APOCALIPSIS 16

1Esee hn tukunt ahwoso ich sɨhnew tãra asa templo ehet tatɨm erze anjele uje õr syete ɨm: —Bolilo erze kuche mɨhnũwo uje de erze basɨ aho hn orĩ̵hɨlo hnɨmich eeych pork Porrosht ich sɨtakpa erze uje oshiyokõr mɨhnũwo. Erze kuche mɨhnũwo Porrosht shuu tĩ̵r õr pork ich sɨtak pɨshɨ õr uje oshiyokõr uje mɨhnũwo.— 2Esee hn anjel webich osht hnoy asa ɨr basta uje kuche mɨhnũwo de ehet hn sorĩ̵hɨ hnɨmich. Kuche tokolɨhɨ oso õr yũhɨr uje ɨtso abaha uje ich yarhakpa hn doso pork ese loshɨpɨt yarta de õr hn oteeychãha ese kojach pɨt. 3Esee hn anjel yet uje iyehe ese webich osht nẽr hnoy ɨr basta sorĩ̵hɨ erze kuche mɨhnũwo asa onoota bahluta heke asa onoota bahluta chisãha ɨre dɨkɨrmɨsta shɨ ɨtso topo õr armɨtsɨ. Nos wɨr kuche uje de asa onoota ehet nos toy. 4Esee hn anjel yet uje iyehe erze osiyer õr nẽr hnoy ɨr basta uje erze kuche mɨhnũwo de ehet hn sorĩ̵hɨ erze onoo hn erze owɨlo uje awɨt tãra hnɨmich. Nos chisãha ɨre dɨkɨrmɨsta. 5Tukunt ese anjel yet uje tɨbey awɨt tata ɨm: —Ɨrhĩche Porrosht, yelɨj ahakõr uje mĩ̵hnɨk. Shish owa dekite nehech ele ahle shish owa de. Yelɨj alehi ahwoso hn yelɨj aluwe uje epiyer õr uhu ɨtsorz. 6Ich om uje eyuhu õr bahat pork uhu wɨr oho dɨkɨrmɨsta ɨtsorz pork erze oso oshuu uu aabo wɨshɨ hn erze profeta wɨshɨ oshuu otoy hn õr armɨtsɨ noshɨ.— 7Tukunt ahwoso uje tãra ese altar tata ɨm: —Ɨrhĩche Porrosht, owa akɨrbo deyo de. Ich ũru uje oshiyokõr uje mɨhnũwo hn ich om uje epiyer õr uhu ɨtsorz.— 8Esee hn anjel yet uje iyehe erze tre nẽr sanuwãha erze kuche mɨhnũwo uje de ɨr basta ehet ese deeych eeych heke ese deeych ich duhlpa ɨtso jwekɨta hn tew erze oso õr yũhɨr shuu doso. 9Erze oso ich õr yũhɨr dospa uje deeych duhlu ɨtsorz heke ochinehnɨm Porrosht ɨr iich. Porrosht wɨchɨ ukurbo deyo de hn nos tɨbey erze kuche mɨhnũwo uje tĩ̵r õr per ye onoym erze mɨhnũwope uje õr ɨre oshiyokõr par uje oshuu Porrosht dich. 10Esee hn anjel yet uje iyehe erze kwatro nẽr sanuwãha erze kuche mɨhnũwo uje de ɨr basta ehet ese loshɨpɨt uje tokolɨhɨ onoota ɨr owich uje sakaha par tɨbey oso. Uje sanuwãha ich shuu dɨhlel data ese owich uje ɨre de. Erze oso uje odechɨ oches narhõ pork ich dospa 11hn ochinehnɨm Porrosht uje de poõrc pork asa dɨhlel data hn nos wɨr kuch mɨhnũwo uje tĩ̵r õr ich dospa hn erze uje ich ɨtso abaha yesh de õr toy, per ye onoympe oshiyokõr erze mɨhnũwo par uje oshiyokõr erze om uje Porrosht sahmũr. 12Esee hn anjel yet uje iyehe erze sinko nẽr sanuwãha erze kuche mɨhnũwo uje de asa basta ehet asa onoota data waa je iich otsɨɨ Éufrates heke asa onoota kako par wɨr ochɨkãha erze reye hõr ɨr ohyerptoso uje otãra deeych warĩch. 13Esee hn takachɨm hn tokomo woo tre. Nohmata tãra wɨchɨ ahwo ese loshɨpɨt uje iich otsɨɨ Satanás, hn yata tãra wɨchɨ loshɨpɨt uje tokolɨhɨ onoota bahluta hn yata tãra wɨchɨ ahwo toy ese loshɨpɨt uje tokolɨhɨ hnɨmich. Ese uje tokolɨhɨ hnɨmich wɨchɨ profetya uje sehnyẽr oso. Erze woo wɨr ɨchɨbiyo mɨhnũwo. 14Erze woo uje tokolɨhɨ õr ahwo wɨr demonyo uje oshiyokõr erze uje ye latɨk pwele shiyokõr. Wɨr otĩ̵r ĩ̵rmo lekɨtiyo par otɨbii erze reye hn ohyerptoso par uje oshuu otakɨsho lawich par uje otatskĩ̵r pork ich terɨhɨ ese deeych uje Porrosht cheeshpo. Wɨchɨ ich ukurbo deyo de. 15Esee hn Jesús tata ɨm: —Ẽrlo yok. Uje takaashpo nehe ich ye latɨk dɨraha shɨ ɨtso echɨkɨt. Ich om par yeẽk uje iyem yok hn chɨmɨt ɨre hn ye niyokõr uje mɨhnũwope shɨ ɨtso uje iyãha lasuwo heke ich ye ɨmeheeychpe hn ye pookpe uje takaashpo nehe.— 16Esee hn erze reye hõr ɨr ohyerptoso otakɨsho lawichɨhɨchɨs ese owich uje hebreo ahwosht otsɨɨ Armagedón. 17Esee hn anjel yet uje iyehe erze seys nẽr sanuwãha erze kuche mɨhnũwo uje de ɨr basta ehet poõrc pehet hn ahwoso tãra wahacha templo ehet waa je de poõrc uje Porrosht ɨbɨta de. Erze ahwoso tata sɨhnew ɨm: —Ich uhurzɨke.— 18Ich hũre ɨtso yuwebo hn tukunt ahwoso hn nar ich ihyokõrak dich hn hnɨmich telerrzpa. Yelɨj telerrza ɨlorz uje ehn hnakɨrbo ode hnɨmich. 19Ese dɨt bahlut sehek ɨre po tre, hn nos wɨr pwerto uje de erze dihipo õr duwo ĩ̵rmo lekɨtiyo nos kay hn Porrosht eyucha ese dɨt bahlut Babilonia par uje sepyẽr erze oso uje odechɨ shɨ ɨtso uje shuu oho erze kuche uje de basta ehet uje ich dospa pork ɨre ich sɨtak pɨshɨ õr. 20Nos wɨr erze hnɨmo uje onoota bahluta chɨpeẽsa yaka hn awɨt sajuwe, hn nos wɨr erze kojano deyo ihnɨmich nehech nĩhyok. 21Kojano uje ɨbɨk ich ĩya uje tãra poõrc kayɨhɨ erze oso õr eeyo. Erze kojano wɨr deyo. Iyuwe kwarenta kilo kal nohmɨra heke erze oso ochinehnɨm Porrosht uje kojano kayɨhɨ õr eeyo pork ich yarhakpa.

will be added

X\