APOCALIPSIS 19

1Esee hn tukunt ahwoso uje tãra poõrc ɨtso oso okɨhniya uje ochiilehet otsɨɨ: —Eeychãhalo eyok Ɨrhĩch Porrosht. Wɨchɨ ɨshɨ oso õr hnɨtewkite. Ich om uje yeeychãhalo ɨre. Wɨchɨ ukurbo deyo de. 2Uje Porrosht sepyẽr erze oso uje oshiyokõr uje ich mɨhnũwo ich shish shiyokõr uje ich om hn tata uje ich ũru. Sepyẽr ese dɨt bahlut. Ese dɨt shɨ ɨtso tɨmcharrza yɨtorrza. Wate shuu nos oso oshiyokõr uje ich mɨhnũwo shuu otseẽt ɨre. Porrosht sepyẽr ɨre pork shuu Porrosht aabo wɨshɨ shuu õr armɨtsɨ noshɨ.— 3Hn erze uje ode poõrc uje okɨhniya otɨbich toy otsɨɨ: —Eeychãhalo eyok Ɨrhĩch Porrosht. Ese dɨt duhlu hn kiibich shish tĩ̵r poõrc. Yelɨj nɨhna ɨre.— 4Erze bentikwatro uje õr ɨbiyo iich otsɨɨ anciano hn erze uje ɨtso loshɨpo uje ɨka uje kwatro ocha dete hnɨmo hn oteeychãha Porrosht uje sakaha debɨta eeych. Õr ɨre otsɨɨ: —Yehe wɨchɨ. Eeychãhalo eyok Ɨrhĩch Porrosht.— 5Ese Porrosht ɨr ɨbɨta õr ahwoso tãra uje tata ɨm: —Nos wɨr olak uje olak Porrosht ɨr ɨbiyo hn erze uje otola ɨre kɨmɨjɨ õr ijaabo o kɨmɨjɨ õr deyo, eeychãhalo eyok Ɨrhĩch Porrosht.— 6Esee hn tukunt õr ahwoso ɨtso oso uje ich okɨhniya. Õr ahwoso ihyokõrak dich shɨ ɨtso awɨt uje uushɨ hn shɨ ɨtso uje nar ihyokõrak dich. Wɨr otsɨɨ: —Eeychãhalo eyok Ɨrhĩch Porrosht pork wɨchɨ ɨr ukurbo deyo de. Ɨchii ɨre nos tɨbey oso. 7Tyenɨj eyok aylpa hn eyok narim ɨre hn tyenɨj yuhulo ɨre dich pork terɨhɨ ese Obejɨt ɨr ahamich shɨ ɨtso uje wɨchɨ chiileku hn ɨr ihyãta chɨmɨt ɨre. 8Porrosht ɨshɨm õr par uje oyãha lasuwo uje ich ɨhĩ̵rts pisho poro hn ich hũre hn ye warĩ̵rsh.— Erze õr ɨshuwo uje ich poro shɨ Porrosht sɨteẽta erze ɨr aabo õr ɨluu uje oshiyokõr om. 9Ese anjel tatɨm yok ɨm: —Atsew ebɨte hutɨta erze uje titɨm owa. Ich om par erze uje Porrosht tatɨm õr par otĩ̵r ese Obejɨt ɨr ahamich. Ese ahamich shɨ ɨtso uje ese Obejɨt chiileku.— Tatɨm yok toy ɨm: —Erze uje titɨm owaka ich ũru, wɨr Porrosht ahwoso.— 10Esee hn tokotsa pɨte hnɨmoho ese anjel ɨkɨch par tɨkeeychãha ɨre per ese anjel tatɨm yok ɨm: —Ye ahakõr uhu ɨlorz. Shɨ yok Porrosht ɨr ɨbɨk ɨtso owa hn shɨ yok ɨtso eshɨbo uje ye olotiis uje Jesús tata. Shɨ eeychãha Porrosht. Erze uje Jesús tata hn erze uje profeta otata wɨr uje Porrosht Ɨchɨbich tatɨm õr.— 11Esee hn takachɨm poõrc uje sɨtsẽr ɨre hn tokomo kabehet uje poro. Ese uje iyãha ese kabehet ɨr iich otsɨɨ shish yakaha uje tata hn shish ũru. Uje sepyẽr oso uje oshiyokõr mɨhnũwo hn uje tatsɨkĩ̵r õr ich shish shiyokõr uje ich om. 12Ɨr ɨle eyhi ich hũre shɨ ɨtso jwekɨta yokacha, hn erze õr wolo uje reye oyãha wɨchɨ iyãha ich kɨhniya. Ɨr iich de eeych uje nĩhyok yeẽk chɨraha, shɨ ɨre uje chɨraha. 13Erze ɨr ɨshuwo uje iyãha shɨ ɨtso uje otsakɨhɨ dɨkɨrmɨsta ehet hn ochiyuhu. Ese uje iyãha kabehet ɨr iich otsɨɨ Porrosht ahwoso. 14Ohyerptoso oyehe wɨchɨ nẽr uje otãra poõrc. Wɨr ich õr ɨshuwo ye warĩ̵rsh hn poro. Oyãha kabyuhwo poro. 15Ese õr bahlut espada tokolɨhɨ ɨr ahwo uje ich watakpa par nos ihyo wɨr dihipo uje otɨrẽt otãra ĩ̵rmo lekɨtiyo. Wɨchɨ shiyokõr shɨ ɨtso yeẽk uje tarãha uva hnɨmich hn chiyuhu ɨr otich pork Porrosht uje ukurbo deyo de ich sɨtak pɨshɨ õr. Wɨchɨ tyenɨj tɨbey ĩ̵rmo oso nehe hn uje yeẽk shiyokõr uje ich mĩ̵hnɨk ich sepyẽr chĩ̵ra pyerɨt ɨtso pohɨrkɨta. 16Ese uje iyãha kabehet iich de ɨr nerpta eeych hn de ɨtero eeych toy. Ɨr iich otsɨɨ wɨchɨ uu rey õr bahlut pisht hn erze ɨrhẽ õr bahlut toy. 17Esee hn tokomo anjel yet uje iyehetɨhɨchɨs par deeych chihit. Wɨchɨ tɨbich ich sɨhnew tɨbii erze chɨpɨrme uje iyohochɨs poõrc pehet ɨm: —Erẽtlo par uje aaklo elɨlo poso uje Porrosht ɨshɨm olak. 18Tyenɨj elɨlo erze reye õr ẽro hn tyenɨj elɨlo erze ohyerptoso õr bahluwo õr ẽro hn erze uje õr ukurbo deyo de hn elɨlo erze kabyuhwo ẽro hn erze uje oyãha. Tyenɨj nos elɨlo wɨr õr ẽro erze oso kɨmɨjɨ õr yɨlo o kɨmɨjɨ ye õr yɨlope, kɨmɨjɨ õr deyo o kɨmɨjɨ õr ijaabo.— 19Esee hn tokomo ese loshɨpɨt uje tokolɨhɨ onoota bahluta hõr wɨr reye hn erze ohyerptoso uje otãra ĩ̵rmo lekɨtiyo. Wɨr otakɨsho lawich par otatskɨr ese uje iyãha kabehet hõr wɨr ohyerptoso. 20Uje oteye hn ochishew ese loshɨpɨt uje tokolɨhɨ onoota bahluta hn ese profetɨt uje shiyokõr kuche uje ye latɨk pwele niyokõr par sehnyẽr oso. Shɨ uje ese loshɨpɨt de ɨre ahɨr ich pwele shiyokõr shuu ɨtsorz. Shish sehnyẽr erze oso uje ese loshɨpɨt yarta de õr hn oteeychãha ese loshɨpɨt ɨr kojach pɨt uje seẽt ɨre. Ochishew ese loshɨpɨt uje tokolɨhɨ onoota bahluta hn ese profetɨt uje sehnyẽr oso hn otãra õr ochɨmchaha õr urhuta bahluta ehet shɨ õr ɨka. Asufre dechɨ uje duhlu. 21Ese uje espada tãra ahwo hn iyãha ese kabehet shuu erze oso yewo chĩ̵ra õr ese espada shuu otoy. Nos wɨr chɨpɨrme tew erze oso õr ẽro nehech ɨr ɨje yenpa.

will be added

X\