APOCALIPSIS 18

1Esee hn tokomo anjel yet uje yesh ihnɨmich tãra poõrc. Ɨr ukurbo deyo de hn hũre chihit hnɨmich. 2Wɨchɨ tɨbich sɨhnew ɨm: —Ich otsɨhna ese dɨt bahlut Babilonia, ich otsɨhna. Heke shɨ demonyo sakahachɨs hn nos wɨr ɨchɨbiyo mɨhnũwo sakahachɨs toy hn chɨpɨrme uje yelɨj otew shiyokõr dewohochɨs. 3Porrosht shuu otsɨhna ese dɨt ɨtsorz pork erze dɨt oso oshuu nos dihipo oshiyokõr uje ich mɨhnũwo ɨtso õr. Oshiyokõr shɨ ɨtso uje shuu oho wint uje mĩ̵hnɨk. Erze dɨt oso oshuu erze reye uje ode ĩ̵rmo lekɨtiyo oshiyokõr mɨhnũwo ɨtso õr toy. Erze oso uje odechɨ dɨt oshiyokõr mɨhnũwo par uje otserz hnote ich kɨhniya heke oshuu wɨr õr ɨhĩ̵r deyo erze uje ode ĩ̵rmo lekɨtiyo uje ochiwãha ɨr kuche uje ich ɨhĩ̵rtso.— 4Esee hn tukunt ahwoso uje tãra poõrc tata ɨm: —Porrosht sole: “Olak uje olak yok pijo, atokolɨhɨlo ese dɨt par uje ye ahakõrlo erze mɨhnũwo uje wɨr oshiyokõr hn par uje ye wɨr terɨhɨ olak erze kuche mɨhnũwo uje tĩ̵r õr uje tepyẽr õr nehe.” 5Erze kuche mɨhnũwo uje oshiyokõr shɨ ɨtso uje otsɨtiyẽr kuche ich kɨhnipa nehech terɨhɨ poõrc. Porrosht eyucha erze õr kuche mɨhnũwo uje oshiyokõr hn terɨhɨ ɨshɨrĩt par sepyẽr õr.— 6Erze ahwoso uje tukuntɨke uje tãra poõrc tatɨm Porrosht ɨm: —Epiyer erze dɨt oso par erze kuche mɨhnũwo uje oshiyokorĩ̵hɨye. Uhu sowe do bese erze kuche mɨhnũwo uje õr ɨre oshiyokõr. Erze mɨhnũwo uje oshiyokõr ich shɨ ɨtso uje oshuu yewo oho kuche mɨhnũwo, heke uhu ɨo uje wɨr oho toy do bese erze uje oshuu yewo oho. 7Erze dɨt oso ich shɨ ɨtso tɨmcharrza waa je narim ɨre hn chukutɨrãha ɨre kuche ich kɨhniya heke uhu mɨhnũwo tĩ̵r ɨre uje ich dospa ich kɨhniya toy pork ehet chiilehet ɨm: “Yok reynta. Ye yok poluupe. Yelɨj yok dosdarak ɨlo asa poluuta uje abich toy.” 8Shɨ deeych nohmɨra uje erze mɨhnũwo tĩ̵r õr. Ode uje otoy hn ode uje oyerh pork yewo otoy hn ode uje sewɨt sẽhi õr. Deeych yet nehe hn ese dɨt tyenɨj duhlu pork eyok Ɨrhĩch Porrosht ukurbo deyo de. Wɨchɨ uje tyenɨj sepyẽr õr.— 9Ese dɨt shɨ ɨtso tɨmcharrza yɨtorrza hn erze reye uje ode ĩ̵rmo lekɨtiyo ich shɨ ɨtso uje õya wate par uje oshiyokõr mɨhnuwõhoye hn wate shuu ochukutɨrãha ɨr kuche toy. Heke uje erze reye oteychɨm ese kiibich uje tĩ̵r poõrc uje ese dɨt duhlu ich oyerh hn õr dosdarak. 10Tyenɨj oyehe dukuhla pork otola uje erze mɨhnũwo uje tĩ̵r dɨt terɨhɨ õr toy. Otata otsɨɨ: —Hiye, hiye, ese dɨt bahlut Babilonia ich ɨr ukurbo deyo de per ich wantakpa uje ese mĩ̵hnɨk tĩ̵r ɨre pork oshiyokõr mɨhnũwo.— 11Nos wɨr oso uje ode ĩ̵rmo lekɨtiyo uje ochiwãha ɨr kuche erze dɨt oso ich õr dosdarak hn oyerh pork ich nĩhyok uje yeẽk tiya õr kushjãro. 12Wɨr ochiwãha ɨr oro, plata, hn kojano uje ich ɨhĩ̵rtso hn debich, hn erze kojano yewo uje iich otsɨɨ perla. Ochiwãha bortɨso uje ich ɨhĩ̵rtso hn bortɨso uje kolor lila hn uje seda hn bortɨso uje wɨhĩ̵rtso. Ochiwãha nos wɨr tabla uje aat ehmuuj hn ochiwãha erze kuche uje oshiyokõr ochĩ̵ra elefante wãpe. Ochiwãha erze kuche uje oshiyokõr ochĩ̵ra tabla uje ich debichpa hn erze uje oshiyokõr ochĩ̵ra bronse hn pyerɨt hn erze uje oshiyokõr ochĩ̵ra kojano uje iich otsɨɨ mármol. 13Ochiwãha canela hn yet iich otsɨɨ especias hn erze kuche uje aat ehmuuj uje iich otsɨɨ incienso, mirra, hn perfume. Ochiwãha wino, aseyte, erint hn trigo. Ochiwãha wõjo, obeje, kabyuhwo, jarleshɨ nehech ochiwãha oso uje õr yɨlo. 14Erze oso otsɨɨ: —Ich ɨhĩ̵r pɨshɨ erze pohɨr ee uje otewni per ich ye otewpope, hn nos wɨr kuche uje otsahmũrpa hn erze kuche uje ich ɨhĩ̵rts pisho uje deni ich ye chɨhɨpo petɨk nehe pork ich nĩhyok ese dɨt.— 15Erze uje ochiwãha ɨr kushjarõho erze dɨt oso ich otserz hnote ich kɨhniya. Wɨr shɨ oyehe dukuhla ese dɨt uje kuchɨt mĩ̵hnt tĩ̵r par uje ye terɨhɨ õr toy. Wɨr ich oyerh pork oyẽra ese dɨt hn otata otsɨɨ: 16—Hiye, hiye, ese dɨt bahlut ich shɨ ɨtso tɨmcharrza waa je ɨr ɨshuwo ich ɨhĩ̵rt pishoni. Ɨr ɨshuwo kolor lila hn wɨhĩ̵rtso. Oro de eeyo hn kojano uje ich ɨhĩ̵rtso hn debich hn yewo uje iich otsɨɨ perla. 17Ich ɨhɨrle uje sɨhna ɨre ese dɨt hn nos wɨr kushjãro ɨhĩ̵rtso uje de ehet.— Nos wɨr pohɨr ɨr yɨnsɨro hn erze yewo uje õr pohɨr de hn erze uje ochishew obiyoho pohɨr aho hn nos wɨr erze uje ochiwãha ɨr kuchehe pohɨr wɨr shɨ oyehe dukuhla 18hn oteychɨm ese kiibich uje tãra ese dɨt uje duhlu otɨbich otsɨɨ: —Nĩhyok dɨt yet uje ɨtso ese dɨt bahlut.— 19Ochukshãha hnɨmich ukult dehe pork ich õr dosdarak hn oyerh otsɨɨ —Hiye, hiye, ese dɨt uje ich dich. Nos shuu wɨr õr ɨhĩ̵r deyo erze pohɨr yɨnsɨro hn ich shɨ una ora uje otsɨhna ese dɨt.— 20Hn erze ahwoso uje tãra poõrc tata ɨm: —Olak uje olak Porrosht aabo hn uje olak apóstole hn uje olak profeta uje olak dechɨ poõrc tyenɨj olak ayla uje Porrosht sɨhna ese dɨt oso pork oshiyokõr mɨhnuwõho olakni.— 21Esee hn anjel uje ukurbo deyo de chishew kojach uje ich dich hn tãra chɨbɨte onoota bahluta hn tata ɨm: —Ese dɨt bahlut Babilonia ich tyenɨj otsɨhna shɨchish heke ich ye onomo petɨk nehe shɨ ɨtso ese kojach uje tokõraka tɨbɨte onoota bahluta. 22Ich ye onunt petɨk nehe uje erze oso oshuu arpa par uje oteeychɨ hn ich ye onunt uje otsobɨta flawta hn trompeta. Ich nĩhyok erze uje ochishew obiyo oshiyokõr kuchehe wahacha dɨt ehet nehe, hn ich ye onunt ese kojach ihyokõrtpe uje chukwerh oposo.— 23Hn ese anjel ɨm: —Ich ye onomo nampɨr petɨk nehe uje chihit ese dɨt ehet, hn ich ye onunt ese ahamich nehe uje ochiileku. Erze oso uje odebuhu ese dɨt ehetni wɨr ɨhĩ̵r deyo pork otiya ɨr kuche hn ochiwãha. Nos wɨr oso uje ode ĩ̵rmo lekɨtiyo ochɨraha õr, hn erze meriko hn konsaho uje ode ese dɨtni nos otsehnyẽr oso uje ode ĩ̵rmo lekɨtiyo. 24Erze dɨt oso wɨr uje oshuu Porrosht ɨr profeta wɨshɨ hn uu Porrosht aabo. Oshuu õr oshuu otoy hn õr armɨtsɨ noshɨ. Oshuu wɨr toy erze uje ode ĩ̵rmo lekɨtiyo.—

will be added

X\