APOCALIPSIS 17

1Esee hn erze anjele uje õr syete uje õr basɨ de, yet tatɨm yok ɨm: —Erẽt. Tokowa owa ese dɨt uje ɨtso tɨmcharrza yɨtoro uje Porrosht tyenɨj shuu kuche mɨhnũwo tĩ̵r ɨre pork shiyokõr kuche mɨhnũwo ich kɨhniya. Wate sakaha awɨt eeych. 2Erze reye uje ode ɨr hnɨmoho lekɨtiyo otĩ̵r ese dɨt uje ɨtso tɨmcharrza yɨtoro par uje oshiyokõr mɨhnuwõhoye hn erze oso uje ode lekɨtiyo otĩ̵r wate par oshiyokõr mɨhnuwõhoye shɨ ɨtso uje yɨkɨch sẽhi õr.— 3Porrosht Ɨchɨbich hnoy yok seya yok hnɨmich uje ɨsa hn tokomo tɨmcharrza iyãha loshɨpɨt uje ich wɨhĩ̵rt. Ɨr iiyo kɨhniya de lekɨtiyo ɨre eeych uje Porrosht ye nahmũrpe. Ɨr hu syete hn ɨr wãpe dye. 4Asa tɨmcharrza ɨr nerpta kolor lila hn wɨhĩ̵r hn kuche de ɨr eeyo uje oro hn kojano po uje ich ɨhĩ̵rtso hn debich hn kojano yewo uje iiyo otsɨɨ perla. Asa tɨmcharrza basta de ɨr hmata waa je oro. Kuche mɨhnũwo uje wate shiyokorĩ̵hɨ oso de asa ɨr basta ehet. 5Ɨr unta iich de uje ye latɨk dɨraha. Ɨr iich tata shuu ɨtsorz: —Ese dɨt bahlut Babilonia wɨchɨ shɨ ɨtso nos yɨtoro õr data. Nos wɨr kuche mɨhnũwo uje de nãhu ĩ̵rmo wate õr data.— 6Tokomo uje asa tɨmcharrza shuu oshuu Porrosht aaboni hn õr armɨtsɨ noshɨ hõr erze uje otsanɨmɨrãha otatɨm oso Jesús. Õr armɨtsɨ shuu wate shɨ ɨtso uje yɨkɨch sẽhi. Uje takachɨm ich shuu tish pɨbe pork ye tɨkɨraha keshɨ latɨkpo. 7Per ese anjel tatɨm yok ɨm : —¿Ɨnaapo heke as abe? Yok tyenɨj titɨm owa asa tɨmcharrza hn ese loshɨpɨt uje wate iyãha uje ɨr hu syete hn ɨr wãpe dye. 8Ese loshɨpɨt uje amoko wɨchɨ antkite ɨchii de per ele ahle ich nĩhyok. Tyenɨj tokolɨhɨ ese jotsɨt uje ye uhurtɨkɨsh nehe hn tĩ̵r urhuta bahluta ehet. Uje ehn Porrosht shiyokõr ɨrmõkite ɨchii shuu ochichew laabo õr iiyo ochɨbɨte asa hutɨta uje wɨr õr iiyo de erze uje õr ɨkɨrĩt de uje yelɨj nɨhna ɨre. Erze oso uje ye õr iiyo chɨhɨpe asa hutɨta ich ochishlabe uje omo ese loshɨpɨt pork antkite de per ele ahle ich nĩhyok je deeych yet nehe hn depo. 9Yeẽk uje eykdeyo tyenɨj shuu deyuwo tɨsĩ̵r par uje chɨraha uje sɨteẽta erze uje tyenɨj titɨm owa. Erze hu uje syete sɨteẽta erze wĩ̵rye uje syete uje asa tɨmcharrza sakaha eeych, 10hn erze hu uje syete sɨteẽta toy erze reye uje õr syete. Sinko otokite hn sohmet masaha õr owich hn rey yet tyenɨj sakaha wɨchɨ owich nehe per ye osdeyope uje sakaha par rey. 11Ese loshɨpɨt uje antkite de per ele ahle ich nĩhyok wɨchɨ uje iyehe erze reye uje õr syete õr nẽr. Wɨchɨ uje tãra erze syete hn tyenɨj tĩ̵r urhuta bahluta ehet nehe. 12Erze wãpe uje dye uje eychɨmɨke wɨr reye uje õr dye. Yahpaa omasahape par reye per uje omasaha nehe ich shɨ ɨhɨrle otokolpo kɨmɨjɨ una ora. Wɨr omasaha par reye õya ese loshɨpɨt. 13Erze reye uje õr dye õr eyuwo ɨtsye heke oshɨm lakɨrbo ese loshɨpɨt. 14Tyenɨj otsatsɨr ese Obejɨt nehe. Uje oteye hn ese Obejɨt serz õr pork ɨre nos wɨr ɨrhẽ õr Ɨrhĩch hn erze reye õr bahlut toy. Erze uje õya ese Obejɨt oso otata otsɨɨ: “Wɨr uje Porrosht chiihla õrkite hn wɨr uje ye olotiis ɨrpe.”— 15Ese anjel tatɨm yok ɨm: —Ese awɨt uje tokomoko uje asa tɨmcharrza yɨtorrza sakaha eeych wɨr oso uje ode ĩ̵rmo lekɨtiyo, hn nos wɨr dihipo hn nos wɨr uje otseẽt ahwoso kɨnãho kɨnãho. 16Ese loshɨpɨt wãpe uje dye uje tokomoko wɨr erze dye reye uje õya ese loshɨpɨt. Wɨr otsɨtak erze dɨt oso uje õr ɨtso tɨmcharrza yɨtoro nehe hn nos ohnoy ɨr kushjãro hn ochiyuhu wate ɨshuwo. Wɨr otew wate ẽro nehe hn otsẽru wate oshuu duhlu. 17Erze reye tyenɨj oshiyokõr oshuu ɨtsorz nehe pork Porrosht shuu otakɨsho leyuwo par oshɨm lakɨrbo ese loshɨpɨt uje tokolɨhɨ onoota nehech nos yakaha erze uje Porrosht tata. 18Asa tɨmcharrza waa je tokomoko sɨteẽta ese dɨt bahlut uje shuu erze reye uje ode hnɨmoho lekɨtiyo oshiyokõr uje ɨre sahmũr.—

will be added

X\