APOCALIPSIS 2

1Atsew asa hutɨta hn asɨm erze Porrosht aabo õr bahlut uje de asa iglesya uje de dɨt Efeso. Atɨm ɨre on: “Wɨchɨ ɨr ahwoso ese uje porrzeebe syete de hmata waãchta hn dɨrkɨhɨ wɨr uhwɨrbe ehet uje syete pur oro uje otserũhu nampyon eeyo. Wɨchɨ tata ɨm: 2Nos tɨkɨraha uje ahakõrlo. Tɨkɨraha uje aslo pɨbiyo ich ehnewlo hn ye moymlo erze pɨbiyope. Tɨkɨraha uje ye enthɨlope erze uje oshiyokõr mɨhnuwõho olak ehet. Olak prowa erze oso uje ochii ɨr apostolehe par erahalo kɨmɨjɨ ũru hn eshɨlo uje ye ũrpe. 3Tɨkɨraha uje shish kuche mɨhnũwo tĩ̵r olak hn olak ewenta pork ye otiislo yokpe hn ye uhulo patɨm olakpe. 4Per kuchɨt de uje shuu tɨkɨtak olak. Wap ich ahmũrlo pɨshɨ yok per ele ahle ich yẽrɨj ahmũrlo yok. 5Sehe tuu olak eyucha uje wap ich ahmũrlo pɨshɨ yok heke sehe tuu ahmũrlo yokpo uhulo ɨlo wapni hn ahakõrlo pɨbiyo uhulo ɨlo uje wapni. Kɨmɨjɨ ye ahakõrlo uhulo ɨtsorz ich tyenɨj tɨtĩ̵r olak nehe hn tuu olak weeta ye jukur shɨ ɨtso uje tiyuhu asa uhwɨrbta uje oro per kɨmɨjɨ eeshlo ahmũrlo pɨshɨ yok ɨtso uje wapni ich ye tuu ɨlorzpe. 6Kuchɨt de uje ich om uje yesh ahakõrlo, ich etaklo wɨr õr ɨbiyo erze uje õr ɨluu iich otsɨɨ nicolaítas. Yok ɨtspo ye tahmũr õrpe. 7Ese uje tẽr uje Porrosht Ɨchɨbich tatɨm Porrosht aabo uje otakasho lawichɨhɨ lekɨtiyo ich tyenɨj shiyokõr uje tata. Ese uje shiyokõr ɨtsorz ich tyenɨj serz hn tuu tew asa pohorrza eeta waa je shuu õr ɨkɨrĩt de. Asa pohorrza dechɨ paraíso uje Porrosht de.” 8Atsew asa hutɨta hn asɨm erze Porrosht aabo õr bahlut uje de asa iglesya uje de dɨt Esmirna. Atɨm ɨre on: “Ese uje wapkite de hn uhurc ich shish de, wɨchɨ uje tokite hn ɨkpo tata ɨm: 9Tɨkɨraha erze kuche mɨhnũwo uje tĩ̵r olak hn tɨkɨraha uje olak losuhlaabo per ich olak ɨhĩ̵r deyo. Tɨkɨraha uje oso ode uje oshuu yewo ochiyuhu lahwoso mɨhnuwõho olak. Wɨr otata uje õr israel oso per wɨr ye Porrosht aabope. Wɨr shɨ weeta uje oshiyokõr uje Satanás sahmũr. 10Ye atɨlɨlo erze mɨhnũwo uje tyenɨj tĩ̵r olak. Ẽrlo yok. Dyablo tyenɨj shuu ochɨmchaha olak yewo õr karsel par uje prowa olak kɨmɨjɨ moymlo Porrosht o kɨmɨjɨ ye moymlope. Tyenɨj oshiyokõr mɨhnɨkĩ̵hɨ olak oshuu daalo dye. Ye moymlo yok nehech atɨlo hn tokosɨm olak premyo uje de pahɨr. Wɨchɨ uu olak ɨkɨrĩt. 11Ese uje tẽr uje Porrosht Ɨchɨbich tatɨm Porrosht aabo uje otakɨsho lawichɨhɨ lekɨtiyo ich tyenɨj shiyokõr uje tata. Erze uje oshiyokõr uje ɨre tata ich otserz heke ye otĩ̵r urhuta bahluta ehet nehe. Asa urhuta bahluta iich yet otsɨɨ otoypo.” 12Atsew asa hutɨta hn asɨm erze Porrosht aabo õr bahlut uje de asa iglesya uje de dɨt Pérgamo. Atɨm ɨre on: “Ese uje espada pɨt watak hn pɨt yet watak de ɨre ahɨr wɨchɨ tata shuu ɨtsorz: 13Tɨkɨraha uje ebuhulo ese owich uje Satanás sakaha. Tɨkɨraha uje ye moymlo yokpe. Antipas ye lotiis yokpe hn shish sanɨmɨrãha pahwoso nehech oshuu oshuu toy olak dɨt ehet uje Satanás debuhu. Uje oshuu ɨre oshuu toy ɨtsorzni ich olak ye moymlo yokpe 14per kuche de uje ahakõrlo uje ye tahmũrpe. Olak yewo ode uje oshiyokorãha yewo ɨtso uje Balaam shiyokõrkite. Wɨchɨ sakɨt rey Balak par shuu israel oso oshiyokõr uje ich mɨhnũwo shɨ ɨtso uje chɨbɨte kojach erze israel oso õr ɨjɨch par uje shuu õr hnɨte hn õr kay. Wɨchɨ shuu otew erze kuche ẽro uje oshuu hn oshɨmɨhɨ ɨr porrosht kojano po hn shuu oshiyokõr erze uje ich mɨhnũwo uje hnakɨrbo hn tɨmcher oshiyokorĩ̵hɨye. 15Olak yewo ode toy uje otsahmũr erze uje õr ɨluu iich otsɨɨ nicolaítas oshiyokorãha õr. Yok ich tɨkɨtak pɨshɨ õr ɨluu. 16Moymlo erze uje ich mɨhnũwo hn eeshlopo ahakõrlo uje yok tahmũr. Kɨmɨjɨ ye ahakõrlo uje tahmũr ich tɨkɨrẽt shɨchish hn tepyẽr erze uje oshiyokõr uje ich mɨhnũwo tĩ̵ra espada uje tãra pahwo. 17Ese uje tẽr uje Porrosht Ɨchɨbich tatɨm Porrosht aabo uje otakɨsho lawichɨhɨ lekɨtiyo ich tyenɨj shiyokõr uje tata. Kɨmɨjɨ shiyokõr uje titɨm ɨreke ich tyenɨj serz hn tokosɨm ɨre erze ɨr poso uje shɨ ɨtso maná uje sakɨsɨhɨ Porrosht ahɨr. Tokosɨm ɨre toy kojach uje poro uje ɨr iich ahle de. Nĩhyok ye latɨk dɨraha ese iich ahle, shɨ ese uje tokosɨm ɨre.” 18Atsew ebɨte hutɨta hn asɨm erze Porrosht aabo õr bahlut uje de asa iglesya uje de dɨt Tiatira. Atɨm ɨre on: “Porrosht ɨr Ijɨt ɨr ɨle eyhi shɨ ɨtso jwekɨta yokõrt hn ɨr hnɨte shɨ ɨtso bronse uje ich hũre, wɨchɨ uje tata ɨm: 19Tɨkɨraha uje ahakõrlo hn tɨkɨraha uje ahmũrlo yok hn ye otiislo yokpe hn shish ahakõrlo pɨbiyo hn olak ewenta erze kuche mɨhnũwo uje tĩ̵r olak. Tɨkɨraha uje olak ɨbiyo uje ahakõrlo par yok ich ma om je uje wapni 20per kuchɨt de uje ich tɨkɨtakpa uje ahakõrlo. Ye ontɨlope asa tɨmcharrza waa je iich otsɨɨ Jezabel. Wate chii ɨr profet yarĩ̵hɨ hn shiyokorãha pɨbiyo shuu oshiyokõr erze uje ich mɨhnũwo pisho uje hnakɨrbo hn tɨmcher oshiyokorĩ̵hɨye hn shuu elɨlo erze kuche ẽro uje oso oshuu hn oshɨm ɨr porrosht kojano po. 21Tɨbɨte ɨshɨrĩt par uje wate iim uje shiyokõr uje mɨhnũwo par shiyokõr uje tahmũr per ye nahmũrpe. Ye noympe uje shiyokõr erze mɨhnũwo uje hnakɨrbo hn tɨmcher oshiyokorĩ̵hɨye. 22Ẽrlo yok. Tyenɨj tuu wate permpa hn shɨ de darpich eeych. Erze uje otorãhaye hõr wate tɨmcharrza tyenɨj oym erze kuche mɨhnũwo hn oshiyokõr uje tahmũr. Kɨmɨjɨ ye onoym erze mɨhnũwo ich tuu õr dospa. 23Erze uje otsahmũr uje wate shiyokorãha õr ich tyenɨj tuu õr tuu otoy, heke nos paabo uje otakɨsho lawichɨhɨ lekɨtiyo ochɨraha uje takachɨm õr aho hn õr eyuwo. Deeych yet nehe hn tokosɨm olak nohmɨr nohmɨr uje erzlo kɨmɨjɨ ahakõrlo uje om o kɨmɨjɨ ahakõrlo uje mɨhnũwo. 24Olak yewo uje olak dechɨ dɨt Tiatira uje ye ahakõrlope uje asa tɨmcharrza tatɨm olak hn ye ahakõrlope erze kuche mɨhnũwo uje otata uje wɨr kuche uje kwestpa ochɨraha uje tãra Satanás per shish ahakõrlo uje titɨm olakni heke ye tɨrok olakpe par tokosɨm olak ɨbiyo yewo. 25Shish tyenɨj ahakõrlo erze uje yesh ahakõrlo nehech takaãcha nehe. 26Uje yeẽk shiyokõr shuu ɨtsorz nehech terɨhɨ uhurc ich tyenɨj serz hn tokosɨm ɨre ukurbo par tɨbey wɨr dihipo ich okɨhniya. 27Wɨchɨ tyenɨj sepyẽr yeẽk uje shiyokõr mĩ̵hnɨk shɨ ɨtso uje shuu kobɨt chishak chĩ̵ra pyerɨt. Tokosɨm ɨre ukurbo shɨ ɨtso uje Papa ɨshɨm yok pukurbo. 28Tokosɨm ɨre kuchẽrk toy uje shɨ ɨtso porrzeebcha bahluta waa je tokolɨhɨ deeych huta. 29Ese uje tẽr uje Porrosht Ɨchɨbich tatɨm daabo uje otakɨsho lawichɨhɨ lekɨtiyo ich tyenɨj shiyokõr uje tata.”

will be added

X\