt. Wɨchɨ ese echeẽt uje dekite iich otsɨɨ dyablo hn Satanás. Shiyeru chĩ̵ra ese kenent par uje ye tokolpe nehech mil ãyo 3hn tãra chɨmchaha ese jotsɨt hn shiyeru ebich. Chɨbɨte yarta ese jotsɨt ɨr uhurrza par uje ye odɨtserpe par uje ye wɨchɨ nehnyẽr erze oso uje ode ĩ̵rmo lekɨtiyo par erze mil ãyo uje shɨ sakahachɨs. Uje terɨhɨ mil ãyo ich tyenɨj ochiyuhu ɨre par daalo arhaabo. 4Esee hn tokomo õr ɨbe hn erze uje otsakaha eeyo. Porrosht ɨshɨm õr ukurbo par otsepyẽr erze uje oshiyokõr mɨhnũwo. Tokomo wɨr õr ɨchɨbiyo toy erze uje ochekshehe õr etɨbiyoni shɨ pork ye olotiis uje Jesús tata hn uje Porrosht tata. Wɨr ye oteeychãha ese loshɨpɨtpe uje tokolɨhɨ onoota bahluta hnii ese kojach pɨt uje seẽt ɨre hnii uje ochɨbɨte ese loshɨpɨt yarta õr une o kɨmɨjɨ õr hme. Wɨr õr ɨkpo hn oshiyokõr Cristo ɨr ɨbiyo uje Cristo tɨbey oso nehe nehech mil ãyo. 5Wɨchɨ webich osht uje õr ɨkpo, per erze yewo uje ye odɨraha Porroshtpe ye õr ɨkpope nehech iyuwe erze mil ãyo. Erze uje ochɨraha Porrosht wɨr uje õr ɨkpo wap. 6Ich om par erze uje õr ɨkpo wap pork wɨr Porrosht aabo. Ye otĩ̵r urhuta bahlutpe. Uje otãra yeẽk ochɨmchaha urhuta bahluta ehet otata otsɨɨ toypo. Erze Porrosht aabo wɨr shɨ Porrosht hn Cristo õr ɨbiyo uje iich otsɨɨ saserdote par oshiyokõr õr ɨbiyo. Wɨr Cristo ɨbiyo par otɨbey oso uje ode ĩ̵rmo lekɨtiyo ese mil ãyo. 7Esee uje terɨhɨ mil ãyo ich otsɨtsẽr ese jotsɨt ebich uje Satanás de. 8Tokolɨhɨchɨs par hno tĩ̵r ĩ̵rmo lekɨtiyo par sehnyẽr oso. Hno tĩ̵r ese hnɨmich uje iich otsɨɨ Gog hn ese hnɨmich yet uje iich otsɨɨ Magog par shuu nos wɨr oso otakasho lawich par otatskɨr. Wɨr ich okɨhnipa shɨ õr ɨtso hnɨmich ukult uje de onoota bahluta wɨrc. 9Nos otãra ɨr hnɨmoho lekɨtiyo otakasho lawich hn ohno otĩ̵r Jerusalén uje Porrosht sahmũr. Porrosht aabo odebuhu Jerusalén wɨro. Erze oso ochɨpeẽsa Porrosht aabo hn ese dɨt par sehe onɨhna õr per jwekɨta tãra poõrc kayɨhɨ õr eeyo hn nos õr duhlu. 10Ese dyablo uje sehnyẽr oso ich otãra ochɨmchaha asa urhuta bahluta ehet uje asufre de. Ochɨmchaha ese loshɨpɨt wapkite uje tokolɨhɨ onoota hn ese profeta uje sehnyẽr oso. Wɨr shish odechɨ deeych hn dɨhlak. Ochuuna erze uje ich doso hn ye uhurtɨkɨsh. 11Esee hn tokomo õr ɨbɨta data waa je poro. Yeẽk sakaha eeych. Ese hnɨmich hn poõrc ich sɨhna ɨre. 12Nos tokomo wɨr topo deyo hn ijaabo oyehe jwe ɨkɨch uje sakaha debɨta eeych. Ese jwe shuu yeẽk sehek erze hute, hn sehek hutɨta yata toy. Wate uje wɨr õr iiyo de erze uje õr ɨkɨrĩt de uje yelɨj nɨhna ɨre. Esee hn nos wɨr kuche uje oso oshiyokõr uje ehn yahpaa otoy ich nos ochichewni ochɨbɨte erze hute. Ese jwe shuu otsepyẽr õr kal nohmɨr nohmɨr par nos wɨr kuche uje de erze hute pork wɨr uje oshiyokõrni. 13Nos wɨr uje otoni otokolɨhɨ onoota bahluta hn yewo otokolɨhɨ hnɨmich uut hn otokolɨhɨ ese topo õr ɨchɨbiyo owich. Nos sepyẽr õr par erze kuche mɨhnũwo uje oshiyokõrni. 14Ese uje shuu oso otoy hn ese owich uje topo õr ɨchɨbiyo deni otãra ochɨmchaha urhuta bahluta ehet. Asa urhuta bahluta iich otsɨɨ toypo. 15Nos wɨr uje ye õr iiyo chɨhɨ asa hutɨtape uje wɨr õr iiyo de erze uje õr ɨkɨrĩt de uje yelɨj nɨhna ɨre, ich otãra õr ochɨmchaha õr asa urhuta bahluta ehet.

will be added

X\